Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

2 Hari 1:1-18

BALAYAN SANG KAUNDAN

  • Gintagna ni Elias ang kamatayon ni Ahazias (1-18)

1  Sang patay na si Ahab, nagrebelde ang Moab+ sa Israel.  Nahulog sadto si Ahazias sa barandilya sang iya kuarto sa atop sang iya balay sa Samaria kag nahalitan sia. Gani nagpadala sia sing mga mensahero kag ginsugo niya sila: “Lakat kamo kag mamangkot kamo kay Baal-zebub nga dios sang Ekron+ kon bala magaayo pa ako sa sini nga halit.”+  Apang ang anghel ni Jehova nagsiling kay Elias*+ nga Tisbinhon: “Sugataa ang mga mensahero sang hari sang Samaria kag isiling mo sa ila, ‘Wala bala sing Dios sa Israel amo nga mamangkot pa kamo kay Baal-zebub nga dios sang Ekron?+  Gani amo ini ang ginasiling ni Jehova: “Indi ka na makapanaug sa hiligdaan nga ginahigdaan mo, kay mapatay gid ikaw.” ’ ” Dayon naglakat si Elias.  Sang nagbalik sa iya ang mga mensahero, nagpamangkot sia: “Ngaa nagbalik kamo?”  Nagsabat sila: “May isa ka tawo nga nagsugata sa amon, kag ginsilingan niya kami, ‘Magbalik kamo sa hari nga nagpadala sa inyo, kag isiling ninyo sa iya: “Amo ini ang ginasiling ni Jehova: ‘Wala bala sing Dios sa Israel amo nga nagpadala ka pa sing mga mensahero agod mamangkot kay Baal-zebub nga dios sang Ekron? Bangod sini, indi ka na makapanaug sa hiligdaan nga ginahigdaan mo, kay mapatay gid ikaw.’ ” ’ ”+  Nagpamangkot sia: “Ano ang hitsura sang tawo nga nagsugata sa inyo kag nagsiling sina sa inyo?”  Nagsabat sila: “Nagasuksok ang tawo sing bayo nga bulbulon+ kag ang iya paha sa hawak human sa panit.”+ Nagsiling sia dayon: “Si Elias nga Tisbinhon yadto.”  Dayon ginpakadto sang hari kay Elias ang pangulo sang tig-50 ka soldado upod sa iya 50 ka soldado. Pag-abot niya didto, nagapungko si Elias sa ibabaw sang bukid. Nagsiling sia kay Elias: “Tawo sang matuod nga Dios,+ nagsiling ang hari, ‘Manaug ka dira.’ ” 10  Apang ginsabat ni Elias ang pangulo sang tig-50 ka soldado: “Kon ako tawo sang Dios, kabay pa nga may kalayo nga manaug halin sa langit+ kag sunugon ikaw kag ang imo 50 ka soldado.” Kag may kalayo nga nanaug halin sa langit kag ginsunog sia kag ang iya 50 ka soldado. 11  Gani ginpakadto liwat sang hari ang isa pa ka pangulo sang tig-50 ka soldado upod sa iya 50 ka soldado. Nagsiling man sia: “Tawo sang matuod nga Dios, amo ini ang ginasiling sang hari, ‘Manaug ka dira.’ ” 12  Apang nagsabat si Elias: “Kon ako tawo sang matuod nga Dios, kabay pa nga may kalayo nga manaug halin sa langit kag sunugon ikaw kag ang imo 50 ka soldado.” Kag may kalayo nga nanaug halin sa langit kag ginsunog sia kag ang iya 50 ka soldado. 13  Ginpakadto liwat sang hari ang ikatlo nga pangulo sang tig-50 ka soldado upod sa iya 50 ka soldado. Apang ang ikatlo nga pangulo sang tig-50 ka soldado nagtaklad kag nagluhod sa atubangan ni Elias kag nagpakiluoy sia sa iya: “Tawo sang matuod nga Dios, palihug, kabiga nga hamili ang akon kabuhi kag ang kabuhi* sang imo 50 ka alagad. 14  Ginsunog na sang kalayo nga nanaug halin sa langit ang duha ka pangulo sang tig-50 ka soldado kag ang ila kaupod nga 50 ka soldado nga nauna sa akon, apang kabiga karon nga hamili ang akon kabuhi.”* 15  Gani nagsiling ang anghel ni Jehova kay Elias: “Magdulhog ka upod sa iya. Indi ka magkahadlok sa iya.” Gani nagdulhog sia upod sa iya kag nagkadto sa hari. 16  Dayon nagsiling si Elias sa hari, “Amo ini ang ginasiling ni Jehova: ‘Nagpadala ka sing mga mensahero agod mamangkot kay Baal-zebub nga dios sang Ekron.+ Bangod bala wala sing Dios sa Israel?+ Ngaa wala ka mamangkot sa iya? Bangod sini, indi ka na makapanaug sa hiligdaan nga ginahigdaan mo, kay mapatay gid ikaw.’ ” 17  Gani napatay si Ahazias suno sa ginsiling ni Jehova kay Elias. Bangod wala sing anak si Ahazias, si Jehoram*+ amo ang nagbulos sa iya bilang hari, sang ikaduha nga tuig sang paghari ni Jehoram+ nga anak ni Jehosapat nga hari sang Juda. 18  Tuhoy sa iban pa nga natabo sa kabuhi ni Ahazias,+ ang iya ginhimo, indi bala nga nasulat ini sa libro sang kasaysayan sang mga hari sang Israel?

Footnote

Buot silingon, “Ang Akon Dios amo si Jehova.”
Ukon “ang akon kalag kag ang mga kalag.”
Ukon “kalag.”
Utod sia ni Ahazias.