Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Biblia Online | BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

2 Cronica 25:1-28

BALAYAN SANG KAUNDAN

  • Si Amazias, hari sang Juda (1-4)

  • Inaway batok sa Edom (5-13)

  • Si Amazias nagsimba sa mga dios (14-16)

  • Nakig-away kay Hari Jehoas (17-24)

  • Kamatayon ni Amazias (25-28)

25  Nagaedad si Amazias sing 25 ka tuig sang nangin hari sia, kag naggahom sia sa Jerusalem sing 29 ka tuig. Ang iya iloy amo si Jehoadan nga taga-Jerusalem.+  Ginhimo niya ang matarong sa panulok ni Jehova, apang indi sing bug-os tagipusuon.  Sang mabakod na ang iya paggahom sa iya ginharian, ginpamatay niya ang iya mga alagad nga nagpatay sa iya amay nga hari.+  Apang wala niya ginpatay ang ila mga anak, kay ginsunod niya ang ginsugo ni Jehova nga nasulat sa libro sang Kasuguan ni Moises: “Indi pagpatyon ang mga amay tungod sa sala sang ila mga anak, kag indi pagpatyon ang mga anak tungod sa sala sang ila mga amay; kundi ang kada isa patyon bangod sang iya kaugalingon nga sala.”+  Gintipon ni Amazias ang Juda kag gingrupo niya sila suno sa ila panimalay, suno sa mga pangulo sang linibo kag mga pangulo sang ginatos sang bug-os nga Juda kag Benjamin.+ Ginrehistro niya ang nagaedad sing 20 ka tuig pataas,+ kag ang ila kadamuon 300,000 ka hanas* nga mga soldado nga sagad maggamit sing mga bangkaw kag daku nga taming.  Nagsuhol man sia sing 100 ka talanton* nga pilak sa 100,000 ka isganan nga soldado halin sa Israel.  Apang nagkadto sa iya ang isa ka alagad sang matuod nga Dios kag nagsiling: “O hari, indi pagpaupda sa imo ang mga soldado sang Israel, bangod si Jehova wala nagaupod sa Israel+ ukon kay bisan sin-o nga Efraimnon.  Ikaw na lang ang maglakat, kag magpakaisog ka sa pagpakig-away. Ang matuod nga Dios may gahom sa pagbulig+ sa imo, apang mahimo man niya pahanabuon nga mapierde ka sang imo kaaway.”  Bangod sini, nagsiling si Amazias sa alagad sang matuod nga Dios: “Paano na lang kay nakabayad na ako sing 100 ka talanton sa mga soldado sang Israel?” Nagsabat ang alagad sang matuod nga Dios: “Sobra pa sa sina ang mahatag sa imo ni Jehova.”+ 10  Gani ginpabalik ni Amazias sa ila lugar ang nag-upod sa iya nga mga soldado halin sa Efraim. Apang naakig gid sila sa Juda, gani akig sila nga nagbalik sa ila lugar. 11  Nagpakaisog si Amazias kag ginpangunahan niya ang iya mga soldado sa pagkadto sa Nalupyakan sang Asin,+ kag ginpamatay niya ang 10,000 sa katawhan sang Seir.+ 12  Nabihag nga buhi sang mga soldado sang Juda ang 10,000 sa ila. Dayon gindala nila sila sa pil-as kag ginhulog, kag nagkaladugmok sila tanan. 13  Apang ang mga soldado nga ginpabalik kag wala ginpaupod ni Amazias sa inaway+ nagsalakay sa mga siudad sang Juda, halin sa Samaria+ tubtob sa Bet-horon.+ Ginpamatay nila ang 3,000 ka tawo kag madamo nga pagkabutang ang ila ginpanguha. 14  Apang pagbalik ni Amazias halin sa pagpamatay sa mga Edominhon, gindala niya ang mga dios sang katawhan sang Seir kag ginhimo ini nga iya mga dios.+ Nagyaub sia kag nagpaaso sing mga halad sa atubangan sini. 15  Gani naakig gid si Jehova kay Amazias, kag nagpadala sia sing manalagna nga nagsiling sa iya: “Ngaa nagasimba ka sa mga dios sang katawhan nga wala gani makaluwas sang ila katawhan batok sa imo?”+ 16  Samtang nagahambal pa sia, nagsiling ang hari: “Gintangdo ka bala namon nga manuglaygay sang hari?+ Maghipos ka!+ Luyag mo bala nga patyon ka nila?” Gani naghipos ang manalagna, apang nagsiling sia anay: “Nahibaluan ko nga nagpamat-od ang Dios nga laglagon ka, bangod ginhimo mo ini kag wala ka magpamati sa akon laygay.”+ 17  Sa tapos magpakighambal si Hari Amazias sang Juda sa iya mga manuglaygay, nagpadala sia sing mensahe kay Jehoas nga anak ni Jehoahaz nga anak ni Jehu nga hari sang Israel: “Mag-away* kita.”+ 18  Si Hari Jehoas sang Israel nagpadala sini nga mensahe kay Hari Amazias sang Juda: “Ang tunukon nga tanom sa Lebanon nagpadala sing mensahe sa kahoy nga sedro sa Lebanon, ‘Ipaasawa ang imo anak sa akon anak.’ Apang, nag-agi ang ilahas nga sapat sang Lebanon kag gintasak ang tunukon nga tanom. 19  Nagsiling ka, ‘Napierde ko* ang Edom.’+ Gani nagpabugal ka agod dayawon ka. Apang magpahimunong ka na lang sa imo balay.* Ngaa nagapangita ka pa sing gamo kay mapierde ka man lang kag ang Juda?” 20  Apang wala magpamati si Amazias,+ kay ginpahanabo ini sang matuod nga Dios agod itugyan sila sa ila kaaway,+ bangod nagsimba sila sa mga dios sang Edom.+ 21  Gani nagsalakay si Hari Jehoas sang Israel kag nag-away sila ni Hari Amazias sang Juda sa Bet-semes+ nga sakop sang Juda. 22  Napierde sang Israel ang Juda, gani nagpalagyo ang kada isa sa ila kag nagpauli sa iya balay.* 23  Nabihag ni Hari Jehoas sang Israel sa Bet-semes si Hari Amazias sang Juda nga anak ni Jehoas nga anak ni Jehoahaz.* Dayon gindala sia ni Jehoas sa Jerusalem kag ginrumpag niya ang pader sang Jerusalem halin sa Gawang sang Efraim+ tubtob sa Pamusod nga Gawang,+ nga 400 ka maniko* ang kalabaon. 24  Ginpanguha niya ang tanan nga bulawan kag pilak, kag ang tanan nga gamit nga ginabantayan ni Obed-edom sa balay sang matuod nga Dios kag sa mga bahandian sa balay* sang hari,+ pati ang mga bihag. Dayon nagbalik sia sa Samaria. 25  Nagkabuhi pa sing 15 ka tuig si Amazias+ nga anak ni Jehoas nga hari sang Juda sa tapos mapatay si Jehoas+ nga anak ni Jehoahaz nga hari sang Israel.+ 26  Tuhoy sa iban pa nga natabo sa kabuhi ni Amazias, halin sa umpisa tubtob sa katapusan, indi bala nga nasulat ini sa Libro sang mga Hari sang Juda kag sang Israel? 27  Sugod sang tion nga wala na magsunod si Amazias kay Jehova, naghimbon+ sila batok sa iya sa Jerusalem, gani nagpalagyo sia sa Laquis. Apang nagpadala sila sing mga tinawo agod lagson sia sa Laquis kag ginpatay nila sia didto. 28  Gani ginkarga nila ang iya bangkay sa mga kabayo kag ginlubong sia upod sa iya mga katigulangan sa siudad sang Juda.

Footnote

Sa literal, “pinili.”
Ang isa ka talanton katumbas sang 34.2 ka kilo. Tan-awa ang Apendise B14.
Ukon “Mag-atubangay kita.”
Sa literal, “mo.”
Ukon “palasyo.”
Sa literal, “tolda.”
Ginatawag man nga Ahazias.
Mga 178 ka metro (584 ka pie). Tan-awa ang Apendise B14.
Ukon “palasyo.”