Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

2 Cronica 26:1-23

BALAYAN SANG KAUNDAN

  • Si Uzias, hari sang Juda (1-5)

  • Mga kadalag-an ni Uzias (6-15)

  • Si Uzias nangin aruon (16-21)

  • Kamatayon ni Uzias (22, 23)

26  Dayon ginhimo nga hari sang tanan nga katawhan sang Juda si Uzias*+ nga nagaedad sing 16 ka tuig. Sia ang nagbulos sa iya amay nga si Amazias.+  Gintukod niya liwat ang Elot+ kag ginbalik ini sa Juda sa tapos mapatay ang hari* kag ginlubong upod sa iya mga katigulangan.+  Nagaedad si Uzias+ sing 16 ka tuig sang nangin hari sia, kag naggahom sia sa Jerusalem sing 52 ka tuig. Ang iya iloy amo si Jecolias nga taga-Jerusalem.+  Ginhimo niya ang matarong sa panulok ni Jehova, pareho sang ginhimo sang iya amay nga si Amazias.+  Nagdangop sia sa Dios sang panahon ni Zacarias nga amo ang nagtudlo sa iya nga magkahadlok sa matuod nga Dios. Samtang nagadangop sia kay Jehova, ginpakamaayo sia sang matuod nga Dios.+  Nagpakig-away sia sa mga Filistinhon+ kag ginrumpag niya ang mga pader sang Gat,+ sang Jabne,+ kag sang Asdod.+ Dayon nagtukod sia sing mga siudad sa teritoryo sang Asdod kag sang mga Filistinhon.  Ginbuligan sia sang matuod nga Dios nga mapierde ang mga Filistinhon, ang mga Arabianhon+ nga nagaistar sa Gurbaal, kag ang mga Meunim.  Naghatag sing buhis ang mga Ammonhon+ kay Uzias. Sang ulihi, nangin bantog sia tubtob sa Egipto, kay nangin gamhanan gid sia.  Nagpatindog man si Uzias sing mga torre+ sa Jerusalem sa Pamusod nga Gawang,+ sa Gawang sang Nalupyakan,+ kag sa Pamakod sang Pader, kag ginpabakod niya ini. 10  Nagpatindog pa gid sia sing mga torre+ sa kamingawan kag nagkutkot* sing madamo nga bubon (kay kadamo gid sang iya kasapatan). Ginhimo man niya ini sa Sepela kag sa patag. Maluyagon sia magpanguma, gani may mga mangunguma sia kag mga manug-atipan sang ulubasan sa mga bukid kag sa Carmel. 11  May mga soldado man si Uzias nga handa sa pagpakig-away. Nagrupogrupo sila subong mga tropa kon nagapakig-away sila. Gin-isip sila kag ginrehistro+ ni Jeiel nga sekretaryo+ kag ni Maaseias nga opisyal, sa idalom sang pagdumala ni Hananias nga isa sa mga pangulo sang hari. 12  Ang kadamuon sang mga pangulo sang ila mga panimalay nga nagadumala sa isganan nga mga soldado, 2,600 tanan. 13  Ang kadamuon sang mga soldado nga ginadumalahan nila, 307,500 ka isganan nga mga lalaki nga handa sa pagpakig-away agod buligan ang hari batok sa ila kaaway.+ 14  Ginhatagan ni Uzias sing mga taming, bangkaw,+ helmet, panagang sa lawas,+ pana, kag labyog+ ang tanan nga soldado. 15  Nagpahimo man sia sa hanas nga mga manug-obra sa Jerusalem sing mga armas agod gamiton sa pagpana sing mga baslay kag sa paghaboy sing dalagku nga mga bato halin sa mga torre+ kag mga pamusod sang pader. Gani nangin bantog sia tubtob sa malayo nga mga lugar, kay ginbuligan sia sang Dios kag nangin mabakod sia. 16  Apang, sang mabakod na sia, nangin matinaastaason ang iya tagipusuon kag nakahalit ini sa iya. Nangin indi sia matutom kay Jehova nga iya Dios kay nagsulod sia sa templo ni Jehova agod magsunog sing incienso sa halaran sang incienso.+ 17  Ginsundan sia dayon ni Azarias nga saserdote kag sang 80 ka maisog nga mga saserdote ni Jehova. 18  Gin-atubang nila si Hari Uzias kag ginsilingan sia: “Uzias, indi nagakadapat sa imo nga magsunog sing incienso para kay Jehova!+ Ang mga saserdote lamang nga mga kaliwat ni Aaron ang dapat magsunog sing incienso+ kay ginpakabalaan sila. Maggua ka sa santuaryo, kay nangin indi ka matutom sa ginhimo mo, kag indi ka pagpadunggan ni Jehova nga Dios bangod sini.” 19  Apang naakig+ si Uzias sa mga saserdote. Samtang ginauyatan niya ang incensario para sa pagsunog sing incienso kag akig sia sa mga saserdote, gintubuan sia sing aro+ sa iya agtang sa atubangan sang mga saserdote malapit sa halaran sang incienso sa balay ni Jehova. 20  Nakita ni Azarias nga puno nga saserdote kag sang tanan nga saserdote nga gintubuan sia sing aro sa iya agtang! Gani dalidali nga ginpagua nila sia, kag naggua sia dayon, bangod ginhalitan sia ni Jehova. 21  Nangin aruon si Hari Uzias tubtob napatay sia. Nag-istar sia sa lain nga balay nga isa ka aruon+ kag wala na sia ginpasulod sa balay ni Jehova. Si Jotam nga iya anak amo ang nagadumala sa balay* sang hari kag nagahukom sa katawhan.+ 22  Ang iban pa nga natabo sa kabuhi ni Uzias, halin sa umpisa tubtob sa katapusan, ginsulat sang manalagna nga si Isaias+ nga anak ni Amoz. 23  Sang ulihi, napatay si Uzias pareho sang iya mga katigulangan, kag ginlubong nila sia upod sa iya mga katigulangan, apang ang iya lulubngan yara sa gua sang lulubngan sang mga hari, kay nagsiling sila: “Aruon sia.” Si Jotam+ nga iya anak amo ang nagbulos sa iya bilang hari.

Footnote

“Azarias” sa 2Ha 14:21.
Ang iya amay nga si Amazias.
Mahimo nga nagkutkot sa bato.
Ukon “palasyo.”