Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

1 Samuel 8:1-22

BALAYAN SANG KAUNDAN

  • Ang Israel nangayo sing hari (1-9)

  • Paandam ni Samuel sa katawhan (10-18)

  • Si Jehova nagtugot nga may hari (19-22)

8  Sang tigulang na si Samuel, gintangdo niya ang iya mga anak nga mangin hukom sa Israel.  Ang iya panganay nga anak amo si Joel, kag ang ikaduha amo si Abias;+ sila ang mga hukom sa Beer-seba.  Apang ang iya mga anak wala magsunod sa iya halimbawa; mahuyugon sila sa indi bunayag nga pagganar,+ nagabaton sila sing hamham,+ kag ginapatiko nila ang hustisya.+  Sang ulihi, nagtipon ang tanan nga gulang sang Israel kag nagkadto sila kay Samuel sa Rama.  Nagsiling sila sa iya: “Tigulang ka na, apang ang imo mga anak wala nagasunod sa imo halimbawa. Magtangdo ka sa amon sing hari nga maghukom sa amon pareho sang ginahimo sa tanan nga pungsod.”+  Apang wala maluyagan* ni Samuel sang magsiling sila: “Hatagi kami sing hari nga maghukom sa amon.” Dayon nagpangamuyo si Samuel kay Jehova,  kag nagsiling si Jehova kay Samuel: “Pamatii ang tanan nga ginasiling sang katawhan sa imo; kay indi ikaw ang ila ginasikway, kundi ako ang ginasikway nila bilang hari nila.+  Amo gihapon ang ginahimo nila sugod sang adlaw nga ginpagua ko sila sa Egipto tubtob sini nga adlaw; ginasikway nila ako+ kag nagaalagad sila sa iban nga mga dios,+ kag amo ini ang ginahimo nila sa imo.  Pamatii sila. Apang dapat mo gid sila paandaman; sugiran mo sila kon ano ang kinamatarong sang hari nga magagahom sa ila.” 10  Gani ginsugid ni Samuel sa katawhan nga nagapangayo sing hari ang tanan nga ginsiling ni Jehova. 11  Nagsiling sia: “Amo ini ang kinamatarong sang hari nga magagahom sa inyo:+ Kuhaon niya ang inyo mga anak nga lalaki+ kag gamiton sila sa iya mga kangga+ kag himuon niya sila nga mga manugkabayo,+ kag ang iban padalaganon niya sa unahan sang iya mga kangga. 12  Kag magatangdo sia sing mga pangulo sang kada 1,000+ kag mga pangulo sang kada 50.+ Ang iban magaarado sang iya uma,+ magaani sang iya alanyon,+ kag magahimo sang iya mga armas sa inaway kag sang kagamitan para sa iya mga kangga.+ 13  Himuon niya ang inyo mga anak nga babayi nga manughimo sing inugbanyos,* mga kusinera, kag mga manugluto sing tinapay.+ 14  Kuhaon niya ang inyo pinakamaayo nga mga uma, mga ulubasan, kag mga katamnan sang olibo,+ kag ihatag niya ini sa iya mga alagad. 15  Kuhaon niya ang ikanapulo nga bahin sang inyo patubas nga uyas kag ubas, kag ihatag niya ini sa mga opisyal sang iya palasyo kag sa iya mga alagad. 16  Kuhaon niya ang inyo mga alagad nga lalaki kag mga alagad nga babayi, kag kuhaon niya ang inyo pinakamaayo nga mga baka kag mga asno, kag gamiton niya ini sa pag-obra sa iya.+ 17  Kuhaon niya ang ikanapulo nga bahin sang inyo mga panong,+ kag mangin mga alagad niya kamo. 18  Magaabot ang adlaw nga mangayo kamo sing bulig bangod sang inyo ginpili nga hari,+ apang indi kamo pagsabton ni Jehova.” 19  Apang wala magpamati ang katawhan kay Samuel, kag nagsiling sila: “Indi mahimo! Luyag gid namon nga may hari kami. 20  Dayon mangin pareho kami sa iban nga mga pungsod, kag ang amon hari magahukom sa amon kag magapanguna sa amon kag magapakig-away para sa amon.” 21  Sang mabatian ni Samuel ang tanan nga ginsiling sang katawhan, ginsugid niya ini kay Jehova. 22  Nagsiling si Jehova kay Samuel: “Pamatii sila, kag magtangdo ka sing hari nga maggahom sa ila.”+ Dayon nagsiling si Samuel sa mga lalaki sang Israel: “Magbalik na ang kada isa sa inyo sa iya siudad.”

Footnote

Sa literal, “Apang malain sa panulok.”
Ukon “pahumot.”