Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

2 Cronica 8:1-18

BALAYAN SANG KAUNDAN

  • Iban pa nga proyekto ni Solomon (1-11)

  • Pagsimba sa templo gin-organisar (12-16)

  • Ang mga barko ni Solomon (17, 18)

8  Pagligad sang 20 ka tuig, pagkatapos mapatindog ni Solomon ang balay ni Jehova kag ang iya balay,*+  gintukod liwat ni Solomon ang mga siudad nga ginhatag ni Hiram+ kay Solomon kag ginpaistar didto ang mga Israelinhon.*  Ginsalakay man ni Solomon ang Hamat-zoba kag naagaw niya ini.  Dayon ginpabakod* niya ang Tadmor sa kamingawan kag ang tanan nga bodega nga siudad+ nga gintukod niya sa Hamat.+  Ginpabakod man niya ang Naibabaw nga Bet-horon+ kag ang Naubos nga Bet-horon,+ mga siudad nga may mabakod nga depensa, mga pader, mga gawang, kag mga trangka,  kag ang Baalat,+ ang tanan nga bodega nga siudad nga ginapanag-iyahan ni Solomon, ang tanan nga siudad nga ginapunduhan sang mga kangga,+ ang mga siudad para sa mga manugkabayo, kag ang tanan nga luyag patindugon ni Solomon sa Jerusalem, sa Lebanon, kag sa tanan nga duta nga sakop niya.  Tuhoy sa tanan nga katawhan nga nabilin sa mga Hethanon, mga Amornon, mga Pereznon, mga Hevhanon, kag mga Jebusnon,+ nga indi bahin sang Israel,+  ginpatawag ni Solomon sa pagpangabudlay tubtob sini nga adlaw ang ila mga kaliwat nga nabilin sa duta nga wala ginlaglag sang mga Israelinhon.+  Apang wala ginhimo ni Solomon nga ulipon ang bisan sin-o sa mga Israelinhon para magpangabudlay sa iya,+ kay sila ang iya mga hangaway, mga manugdumala sang iya mga kabulig nga opisyal, kag mga pangulo sang mga nagasakay sa kangga kag sang mga manugkabayo.+ 10  Si Hari Solomon may 250 ka pangulo sang mga administrador, ang mga porman nga nagadumala sa mga trabahador.+ 11  Ginsaylo man ni Solomon ang anak nga babayi sang Paraon+ halin sa Siudad ni David pakadto sa balay nga ginpatindog niya para sa iya,+ kay nagsiling sia: “Bisan pa asawa ko sia, indi sia dapat mag-istar sa balay ni Hari David sang Israel, kay balaan ang mga duog nga ginabutangan sang Kaban ni Jehova.”+ 12  Dayon naghalad si Solomon sing mga halad nga sinunog+ kay Jehova sa halaran+ ni Jehova nga ginpatindog niya sa atubangan sang portico.+ 13  Ginhimo niya ang dapat himuon kada adlaw kag naghalad sia sing mga halad suno sa sugo ni Moises para sa mga Adlaw nga Inugpahuway,+ sa mga tion sang lati,+ kag sa gintalana nga mga kapiestahan tatlo ka beses kada tuig,+ sa Kapiestahan sang Tinapay nga Wala sing Lebadura,+ sa Kapiestahan sang mga Semana,+ kag sa Kapiestahan sang mga Payagpayag.*+ 14  Suno sa pagsulundan sang iya amay nga si David, gingrupo man niya ang mga saserdote+ para sa ila mga buluhaton, kag ang mga Levinhon para sa ila katungdanan sa pagdayaw sa Dios+ kag sa pag-alagad sa atubangan sang mga saserdote suno sa adlaw-adlaw nga hilikuton, kag ang mga manugbantay sang gawang para sa lainlain nga mga gawang,+ kay amo ini ang ginsugo ni David nga alagad sang matuod nga Dios. 15  Gintuman nila ang sugo sang hari sa mga saserdote kag sa mga Levinhon may kaangtanan sa tanan nga butang kag sa mga talaguan. 16  Gani organisado gid ang tanan nga ginpahimo ni Solomon, sugod sang adlaw nga ginpasad ang pundasyon sang balay ni Jehova+ tubtob nahuman ini. Gani natapos ang balay ni Jehova.+ 17  Dayon nagkadto si Solomon sa Ezion-geber+ kag sa Elot+ sa baybayon sang dagat sa duta sang Edom.+ 18  Ginpadala sa iya ni Hiram+ ang mga barko kag ang mga marinero nga hanas sa pagpanakayon sa dagat paagi sa iya mga alagad. Nagkadto sila sa Ofir+ upod ang mga alagad ni Solomon kag nagkuha sila didto sing 450 ka talanton* nga bulawan+ kag gindala nila ini kay Hari Solomon.+

Footnote

Ukon “palasyo.”
Sa literal, “mga anak ni Israel.”
Ukon “gintukod liwat.”
Ukon “Temporaryo nga mga Puluy-an.”
Ang isa ka talanton katumbas sang 34.2 ka kilo. Tan-awa ang Apendise B14.