Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

1 Samuel 7:1-17

BALAYAN SANG KAUNDAN

  • Ang Kaban sa Kiryat-jearim (1)

  • ‘Si Jehova lamang ang alagaron’ (2-6)

  • Nagdaug ang Israel sa Mizpa (7-14)

  • Si Samuel hukom sa Israel (15-17)

7  Gani nag-abot ang mga lalaki sang Kiryat-jearim kag ginkuha nila ang Kaban ni Jehova kag gindala ini sa balay ni Abinadab+ sa bakulod. Dayon ginpakabalaan nila ang iya anak nga si Eleazar agod magbantay sa Kaban ni Jehova.  Nagpabilin ang Kaban sa Kiryat-jearim sa sulod sang 20 ka tuig, kag ang bug-os nga panimalay sang Israel nagdangop* kay Jehova.+  Nagsiling si Samuel sa bug-os nga panimalay sang Israel: “Kon bug-os tagipusuon kamo nga nagabalik kay Jehova,+ isikway ninyo ang iban nga mga dios+ kag ang mga imahen ni Astoret.+ Kag kon magdangop kamo sing tinagipusuon kay Jehova kag sia lamang ang inyo alagaron,+ luwason niya kamo sa mga Filistinhon.”+  Gani ginsikway sang mga Israelinhon ang mga Baal kag ang mga imahen ni Astoret, kag si Jehova lamang ang ila gin-alagad.+  Dayon nagsiling si Samuel: “Tipuna ang bug-os nga Israel sa Mizpa,+ kag mangamuyo ako kay Jehova para sa inyo.”+  Gani nagtipon sila sa Mizpa. Dayon nagsag-ub sila sing tubig kag gin-ula ini sa atubangan ni Jehova kag nagpuasa sila sa amo nga adlaw.+ Nagsiling sila didto: “Nakasala kami kay Jehova.”+ Kag nangin hukom si Samuel+ sang mga Israelinhon sa Mizpa.  Sang mabalitaan sang mga Filistinhon nga nagtipon ang mga Israelinhon sa Mizpa, nagtaklad ang mga ginuo sang mga Filistinhon+ agod salakayon ang Israel. Sang mabalitaan ini sang mga Israelinhon, hinadlukan sila tungod sa mga Filistinhon.  Gani nagsiling ang mga Israelinhon kay Samuel: “Indi ka mag-untat sa pagpanawag kay Jehova nga aton Dios, nga buligan niya kita+ kag luwason sa mga Filistinhon.”  Dayon nagkuha si Samuel sing nagatiti pa nga kordero kag ginhalad ini nga bilog bilang dulot nga sinunog+ para kay Jehova; kag nagpangayo si Samuel sing bulig kay Jehova para sa Israel, kag ginsabat sia ni Jehova.+ 10  Samtang ginahalad ni Samuel ang dulot nga sinunog, nag-abot ang mga Filistinhon agod magpakig-away sa Israel. Sa amo nga adlaw, nagpadaguob sing mabaskog si Jehova+ batok sa mga Filistinhon, kag ginpasalasala Niya sila,+ kag napierde sila sa atubangan sang Israel.+ 11  Gani naggua sa Mizpa ang mga Israelinhon kag ginlagas nila ang mga Filistinhon kag ginpamatay sila tubtob sa bagatnan sang Bet-car. 12  Dayon nagkuha sing bato si Samuel+ kag ginpahamtang ini sa ulot sang Mizpa kag Jesana, kag gintawag niya ini nga Ebenezer,* kay nagsiling sia: “Tubtob subong ginabuligan kita ni Jehova.”+ 13  Gani napierde ang mga Filistinhon, kag wala na sila magsalakay sa teritoryo sang Israel;+ kag si Jehova padayon nga nagsumpong sa mga Filistinhon sa bug-os nga kabuhi ni Samuel.+ 14  Nabalik man sa Israel ang mga siudad halin sa Ekron tubtob sa Gat nga nakuha sang mga Filistinhon sa Israel, kag nabawi sang Israel ang iya teritoryo halin sa mga Filistinhon. Nagluntad man ang paghidait sa ulot sang Israel kag sang mga Amornon.+ 15  Nangin hukom si Samuel sang Israel sa bug-os niya nga kabuhi.+ 16  Nagalakbay sia kada tuig kag nagalibot sa Betel,+ sa Gilgal,+ kag sa Mizpa,+ kag nagahukom sia sa Israel sa sining tanan nga duog. 17  Apang nagabalik sia sa Rama,+ bangod didto ang iya balay, kag nagahukom man sia didto sa Israel. Naghimo sia didto sing halaran para kay Jehova.+

Footnote

Ukon “naglalaw.”
Buot silingon, “Bulig nga Bato.”