Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

1 Samuel 6:1-21

BALAYAN SANG KAUNDAN

  • Ang Kaban ginbalik sa Israel (1-21)

6  Yara sa teritoryo sang mga Filistinhon ang Kaban+ ni Jehova sa sulod sang pito ka bulan.  Ginpatawag sang mga Filistinhon ang mga saserdote kag ang mga manugpakot,+ kag namangkot sila: “Ano ang himuon namon sa Kaban ni Jehova? Sugiri kami kon paano ini namon ibalik sa nahamtangan sini.”  Nagsabat sila: “Kon ibalik ninyo ang kaban sang katipan ni Jehova nga Dios sang Israel, indi ninyo pag-ibalik ini nga wala kamo sing dulot. Ibalik ninyo ini sa iya upod ang dulot tungod sa kasal-anan.+ Dayon magaayo kamo, kag mahibaluan ninyo kon ngaa ginasilutan niya kamo.”  Gani nagpamangkot sila: “Ano nga dulot tungod sa kasal-anan ang dapat namon ipadala sa iya?” Nagsabat sila: “Magpadala kamo sing lima ka bulawan nga imahen sang almoranas kag lima ka bulawan nga imahen sang ilaga, suno sa kadamuon sang ginuo sang mga Filistinhon,+ kay pareho nga kalalat-an ang naghalit sa inyo tanan kag sa inyo mga ginuo.  Maghimo kamo sing mga imahen sang inyo almoranas kag sing mga imahen sang ilaga+ nga nagahalit sa inyo duta, kag dapat ninyo padunggan ang Dios sang Israel. Ayhan indi na niya kamo pagsilutan pati ang inyo dios kag ang inyo duta.+  Indi pagpatig-aha ang inyo tagipusuon pareho sang pagpatig-a sang Egipto kag sang Paraon sang ila tagipusuon.+ Indi bala nga ginpalakat lang nila ang mga Israelinhon+ sang masilutan na Niya sila?+  Maghimo kamo sing bag-o nga karo kag magkuha sing duha ka baka nga may mga tinday kag wala pa gid matakdan sing gota. Dayon itakod ninyo ang karo sa mga baka, apang indi ninyo pagpaupda ang mga tinday sini, kundi ibilin ninyo ini sa toril.  Ibutang ninyo sa karo ang Kaban ni Jehova. Ibutang man ninyo sa tupad sini ang kahon nga ginasudlan sing bulawan nga mga imahen nga ipadala ninyo sa iya bilang dulot tungod sa kasal-anan.+ Dayon palakta ninyo ang mga baka.  Dayon tan-awon ninyo ini: Kon magtaklad ini sa dalan pakadto sa teritoryo sini sa Bet-semes,+ ang Dios nila ang naghimo sining kahalitan sa aton. Apang kon indi, mahibaluan naton nga indi sia ang nagsilot sa aton, kundi natabuan lang nga natabo ini sa aton.” 10  Ginhimo ini sang katawhan. Gani nagkuha sila sing duha ka baka nga may mga tinday kag gintakod nila ang karo sa sini. Apang ginbilin nila sa toril ang mga tinday sini. 11  Dayon ginbutang nila sa karo ang Kaban ni Jehova kag ang kahon nga ginsudlan sing bulawan nga mga imahen sang ilaga kag sing mga imahen sang ila almoranas. 12  Nagdiretso ang mga baka sa dalan pakadto sa Bet-semes.+ Nagaima ini samtang nagaagi sa isa lang ka dalan; wala ini magliko sa tuo ukon sa wala. Ang mga ginuo sang mga Filistinhon nagasunod sa sini tubtob sa dulunan sang Bet-semes. 13  Nagaani sadto sing trigo sa nalupyakan* ang katawhan sang Bet-semes. Sang magtungkaaw sila kag nakita nila ang Kaban, nasadyahan gid sila. 14  Nakalab-ot ang karo sa uma ni Josue nga taga-Bet-semes kag nagpundo ini malapit sa isa ka daku nga bato. Gani ginbis-ak nila ang kahoy sang karo, kag ginhalad nila ang mga baka+ bilang dulot nga sinunog para kay Jehova. 15  Ginpapanaug sang mga Levinhon+ ang Kaban ni Jehova kag ang kahon nga ginasudlan sing bulawan nga mga imahen sa tupad sini, kag ginbutang nila ini sa daku nga bato. Ginhalad sang mga lalaki sang Bet-semes+ ang mga dulot nga sinunog kag naghalad sila kay Jehova sadto nga adlaw. 16  Sang makita ini sang lima ka ginuo sang mga Filistinhon, nagbalik sila sa Ekron sa sina man nga adlaw. 17  Amo ini ang bulawan nga mga imahen sang almoranas nga ginpadala sang mga Filistinhon bilang dulot tungod sa kasal-anan kay Jehova:+ isa para sa Asdod,+ isa para sa Gaza, isa para sa Askelon, isa para sa Gat,+ kag isa para sa Ekron.+ 18  Ang kadamuon sang bulawan nga mga imahen sang ilaga suno man sa kadamuon sang tanan nga siudad sang mga Filistinhon nga ginapanag-iyahan sang lima ka ginuo, ang mga siudad nga may mabakod nga depensa kag ang mga baryo sa kaumhan. Ang daku nga bato sa uma ni Josue nga taga-Bet-semes diin ginbutang nila ang Kaban ni Jehova nangin isa ka saksi tubtob sini nga adlaw. 19  Apang ginpatay sang Dios ang mga lalaki sang Bet-semes, bangod gintan-aw nila ang Kaban ni Jehova. Ginpatay niya ang 50,070* sa katawhan. Naglalaw ang katawhan kay madamo ang ginpamatay ni Jehova sa ila.+ 20  Gani namangkot ang mga lalaki sang Bet-semes: “Sin-o bala ang makapalapit kay Jehova, ang balaan nga Dios,+ kag kay sin-o sia magakadto halin sa aton?”+ 21  Gani, nagpadala sila sing mga mensahero sa mga pumuluyo sang Kiryat-jearim.+ Nagsiling sila: “Ginbalik sang mga Filistinhon ang Kaban ni Jehova. Magdulhog kamo diri kag kuhaa ninyo ini.”+

Footnote

Ukon “manubo nga patag.”
Sa literal, “70 ka lalaki, 50,000 ka lalaki.”