Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Biblia Online | BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

2 Cronica 22:1-12

BALAYAN SANG KAUNDAN

  • Si Ahazias, hari sang Juda (1-9)

  • Gin-agaw ni Atalia ang trono (10-12)

22  Dayon ang iya kamanghuran nga anak nga si Ahazias* amo ang ginbulos sa iya sang mga pumuluyo sang Jerusalem bilang hari, kay ginpatay sang mga tulisan nga kaupod sang mga Arabianhon ang tanan niya nga magulang sang ginsalakay nila ang kampo.+ Gani si Ahazias nga anak ni Jehoram amo ang naghari sa Juda.+  Nagaedad si Ahazias sing 22 ka tuig sang nangin hari sia, kag naggahom sia sa Jerusalem sing isa ka tuig. Ang iya iloy amo si Atalia+ nga apo* ni Omri.+  Ginsunod man niya ang dalanon sang panimalay ni Ahab,+ kay ang iya iloy amo ang iya manuglaygay sa paghimo sing malain.  Ginhimo niya ang malain sa panulok ni Jehova pareho sa ginhimo sang panimalay ni Ahab, kay sang mapatay ang iya amay sila ang nangin manuglaygay niya, kag nagdul-ong ini sa iya kalaglagan.  Ginsunod niya ang ila laygay kag nag-upod sia kay Jehoram nga anak ni Hari Ahab sang Israel sa pagpakig-away kay Hari Hazael+ sang Siria sa Ramot-Gilead,+ diin napilasan si Jehoram sang mga manugpana.  Bangod napilasan si Jehoram sang nagpakig-away sia kay Hari Hazael sang Siria+ sa Rama, nagbalik sia sa Jezreel+ agod magpaayo sang iya mga pilas. Nagkadto sa Jezreel si Ahazias* nga anak ni Jehoram+ nga hari sang Juda agod duawon si Jehoram+ nga anak ni Ahab, bangod napilasan* sia.+  Apang ginpahanabo sang Dios ang kalaglagan ni Ahazias sang nagkadto sia kay Jehoram. Pag-abot niya didto, nag-upod sia kay Jehoram sa pagsugata kay Jehu+ nga apo* ni Nimsi, nga gintangdo ni Jehova sa paglaglag sa panimalay ni Ahab.+  Sang ginsugdan ni Jehu ang paghukom sa panimalay ni Ahab, nakita niya ang mga pangulo sang Juda kag ang mga anak sang mga utod ni Ahazias, nga amo ang mga alagad ni Ahazias, kag ginpamatay niya sila.+  Dayon ginpangita niya si Ahazias; nadakpan nila sia sa iya ginapanaguan sa Samaria, kag gindala nila sia kay Jehu. Dayon ginpatay nila sia kag ginlubong,+ kay nagsiling sila: “Apo sia ni Jehosapat nga nagpangita kay Jehova sing bug-os tagipusuon.”+ Wala na sing bisan isa sa panimalay ni Ahazias ang may ikasarang sa paggahom sa ginharian. 10  Sang mahibaluan ni Atalia+ nga iloy ni Ahazias nga napatay ang iya anak, ginpamatay niya ang tanan nga kaliwat sang hari sa panimalay ni Juda.+ 11  Apang ginkawat ni Jehosabet, nga anak nga babayi sang hari, si Jehoas+ nga anak ni Ahazias sa mga anak sang hari nga palatyon, kag gintago niya sia upod sa iya yaya sa isa ka kuarto. Gintago sia ni Jehosabet nga anak ni Hari Jehoram+ (asawa sia ni Jehoiada+ nga saserdote kag utod ni Ahazias) kay Atalia, gani wala niya sia mapatay.+ 12  Nagpanago si Jehoas upod sa ila sa balay sang matuod nga Dios sing anom ka tuig, samtang si Atalia ang nagagahom bilang rayna.

Footnote

“Jehoahaz” sa 21:17.
Sa literal, “anak nga babayi.”
“Azarias” sa iban nga Hebreo nga mga manuskrito.
Ukon “nagamasakit.”
Sa literal, “anak nga lalaki.”