Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

2 Cronica 34:1-33

BALAYAN SANG KAUNDAN

  • Si Josias, hari sang Juda (1, 2)

  • Mga reporma ni Josias (3-13)

  • Libro sang Kasuguan nakita (14-21)

  • Tagna ni Hulda nga kalaglagan (22-28)

  • Ang libro ginbasa sa katawhan (29-33)

34  Nagaedad si Josias+ sing walo ka tuig sang nangin hari sia, kag naggahom sia sa Jerusalem sing 31 ka tuig.+  Ginhimo niya ang matarong sa panulok ni Jehova kag ginsunod niya ang dalanon ni David nga iya katigulangan. Nangin matinumanon gid sia.  Sang ikawalo nga tuig sang iya paggahom, sang bata pa sia, ginpangita niya ang Dios ni David nga iya katigulangan;+ kag sang ika-12 nga tuig, gintinluan niya ang Juda kag ang Jerusalem+ kag ginkuha niya ang sagrado nga mataas nga mga duog+ kag ang sagrado nga mga poste,* ang tinigib nga mga imahen,+ kag ang metal nga mga estatwa.*  Ginguba man nila sa atubangan niya ang mga halaran para sa mga Baal, kag gin-utod niya ang mga bulutangan sang incienso sa ibabaw sini. Gindugmok man niya kag ginbukbok ang sagrado nga mga poste,* ang tinigib nga mga imahen, kag ang metal nga mga estatwa* kag ginsabwag niya ini sa mga lulubngan sang mga naghalad sa sini.+  Kag ginsunog niya ang mga tul-an sang mga saserdote sa ila mga halaran.+ Sa sini nga paagi, gintinluan niya ang Juda kag Jerusalem.  Sa mga siudad sang Manases, Efraim,+ Simeon, kag tubtob sa Neptali, kag sa mga lugar nga nalaglag sa palibot,  ginguba niya ang mga halaran kag gindugmok niya kag ginbukbok ang sagrado nga mga poste* kag ang tinigib nga mga imahen;+ kag gin-utod niya ang tanan nga bulutangan sang incienso sa bug-os nga duta sang Israel.+ Dayon nagbalik sia sa Jerusalem.  Sang ika-18 nga tuig sang iya paggahom, pagkatapos niya matinluan ang kadutaan kag ang templo,* ginpakadto niya si Safan+ nga anak ni Azalias, si Maaseias nga pangulo sang siudad, kag si Joa nga manugrekord nga anak ni Joahaz, agod kay-uhon ang balay ni Jehova nga iya Dios.+  Nagkadto sila kay Hilkias nga mataas nga saserdote kag ginhatag nila sa iya ang kuarta nga gindala sa balay sang Dios, nga ginkolekta sang mga Levinhon nga manugbantay sang puertahan halin sa Manases, sa Efraim, kag sa iban nga bahin sang Israel,+ halin sa Juda, sa Benjamin, kag sa mga pumuluyo sang Jerusalem. 10  Dayon ginhatag nila ini sa mga nagadumala sa pagpakay-o sang balay ni Jehova. Kag gingamit ini sang mga trabahador sa pagkay-o sang balay ni Jehova. 11  Ginhatag nila ini sa sampaton nga mga trabahador kag sa mga manunukod agod ibakal sing mga bato nga nabasbasan na kag sing mga kahoy nga inugtukod kag gamiton nga balayan para sa mga balay nga ginpabay-an sang mga hari sang Juda nga maguba.+ 12  Masaligan gid ang mga lalaki sa ila pag-obra.+ Gintangdo nga magdumala sa ila ang mga Levinhon nga si Jahat kag si Obadias nga mga Merarinhon,+ kag si Zacarias kag si Mesulam nga mga Kohatnon.+ Ang mga Levinhon nga sampaton tanan nga musikero,+ 13  amo ang nagadumala sa mga trabahador* kag sa tanan nga nagahimo sang tanan nga sahi sang obra. Ang iban nga Levinhon nag-alagad bilang mga sekretaryo, mga opisyal, kag mga manugbantay sang gawang.+ 14  Samtang ginakuha nila ang kuarta nga gindala sa balay ni Jehova,+ nakita ni Hilkias nga saserdote ang libro sang Kasuguan ni Jehova+ nga ginhatag paagi kay* Moises.+ 15  Nagsiling si Hilkias kay Safan nga sekretaryo: “Nakita ko sa balay ni Jehova ang libro sang Kasuguan.” Ginhatag ni Hilkias kay Safan ang libro. 16  Dayon gindala ni Safan ang libro sa hari kag nagsiling sia sa iya: “Ginahimo sang imo mga alagad ang tanan nga ginapahimo sa ila. 17  Ginkuha na nila ang kuarta sa balay ni Jehova, kag ginhatag nila ini sa mga nagadumala sang ulubrahon kag sa mga trabahador.” 18  Ginsugiran man ni Safan nga sekretaryo ang hari: “May libro nga ginhatag sa akon si Hilkias nga saserdote.”+ Dayon ginbasa ini ni Safan sa hari.+ 19  Pagkabati sang hari sa mga pulong sang Kasuguan, gingisi niya ang iya bayo.+ 20  Dayon ginsugo sang hari si Hilkias, si Ahikam+ nga anak ni Safan, si Abdon nga anak ni Miqueas, si Safan nga sekretaryo, kag si Asaias nga alagad sang hari: 21  “Magpamangkot kamo kay Jehova para sa akon kag para sa mga nabilin sa Israel kag sa Juda tuhoy sa mga pulong sang libro nga nakit-an; kay daku gid ang kaakig ni Jehova sa aton bangod wala gintuman sang aton mga katigulangan ang ginsiling ni Jehova. Wala nila gintuman ang tanan nga nasulat sa sini nga libro.”+ 22  Gani si Hilkias upod ang mga ginsugo sang hari, nagkadto kay Hulda nga manalagna nga babayi.+ Asawa sia ni Sallum nga manug-atipan sang mga bayo nga anak ni Tikva nga anak ni Harhas. Nagaistar sadto si Hulda sa Jerusalem sa Ikaduha nga Distrito; kag nagpakighambal sila sa iya didto.+ 23  Nagsiling si Hulda sa ila: “Amo ini ang ginsiling ni Jehova nga Dios sang Israel, ‘Silinga ninyo ang tawo nga nagpakadto sa inyo sa akon: 24  “Amo ini ang ginsiling ni Jehova, ‘Laglagon ko ini nga lugar kag ang mga pumuluyo sini,+ kag pahanabuon ko ang tanan nga pagpakamalaut nga nasulat sa libro+ nga ginbasa nila sa hari sang Juda. 25  Bangod gintalikdan nila ako+ kag nagpaaso sila sing mga halad sa iban nga mga dios nga nagpaakig sa akon+ bangod sang tanan nga ginhimo nila, magadabdab ang akon kaakig batok sa sini nga lugar kag indi ini mag-ugdaw.’ ”+ 26  Apang tuhoy sa hari sang Juda nga nagsugo sa inyo nga mamangkot kay Jehova, amo ini ang isiling ninyo sa iya, “Amo ini ang ginsiling ni Jehova nga Dios sang Israel: ‘Tuhoy sa mga pulong nga nabatian mo,+ 27  bangod nangin mabinatunon* ang imo tagipusuon kag nagpaubos ka sa atubangan sang Dios sang mabatian mo ang ginsiling niya tuhoy sa sini nga lugar kag sa mga pumuluyo sini kag nagpaubos ka kag gingisi mo ang imo mga bayo kag naghibi ka sa atubangan ko, ginpamatian ko man ikaw,+ siling ni Jehova. 28  Gani mapatay ka pareho sang imo mga katigulangan, kag ilubong ka sa imo lulubngan sa tion nga may kalinong, kag indi mo makita ang kalaglagan nga himuon ko sa sini nga lugar kag sa mga pumuluyo sini.’ ” ’ ”+ Dayon ginsugid nila sa hari ini nga mensahe. 29  Gani nagpadala sing mensahe ang hari kag ginpatawag niya ang tanan nga gulang sang Juda kag sang Jerusalem.+ 30  Pagkatapos sini, nagkadto ang hari sa balay ni Jehova upod ang tanan nga lalaki sang Juda, ang mga pumuluyo sang Jerusalem, ang mga saserdote, ang mga Levinhon, ang tanan nga katawhan, bata kag tigulang. Ginbasa niya sa ila ang tanan nga pulong sa libro sang katipan nga nakita sa balay ni Jehova.+ 31  Nagpabilin nga nagatindog ang hari kag naghimo sia sing katipan*+ sa atubangan ni Jehova, nga sundon niya si Jehova kag tumanon niya ang iya mga sugo, ang iya mga pahanumdom, kag ang iya mga pagsulundan sa bug-os niya nga tagipusuon kag sa bug-os niya nga kalag,*+ kag tumanon niya ang mga pulong sang katipan nga nasulat sa sini nga libro.+ 32  Ginpalig-on man niya ang tanan sa Jerusalem kag sa Benjamin nga mag-ugyon sa sini. Kag ginhimo sang mga pumuluyo sang Jerusalem ang suno sa katipan sang Dios, ang Dios sang ila mga katigulangan.+ 33  Dayon ginkuha ni Josias ang tanan nga makangilil-ad nga butang* sa bug-os nga kadutaan sang mga Israelinhon,+ kag ginpaalagad niya kay Jehova nga ila Dios ang tanan sa Israel. Sa bug-os niya nga kabuhi,* gintuman nila si Jehova nga Dios sang ila mga katigulangan.

Footnote

Tan-awa ang Glossary.
Ukon “hinurma nga mga estatwa.”
Tan-awa ang Glossary.
Ukon “hinurma nga mga estatwa.”
Tan-awa ang Glossary.
Sa literal, “balay.”
Ukon “manugpas-an sing lulan.”
Sa literal, “paagi sa kamot ni.”
Sa literal, “mahumok.”
Ukon “nakigkatipan liwat.”
Tan-awa ang Glossary.
Ukon “mga diosdios.”
Sa literal, “Sa tanan niya nga mga adlaw.”