Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

2 Cronica 13:1-22

BALAYAN SANG KAUNDAN

  • Si Abias, hari sang Juda (1-22)

    • Napierde ni Abias si Jeroboam (3-20)

13  Sang ika-18 nga tuig sang paggahom ni Hari Jeroboam, nangin hari si Abias sa Juda.+  Naghari sia sa Jerusalem sing tatlo ka tuig. Ang iya iloy amo si Micaya*+ nga anak ni Uriel nga taga-Gibea.+ Kag may inaway sadto sa tunga ni Abias kag ni Jeroboam.+  Nagpakig-away si Abias upod ang 400,000 ka hanas* kag isganan nga mga soldado.+ Naghanda man si Jeroboam sa pagpakig-away sa iya upod ang 800,000 ka hanas* kag isganan nga mga soldado.  Nagtindog si Abias sa Bukid Zemaraim sa kabukiran sang Efraim, kag nagsiling sia: “Pamatii ninyo ako, Jeroboam kag bug-os nga Israel.  Wala bala kamo makahibalo nga si Jehova nga Dios sang Israel ang naghatag sang ginharian sang Israel kay David kag sa iya mga anak sing dayon,+ paagi sa isa ka permanente nga katipan?*+  Apang nagrebelde sa iya ginuo si Jeroboam+ nga anak ni Nebat, nga alagad ni Solomon nga anak ni David.+  Kag nag-upod sa iya ang wala sing obra kag wala sing pulos nga mga tawo. Kag nagmadinalag-on sila sa ila pagrebelde kay Rehoboam nga anak ni Solomon, kay lamharon pa kag mahuyang si Rehoboam, gani indi sia makasarang sa ila.  “Kag karon, nagahunahuna kamo nga masarangan ninyo ang ginharian ni Jehova nga ginagamhan sang mga anak ni David, bangod madamo kamo kag yara sa inyo ang mga dios nga bulawan nga mga tinday nga baka nga ginhimo ni Jeroboam para sa inyo.+  Indi bala nga ginpahalin ninyo ang mga saserdote ni Jehova,+ ang mga kaliwat ni Aaron, kag ang mga Levinhon, kag nagtangdo kamo sang inyo kaugalingon nga mga saserdote pareho sa ginahimo sang katawhan sang iban nga kadutaan?+ Ang bisan sin-o nga nagakadto nga may dala nga* isa ka torite nga baka kag pito ka karnero nga lalaki mahimo na mangin saserdote sang indi mga dios. 10  Apang para sa amon, si Jehova ang amon Dios,+ kag wala namon sia gintalikdan. Ang amon mga saserdote nga mga kaliwat ni Aaron nagaalagad kay Jehova kag ginabuligan sila sang mga Levinhon. 11  Nagapaaso sila sing mga dulot nga sinunog para kay Jehova kada aga kag kada gab-i+ lakip ang mahamot nga incienso,+ kag ginabutang nila ang mga nagatangkas nga tinapay*+ sa lamesa nga puro nga bulawan, kag ginapasiga nila kada gab-i ang mga suga+ sa bulawan nga mga kandelero.+ Ginatuman namon ang amon katungdanan kay Jehova nga amon Dios, apang gintalikdan ninyo sia. 12  Kaupod namon ang matuod nga Dios nga nagapanguna sa amon, upod ang iya mga saserdote nga amo ang magapatunog sang mga trumpeta sa tion sang pagpakig-away sa inyo. O katawhan sang Israel, indi kamo magpakig-away kay Jehova nga Dios sang inyo mga katigulangan, kay indi kamo magdaug.”+ 13  Apang nagpadala si Jeroboam sing pila ka soldado nga magasalakay sa likod, agod sia kag ang iya mga soldado yara sa atubangan sang mga taga-Juda kag ang iban magasalakay sa likod. 14  Sang magbalikid ang mga taga-Juda, nakita nila nga may kaaway sila sa atubangan kag sa likod. Gani nagpanawag sila kay Jehova,+ samtang ginapatunog sing mabaskog sang mga saserdote ang mga trumpeta. 15  Nagsinggit ang mga taga-Juda sing panawagan sa inaway. Kag sang magsinggit ang mga taga-Juda sing panawagan sa inaway, ginpierde sang matuod nga Dios si Jeroboam kag ang bug-os nga Israel sa atubangan ni Abias kag sang Juda. 16  Nagpalagyo ang mga Israelinhon sa mga taga-Juda, kag gintugyan sila sang Dios sa ila mga kamot. 17  Madamo gid ang ginpamatay ni Abias kag sang iya katawhan, kag 500,000 ka hanas* nga mga lalaki sang Israel ang napatay. 18  Gani napierde kag nahuy-an ang katawhan sang Israel, kag mas gamhanan ang mga taga-Juda bangod nagsalig* sila kay Jehova nga Dios sang ila mga katigulangan.+ 19  Ginlagas ni Abias si Jeroboam kag naagaw niya sa iya ang siudad sang Betel+ kag ang sakop* nga mga banwa sini, ang siudad sang Jesana kag ang sakop nga mga banwa sini, kag ang siudad sang Efrain+ kag ang sakop nga mga banwa sini. 20  Wala na gid mabawi ni Jeroboam ang iya gahom sang panahon ni Abias. Dayon ginsilutan sia ni Jehova, kag napatay sia.+ 21  Apang nagbakod pa gid ang ginharian ni Abias. Sang ulihi, 14 ang iya nangin asawa,+ kag 22 ang iya anak nga lalaki kag 16 ang iya anak nga babayi. 22  Ang iban pa nga natabo sa kabuhi ni Abias, ang iya mga ginhimo kag ginsiling, nasulat sa sinulatan* ni manalagna Iddo.+

Footnote

“Maaca” sa 11:20-22 kag sa 1Ha 15:2.
Sa literal, “pinili.”
Sa literal, “pinili.”
Sa literal, “katipan sang asin.”
Sa literal, “nagakadto agod pun-on ang iya kamot sing.”
Dulot nga tinapay.
Sa literal, “pinili.”
Sa literal, “nagsandig.”
Ukon “sa palibot.”
Ukon “panaysayon; komentaryo.”