Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Biblia Online | BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

2 Cronica 11:1-23

BALAYAN SANG KAUNDAN

  • Ang paggahom ni Rehoboam (1-12)

  • Mga Levinhon nagkadto sa Juda (13-17)

  • Ang pamilya ni Rehoboam (18-23)

11  Pag-abot ni Rehoboam sa Jerusalem, gintipon niya dayon ang panimalay ni Juda kag ni Benjamin,+ 180,000 ka hanas* nga soldado, agod magpakig-away sa Israel kag ibalik ang ginharian kay Rehoboam.+  Dayon nagsiling si Jehova kay Semaias+ nga manalagna:*  “Hambala ang hari sang Juda nga si Rehoboam nga anak ni Solomon kag ang bug-os nga Israel sa Juda kag Benjamin,  ‘Amo ini ang ginasiling ni Jehova: “Indi kamo magpakig-away sa inyo mga utod. Magpauli na kamo, kay ako ang nagpahanabo sini.” ’ ”+ Gintuman nila ang ginsiling ni Jehova kag nagpauli sila kag wala na nila ginsalakay si Jeroboam.  Nag-istar si Rehoboam sa Jerusalem kag gintukod niya sa Juda ang mga siudad nga may mabakod nga depensa.  Gintukod* niya ang Betlehem,+ ang Etam, ang Tekoa,+  ang Bet-zur, ang Soco,+ ang Adulam,+  ang Gat,+ ang Maresa, ang Zif,+  ang Adoraim, ang Laquis,+ ang Azeka,+ 10  ang Zora, ang Aijalon,+ kag ang Hebron.+ Mga siudad ini nga may mabakod nga depensa sa Juda kag sa Benjamin. 11  Ginpabakod pa niya ang mga lugar nga may mabakod nga depensa kag ginbutangan niya ini sing mga kumander kag ginhatagan sila sing pagkaon, lana, kag alak. 12  Ginbutangan niya ang tanan nga siudad sing dalagku nga mga taming kag mga bangkaw; kag ginpabakod pa gid niya ini. Padayon niya nga gingamhan ang Juda kag ang Benjamin. 13  Ang mga saserdote kag ang mga Levinhon sa bug-os nga Israel naghalin sa tanan nila nga teritoryo kag nagdampig kay Rehoboam. 14  Ginbayaan sang mga Levinhon ang ila mga halalban kag mga pagkabutang+ kag nagkadto sila sa Juda kag sa Jerusalem, bangod wala na sila ginpaalagad ni Jeroboam kag sang iya mga anak bilang mga saserdote ni Jehova.+ 15  Dayon nagpili si Jeroboam sang iya mga saserdote para sa sagrado nga mataas nga mga duog+ agod mag-alagad sa daw kanding nga mga demonyo*+ kag sa mga estatwa sang tinday nga baka nga ginpahimo niya.+ 16  Halin sa tanan nga tribo sang Israel, ang mga namat-od sa ila tagipusuon nga pangitaon si Jehova nga Dios sang Israel, nagsunod sa mga saserdote kag mga Levinhon sa Jerusalem sa paghalad kay Jehova nga Dios sang ila mga katigulangan.+ 17  Sa sulod sang tatlo ka tuig ginpabakod nila ang ginharian sang Juda kag ginsakdag nila si Rehoboam nga anak ni Solomon, kay ginsunod nila ang dalanon ni David kag ni Solomon sa sulod sang tatlo ka tuig. 18  Dayon ginpangasawa ni Rehoboam si Mahalat, nga anak ni Jerimot nga anak ni David, kag ang iya iloy amo si Abihail nga anak ni Eliab+ nga anak ni Jesse. 19  Amo ini ang mga anak ni Rehoboam kay Mahalat: si Jeus, si Semarias, kag si Zaham. 20  Ginpangasawa man ni Rehoboam si Maaca nga apo ni Absalom.+ Ang mga anak ni Rehoboam kay Maaca amo si Abias,+ si Atai, si Ziza, kag si Selomit. 21  Mas ginahigugma ni Rehoboam si Maaca nga apo ni Absalom sangsa iban niya nga mga asawa kag mga babayi,+ kay 18 ang iya asawa kag 60 ang iya babayi, kag 28 ang iya anak nga lalaki kag 60 ang iya anak nga babayi. 22  Gani ginhimo ni Rehoboam si Abias nga anak ni Maaca bilang ulo kag lider sa iya mga utod, kay tuyo niya nga himuon sia nga hari. 23  Apang, nangin maalamon sia* kag ginpadala* niya ang iban niya nga mga anak sa tanan nga rehiyon sang Juda kag Benjamin, sa tanan nga siudad nga may mabakod nga depensa,+ kag ginhatagan niya sila sing madamo nga pagkaon kag madamo nga asawa.

Footnote

Sa literal, “pinili.”
Sa literal, “tawo sang (matuod nga) Dios.”
Ukon “Ginpabakod.”
Sa literal, “mga kanding.”
Ukon “naghulag sia nga may paghangop.”
ukon “ginlapta.”