Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

2 Cronica 21:1-20

BALAYAN SANG KAUNDAN

  • Si Jehoram, hari sang Juda (1-11)

  • Mensahe halin kay Elias (12-15)

  • Malain ang nadangatan ni Jehoram (16-20)

21  Sang ulihi, napatay si Jehosapat pareho sang iya mga katigulangan kag ginlubong sia upod sa iya mga katigulangan sa Siudad ni David. Si Jehoram nga iya anak amo ang nagbulos sa iya bilang hari.+  Ang iya mga utod nga lalaki nga mga anak ni Jehosapat amo si Azarias, si Jehiel, si Zacarias, si Azarias, si Miguel, kag si Sepatias. Tanan sila mga anak ni Hari Jehosapat sang Israel.  Ginhatagan sila sang ila amay sing madamo nga regalo nga pilak, bulawan, kag malahalon nga mga regalo, lakip ang mga siudad nga may mabakod nga depensa sa Juda.+ Apang ang ginharian ginhatag niya kay Jehoram+ bangod sia ang panganay.  Sang naghari na si Jehoram sa ginharian sang iya amay, ginpabakod niya ang iya paggahom, paagi sa pagpatay sa tanan niya nga utod+ paagi sa espada, pati ang pila ka pangulo sang Israel.  Nagaedad si Jehoram sing 32 ka tuig sang nangin hari sia, kag naggahom sia sa Jerusalem sing walo ka tuig.+  Ginhimo man niya ang ginhimo sang mga hari sang Israel,+ pareho sang ginhimo sang panimalay ni Ahab, kay nangin asawa niya ang anak ni Ahab.+ Kag ginhimo niya ang malain sa panulok ni Jehova.  Apang indi luyag ni Jehova nga malaglag ang panimalay ni David tungod sa katipan nga ginhimo niya kay David,+ kay nagsaad sia sa iya nga sia kag ang iya mga anak padayon nga magahari.*+  Sang panahon ni Jehoram, nagrebelde ang Edom batok sa Juda,+ kag nagpili sila sang ila hari.+  Gani nagkadto didto si Jehoram upod ang mga kumander sang iya mga soldado kag ang tanan niya nga kangga. Pagkagab-i, nagsalakay sia kag napierde niya ang mga Edominhon nga nagalibot sa iya kag sa mga kumander sang mga kangga. 10  Apang nagarebelde gihapon ang Edom batok sa Juda tubtob sini nga adlaw. Sadto nga tion, nagrebelde man sa iya ang Libna,+ bangod ginbayaan niya si Jehova nga Dios sang iya mga katigulangan.+ 11  Naghimo man sia sing sagrado nga mataas nga mga duog+ sa kabukiran sang Juda nga ginbangdan sang espirituwal nga pagpakighilawas sang mga pumuluyo sang Jerusalem, kag agod mapatalang niya ang Juda. 12  Sang ulihi, nakabaton sia sing sulat halin kay Elias+ nga manalagna, nga nagasiling: “Amo ini ang ginsiling ni Jehova nga Dios ni David nga imo katigulangan, ‘Wala mo ginsunod ang dalanon ni Jehosapat+ nga imo amay ukon ang dalanon ni Hari Asa+ sang Juda. 13  Kundi ginsunod mo ang dalanon sang mga hari sang Israel+ kag nangin kabangdanan ka sang espirituwal nga pagpakighilawas+ sang Juda kag sang mga pumuluyo sang Jerusalem pareho sang espirituwal nga pagpakighilawas sang panimalay ni Ahab,+ kag ginpatay mo pa gani ang imo mga utod+ sa panimalay sang imo amay, nga mas maayo sangsa imo. 14  Gani halitan ni Jehova ang imo katawhan, ang imo mga anak, ang imo mga asawa, kag ang tanan mo nga pagkabutang. 15  Magaantos ka sing madamo nga balatian, lakip ang balatian sa tinai. Kada adlaw, magalubha ang imo balatian tubtob nga maggua ang imo mga tinai.’ ” 16  Dayon ginpaakig ni Jehova+ batok kay Jehoram ang mga Filistinhon*+ kag ang mga Arabianhon+ nga nagaistar malapit sa mga Etiopianhon. 17  Gani ginsalakay nila ang Juda kag ginsulod ini, kag ginkuha nila ang tanan nga pagkabutang sa balay* sang hari,+ kag ginbihag nila ang iya mga anak kag mga asawa. Ang nabilin lang niya nga anak amo ang kamanghuran nga si Jehoahaz.*+ 18  Pagkatapos sini tanan, ginhatagan ni Jehova si Jehoram sing balatian sa tinai nga wala nagaayo.+ 19  Sang ulihi, pagligad sang duha ka tuig, naggua ang iya mga tinai bangod sang iya balatian, kag napatay sia nga nagaantos sini nga balatian. Wala magdabok sing kalayo ang iya katawhan sa pagpadungog sa iya pareho sang ginhimo nga pagdabok sing kalayo sa pagpadungog sa iya mga katigulangan.+ 20  Nagaedad sia sing 32 ka tuig sang nangin hari sia, kag naggahom sia sa Jerusalem sing walo ka tuig. Wala gid sing tawo nga nasubuan sang mapatay sia. Gani ginlubong nila sia sa Siudad ni David,+ apang indi sa lulubngan sang mga hari.+

Footnote

Sa literal, “nga hatagan sia pirme kag ang iya mga anak sing suga.”
Sa literal, “ang espiritu sang mga Filistinhon.”
Ukon “palasyo.”
Ginatawag man nga Ahazias.