Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Biblia Online | BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

2 Cronica 32:1-33

BALAYAN SANG KAUNDAN

  • Senaquerib naglikop sa Jerusalem (1-8)

  • Senaquerib ginhangkat si Jehova (9-19)

  • Ginpatay sang anghel ang mga soldado sang Asiria (20-23)

  • Nagmasakit si Ezequias kag nangin matinaastaason (24-26)

  • Hinimuan ni Ezequias kag ang iya kamatayon (27-33)

32  Pagkatapos ginhimo ni Ezequias sing matutom ini nga mga butang,+ ginsalakay ni Hari Senaquerib sang Asiria ang Juda. Ginlikupan niya ang mga siudad nga may mabakod nga depensa, kay luyag gid niya nga sudlon ang mga pader sang siudad kag agawon ini.+  Sang makita ni Ezequias nga nagsalakay si Senaquerib kag tuyo niya nga magpakig-away sa Jerusalem,  nagdesisyon sia, pagkatapos niya mapamangkot ang iya mga pangulo kag mga soldado, nga punungan ang tubig halin sa mga tuburan sa gua sang siudad,+ kag ginbuligan nila sia.  Madamo nga tawo ang nagtipon kag ginpunungan nila ang tanan nga tuburan kag sapa nga nagailig sa sini nga kadutaan, kag nagsiling sila: “Indi naton luyag nga makakita diri sing madamo nga tubig ang mga hari sang Asiria kon mag-abot sila.”  Nagpakaisog sia kag ginpakay-o niya ang tanan nga guba nga pader kag ginpatindugan niya ini sing mga torre, kag nagpatindog man sia sing isa pa ka pader sa gua. Ginpakay-o man niya ang Bungyod*+ sang Siudad ni David, kag nagpahimo sia sing madamo nga armas kag mga taming.  Dayon nagtangdo sia sing mga pangulo sa mga soldado kag gintipon sila sa plasa malapit sa gawang sang siudad kag ginpalig-on niya sila:*  “Magpakaisog kamo kag magpakabakod. Indi kamo mahadlok sa hari sang Asiria+ kag sa upod niya nga kadam-an, kay mas madamo ang kaupod naton sangsa kaupod niya.+  Nagasalig sia sa kusog sang tawo,* apang nagasalig kita kay Jehova nga aton Dios nga magabulig sa aton kag magapakig-away para sa aton.”+ Napalig-on ang katawhan sa ginsiling ni Hari Ezequias sang Juda.+  Pagkatapos sini, samtang didto sa Laquis si Hari Senaquerib sang Asiria+ kag kaupod niya ang tanan nga puersa sang iya emperyo,* ginpakadto niya ang iya mga alagad sa Jerusalem kay Hari Ezequias sang Juda kag sa tanan nga taga-Judea sa Jerusalem,+ kag nagsiling sila: 10  “Amo ini ang ginsiling ni Hari Senaquerib sang Asiria, ‘Ano gid ang ginasaligan ninyo nga nagapabilin pa kamo sa Jerusalem bisan ginalikupan na kamo?+ 11  Indi ayhan nga ginatunto lang kamo ni Ezequias agod mapatay kamo sa gutom kag kauhaw, sa pagsiling niya: “Luwason kita ni Jehova nga aton Dios sa hari sang Asiria”?+ 12  Indi bala nga si Ezequias mismo ang nagguba sang sagrado nga mataas nga mga duog sang inyo Dios+ kag sang Iya mga halaran,+ dayon nagsiling sia sa Juda kag sa Jerusalem: “Magyaub kamo sa isa lang ka halaran kag magpaaso kamo sang inyo mga halad sa sini”?+ 13  Wala bala kamo makahibalo sang ginhimo ko kag sang akon mga katigulangan sa tanan nga katawhan sang kadutaan?+ Naluwas bala sang mga dios sang mga pungsod sini nga kadutaan ang ila duta sa akon kamot?+ 14  Sin-o sa tanan nga dios sining mga pungsod nga ginlaglag sang akon mga katigulangan ang nakaluwas sa iya katawhan sa akon kamot, amo nga maluwas kamo sang inyo Dios sa akon kamot?+ 15  Indi kamo magpadaya ukon magpatunto kay Ezequias!+ Indi kamo magpati sa iya, kay wala sing dios sang bisan ano nga pungsod ukon ginharian ang nakaluwas sang iya katawhan sa akon kamot kag sa kamot sang akon mga katigulangan. Gani, indi gid kamo maluwas sang inyo Dios sa akon kamot!’ ”+ 16  Ginyaguta pa gid sang mga alagad ni Senaquerib si Jehova nga matuod nga Dios kag si Ezequias nga iya alagad. 17  Nagpadala man sia sing mga sulat+ agod insultuhon si Jehova nga Dios sang Israel+ kag pakalainon sia, nga nagasiling: “Kon ang mga dios sang mga pungsod sini nga kadutaan wala gani makaluwas sa ila katawhan sa akon kamot,+ indi man maluwas sang Dios ni Ezequias ang iya katawhan sa akon kamot.” 18  Padayon sila nga naghambal sing mabaskog sa lenguahe sang mga Judiyo agod mahadlok kag makugmat ang katawhan sang Jerusalem nga yara sa ibabaw sang pader, kag agod masakop nila ang siudad.+ 19  Ginyaguta nila ang Dios sang Jerusalem pareho sang pagyaguta nila sa mga dios sang mga katawhan sang duta, nga ginhimo lang sang tawo. 20  Apang si Hari Ezequias kag si manalagna Isaias+ nga anak ni Amoz padayon nga nagpangamuyo kag nagpangayo sing bulig sa Dios sa langit.+ 21  Dayon nagpadala si Jehova sing isa ka anghel kag ginpatay ang tanan nga isganan nga soldado,+ lider, kag pangulo sang mga soldado sang hari sang Asiria, gani nagbalik sia sa iya duta nga nahuy-an. Sang ulihi, nagsulod sia sa balay* sang iya dios, kag ginpatay sia sang iya mismo mga anak paagi sa espada.+ 22  Gani ginluwas ni Jehova si Ezequias kag ang mga pumuluyo sang Jerusalem sa kamot ni Hari Senaquerib sang Asiria kag sa kamot sang iban pa kag ginhatagan niya sila sing kalinong sa tanan nila nga kaaway sa palibot. 23  Madamo ang nagdala sing mga dulot para kay Jehova sa Jerusalem kag sing malahalon nga mga regalo kay Hari Ezequias sang Juda,+ kag pagkatapos sini, nangin dungganon sia sa tanan nga pungsod. 24  Sadto nga tion, nagmasakit si Ezequias kag daw mapatay na sia. Nagpangamuyo sia kay Jehova,+ kag ginsabat sia kag ginhatagan sing tanda.*+ 25  Apang wala gin-apresyar ni Ezequias ang tanan nga ginhimo sa iya nga maayo, kay nangin matinaastaason ang iya tagipusuon, gani naakig ang Dios sa iya kag sa Juda kag sa Jerusalem. 26  Apang si Ezequias nagpaubos sang iya matinaastaason nga tagipusuon+ kag nagpaubos man ang mga pumuluyo sang Jerusalem, gani wala ginpadapat ni Jehova ang iya kaakig sa ila sang panahon ni Ezequias.+ 27  Nangin manggaranon kag dungganon+ gid si Ezequias. Nagpahimo sia sing mga bodega+ para sa mga pilak, bulawan, malahalon nga mga bato, lana sang balsamo, mga taming, kag para sa tanan nga malahalon nga mga gamit. 28  Nagpahimo man sia sing mga bodega para sa patubas nga mga uyas kag bag-o nga alak kag lana, kag sing mga kuadra para sa tanan nga sahi sang sapat kag sing mga kuadra para sa mga panong. 29  Nagtukod man sia sing mga siudad, kag nagdamo ang iya mga sapat, mga karnero, kag mga baka, kay ginhatagan sia sang Dios sing madamo gid nga pagkabutang. 30  Si Ezequias ang nagpunong sang ililigan sang tubig+ sa naibabaw nga bahin sang Gihon+ kag ginpalikaw niya ini pakatundan pakadto sa Siudad ni David.+ Nagmadinalag-on si Ezequias sa tanan niya nga ginhimo. 31  Apang, sang ginpakadto sa iya sang mga pangulo sang Babilonia ang ila mga tiglawas agod mamangkot tuhoy sa tanda*+ nga natabo sa kadutaan,+ ginpabay-an sia sang matuod nga Dios agod tilawan sia,+ kag agod mahibaluan kon ano ang yara sa iya tagipusuon.+ 32  Tuhoy sa iban pa nga natabo sa kabuhi ni Ezequias kag ang mga buhat sang iya mainunungon nga gugma,+ nasulat ini sa palanan-awon ni Isaias+ nga manalagna nga anak ni Amoz, sa Libro sang mga Hari sang Juda kag sang Israel.+ 33  Sang ulihi, napatay si Ezequias kag ginlubong upod sa iya mga katigulangan. Ginlubong sia sa banglid pakadto sa lulubngan sang mga anak ni David.+ Ginpadunggan sia sang bug-os nga Juda kag sang mga pumuluyo sang Jerusalem sang mapatay sia. Si Manases nga iya anak amo ang nagbulos sa iya bilang hari.

Footnote

Ukon “Millo.” Isa ka Hebreo nga termino nga nagakahulugan “tinampok.”
Sa literal, “kag naghambal sia sa ila tagipusuon.”
Sa literal, “butkon nga unod.”
Ukon “tanan niya nga puersa militar kag pagkahalangdon.”
Ukon “templo.”
Ukon “palatandaan.”
Ukon “palatandaan.”