Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Biblia Online | BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

1 Tesalonica 1:1-10

BALAYAN SANG KAUNDAN

  • Mga panamyaw (1)

  • Pagpasalamat tungod sa pagtuo sang mga taga-Tesalonica (2-10)

1  Halin kay Pablo, Silvano,*+ kag Timoteo,+ para sa kongregasyon sang mga taga-Tesalonica nga nahiusa sa Dios nga aton Amay kag kay Ginuong Jesucristo: Kabay nga mabaton ninyo ang wala tupong nga kaayo kag paghidait.  Nagapasalamat kami pirme sa Dios tungod sa inyo kag pirme namon kamo ginasambit sa amon mga pangamuyo,+  kay ginadumdom namon sing dayon sa atubangan sang aton Dios kag Amay ang inyo buhat sang pagtuo, ang inyo mahigugmaon nga pagpangabudlay, kag ang inyo pagbatas bangod sa inyo paglaum+ sa aton Ginuong Jesucristo.  Kay nahibaluan namon, mga kauturan nga hinigugma sang Dios, ang pagpili niya sa inyo,  bangod ang maayong balita nga ginabantala namon wala mag-abot sa inyo paagi lamang sa hambal kundi paagi man sa gahom, balaan nga espiritu, kag malig-on nga pagsalig. Kag nahibaluan gid ninyo kon nangin ano kami nga sahi sang mga tawo sa tunga ninyo para sa inyo kaayuhan.  Kag nangin manug-ilog kamo sa amon+ kag sa Ginuo,+ kay bisan nag-atubang kamo sang madamo nga kapipit-an+ ginbaton ninyo ang pulong nga may kalipay halin sa balaan nga espiritu,  amo nga nangin halimbawa kamo sa tanan nga tumuluo sa Macedonia kag sa Acaya.  Ang matuod, indi lamang ang pulong ni Jehova* ang nabatian sang mga tawo sa bug-os nga Macedonia kag Acaya halin sa inyo kundi naglapnag man ang inyo pagtuo sa Dios sa tanan nga duog,+ amo nga wala na kami sing masiling pa.  Kay sila mismo ang nagasugid kon paano ninyo kami ginbaton sang una nga pagkadto namon sa inyo kag kon paano ninyo gintalikdan ang inyo mga diosdios+ kag nagpaulipon sa buhi kag matuod nga Dios, 10  kag naghulat sa iya Anak halin sa langit,+ nga amo si Jesus nga iya ginbanhaw, nga nagaluwas sa aton sa magaabot nga kasingkal sang Dios.+

Footnote

Ginatawag man nga Silas.
Tan-awa ang Apendise A5.