Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Biblia Online | BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

2 Cronica 36:1-23

BALAYAN SANG KAUNDAN

  • Si Jehoahaz, hari sang Juda (1-3)

  • Si Jehoiakim, hari sang Juda (4-8)

  • Si Jehoiakin, hari sang Juda (9, 10)

  • Si Sedequias, hari sang Juda (11-14)

  • Kalaglagan sang Jerusalem (15-21)

  • Ang sugo ni Ciro nga patindugon liwat ang templo (22, 23)

36  Si Jehoahaz+ nga anak ni Josias amo ang ginbulos sang katawhan sa iya amay bilang hari sa Jerusalem.+  Nagaedad si Jehoahaz sing 23 ka tuig sang nangin hari sia, kag naggahom sia sa Jerusalem sing tatlo ka bulan.  Apang ginpahalin sia sang hari sang Egipto sa paggahom sa Jerusalem kag ginpabayad niya ang pungsod sing 100 ka talanton* nga pilak kag isa ka talanton nga bulawan.+  Ang utod ni Jehoahaz nga si Eliakim amo ang ginhimo sang hari sang Egipto nga hari sa Juda kag Jerusalem kag gin-islan niya ang iya ngalan nga Jehoiakim. Apang gindala ni Neco+ sa Egipto si Jehoahaz nga iya utod.+  Nagaedad si Jehoiakim+ sing 25 ka tuig sang nangin hari sia, kag naggahom sia sa Jerusalem sing 11 ka tuig. Ginhimo niya ang malain sa panulok ni Jehova nga iya Dios.+  Ginsalakay sia ni Hari Nabocodonosor+ sang Babilonia agod kadenahan sia sing duha ka kadena nga saway kag dalhon sa Babilonia.+  Gindala ni Nabocodonosor sa Babilonia ang iban nga mga kagamitan sa balay ni Jehova kag ginbutang ini sa iya palasyo sa Babilonia.+  Tuhoy sa iban pa nga natabo sa kabuhi ni Jehoiakim, ang makangilil-ad nga mga butang nga iya ginhimo kag ang malain nga mga butang tuhoy sa iya, nasulat ini sa Libro sang mga Hari sang Israel kag sang Juda. Si Jehoiakin nga iya anak amo ang nagbulos sa iya bilang hari.+  Nagaedad si Jehoiakin+ sing 18 ka tuig sang nangin hari sia, kag naggahom sia sa Jerusalem sing tatlo ka bulan kag napulo ka adlaw. Ginhimo niya ang malain sa panulok ni Jehova.+ 10  Sa pagsugod sang tuig,* ginpadala ni Hari Nabocodonosor ang iya mga alagad kay Jehoiakin kag gindala sia sa Babilonia,+ pati ang malahalon nga mga kagamitan sa balay ni Jehova.+ Dayon ginhimo niya nga hari sa Juda kag Jerusalem si Sedequias nga utod sang iya amay.+ 11  Nagaedad si Sedequias+ sing 21 ka tuig sang nangin hari sia, kag naggahom sia sa Jerusalem sing 11 ka tuig.+ 12  Ginhimo niya ang malain sa panulok ni Jehova nga iya Dios. Wala sia magpaubos sang iya kaugalingon sa atubangan ni Jeremias nga manalagna,+ nga naghambal suno sa sugo ni Jehova. 13  Nagrebelde man sia kay Hari Nabocodonosor,+ nga nagpasumpa sa iya sa ngalan sang Dios kag nangin batinggilan sia* kag ginpatig-a niya ang iya tagipusuon kag wala sia magbalik kay Jehova nga Dios sang Israel. 14  Ang tanan nga puno nga saserdote kag ang tanan nga katawhan nangin indi gid matutom. Ginhimo nila ang tanan nga makangilil-ad nga mga butang nga ginahimo sang mga pungsod, kag gindagtaan nila ang balay ni Jehova+ nga ginpakabalaan niya sa Jerusalem. 15  Sulitsulit nga ginpaandaman sila ni Jehova nga Dios sang ila mga katigulangan paagi sa iya mga mensahero, bangod naluoy sia sa iya katawhan kag sa iya puluy-an. 16  Apang ginalangolango lang nila ang mga mensahero sang matuod nga Dios.+ Gintamay nila ang iya ginsiling+ kag ginyaguta nila ang iya mga manalagna,+ tubtob wala na sing paglaum nga mag-ayo pa sila, amo nga naakig gid si Jehova sa iya katawhan.+ 17  Gani ginpasalakay niya sa ila ang hari sang mga Caldeanhon+ nga nagpatay sang ila mga pamatan-on nga lalaki paagi sa espada+ sa balay sang ila santuaryo.+ Wala sia maluoy sa mga pamatan-on nga lalaki ukon babayi, sa tigulang man ukon maluya na.+ Gintugyan sang Dios ang tanan sa iya kamot.+ 18  Gindala niya sa Babilonia ang tanan nga kagamitan sa balay sang matuod nga Dios, ang dalagku kag magagmay, pati ang mga bahandi sa balay ni Jehova kag ang mga bahandi sang hari kag sang iya mga pangulo.+ 19  Ginsunog niya ang balay sang matuod nga Dios,+ ginrumpag ang pader sang Jerusalem,+ ginsunog ang tanan nga torre sini nga may mabakod nga depensa, kag ginguba niya ang tanan nga malahalon nga mga butang.+ 20  Gindala niya sa Babilonia ang mga nabilin nga wala mapatay sa espada,+ kag nangin mga alagad niya sila+ kag sang iya mga anak tubtob naggahom ang ginharian sang Persia,+ 21  agod matuman ang ginsiling ni Jehova paagi kay Jeremias,+ tubtob nga makabawi ang duta sa mga adlaw nga inugpahuway sini nga wala gintuman.+ Sa tanan nga adlaw nga wala sing nagaistar sa sini nakapahuway ini, tubtob matapos ang 70 ka tuig.+ 22  Sang nahauna nga tuig sang paggahom ni Hari Ciro+ sang Persia, gintandog ni Jehova ang iya tagipusuon agod matuman ang ginhambal ni Jehova paagi kay Jeremias.+ Gani, nagpasulat sia sing sugo kag ginpahibalo ini sa bug-os niya nga ginharian,+ nga nagasiling: 23  “Amo ini ang ginsiling ni Hari Ciro sang Persia, ‘Ginhatag sa akon ni Jehova nga Dios sang langit ang tanan nga ginharian sa duta+ kag ginsugo niya ako nga magtukod sing balay para sa iya sa Jerusalem nga sakop sang Juda.+ Kabay pa nga mangin kaupod ni Jehova nga iya Dios ang bisan sin-o sa inyo nga nagaalagad sa iya, kag magbalik sia didto.’”+

Footnote

Ang isa ka talanton katumbas sang 34.2 ka kilo. Tan-awa ang Apendise B14.
Mahimo nga sa tigpamulak.
Sa literal, “kag ginpatig-a niya ang iya liog.”