Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

2 Cronica 17:1-19

BALAYAN SANG KAUNDAN

  • Si Jehosapat, hari sang Juda (1-6)

  • Kampanya sa pagpanudlo (7-9)

  • Ang mga soldado ni Jehosapat (10-19)

17  Si Jehosapat+ nga iya anak amo ang nagbulos sa iya bilang hari, kag ginlig-on niya ang iya paggahom sa Israel.  Nagbutang sia sing mga soldado sa tanan nga siudad nga may mabakod nga depensa sa Juda. Nagbutang man sia sing mga garison sa duta sang Juda kag sa mga siudad sang Efraim nga nasakop ni Asa nga iya amay.+  Padayon nga nag-upod si Jehova kay Jehosapat bangod ginhimo niya ang ginhimo sang una sang iya katigulangan nga si David+ kag wala sia magdangop sa mga Baal.  Kay ginpangita niya ang Dios sang iya amay+ kag ginsunod ang* iya sugo, indi pareho sa ginahimo sang Israel.+  Padayon nga ginlig-on ni Jehova ang ginharian ni Jehosapat;+ kag padayon nga nagahatag sing mga regalo sa iya ang bug-os nga Juda, gani nagdamo ang iya manggad kag nangin dungganon gid sia.+  Nangin maisog sia sa pagsunod sa mga dalanon ni Jehova, kag ginguba niya ang sagrado nga mataas nga mga duog+ kag ang sagrado nga mga poste*+ sa Juda.  Sang ikatlo nga tuig sang iya paghari, ginpatawag niya ang iya mga pangulo, nga si Ben-hail, si Obadias, si Zacarias, si Netanel, kag si Micaya, agod magpanudlo sa mga siudad sang Juda.  Nag-upod sa ila ang mga Levinhon nga si Semaias, si Netanias, si Zebadias, si Asahel, si Semiramot, si Jehonatan, si Adonias, si Tobija, kag si Tob-adonias, kag ang mga saserdote nga si Elisama kag si Jehoram.+  Nagpanudlo sila sa Juda dala ang libro sang Kasuguan ni Jehova,+ kag naglibot sila sa tanan nga siudad sang Juda kag gintudluan nila ang katawhan. 10  Hinadlukan gid ang tanan nga ginharian sa kadutaan sa palibot sang Juda bangod kay Jehova, gani wala sila magpakig-away kay Jehosapat. 11  Nagdala ang mga Filistinhon kay Jehosapat sing mga regalo kag kuarta bilang buhis. Nagdala man ang mga Arabianhon sa iya sing 7,700 ka karnero nga lalaki kag 7,700 ka kanding nga lalaki. 12  Nag-uswag kag nangin gamhanan pa gid si Jehosapat.+ Nagpatindog sia sing mabakod nga mga kuta+ kag ginhimo niya nga bodega ang pila ka siudad+ sa Juda. 13  Madamo gid sia sing ginhimo sa mga siudad sang Juda, kag nagbutang sia sing isganan nga mga soldado sa Jerusalem. 14  Gingrupo sila suno sa ila panimalay: halin sa Juda, sa mga pangulo sang linibo, si Adnah nga pangulo, kag kaupod niya ang 300,000 ka isganan nga mga soldado.+ 15  Ginadumalahan niya si Jehohanan nga pangulo, kag upod niya ang 280,000. 16  Ginadumalahan man niya si Amasias nga anak ni Zikri nga nag-alagad kay Jehova sing kinabubut-on, kag upod niya ang 200,000 ka isganan nga mga soldado. 17  Halin sa Benjamin,+ amo si Eliada nga isganan nga soldado, kag upod niya ang 200,000 ka lalaki nga may pana kag taming.+ 18  Ginadumalahan niya si Jehozabad, kag upod niya ang 180,000 ka soldado. 19  Sila ang nagaalagad sa hari wala labot sa mga ginbutang sang hari sa mga siudad nga may mabakod nga depensa sa bug-os nga Juda.+

Footnote

Sa literal, “kag naglakat sa.”
Tan-awa ang Glossary.