Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

1 Samuel 4:1-22

BALAYAN SANG KAUNDAN

  • Kaban naagaw sang Filistinhon (1-11)

  • Si Eli kag iya mga anak napatay (12-22)

4  Ginpaalinton ni Samuel ang mensahe sa bug-os nga Israel. Dayon naglakat ang Israel agod magpakig-away sa mga Filistinhon. Nagkampo sila malapit sa Ebenezer, kag ang mga Filistinhon nagkampo sa Afek.  Nagpuesto ang mga Filistinhon sa pagpakig-away sa Israel, apang binudlayan ang Israel sa inaway kag napierde sila sang mga Filistinhon, kag 4,000 ka Israelinhon ang ila napatay sa patag-awayan.  Sang nagbalik sa kampo ang mga soldado, nagsiling ang mga gulang sang Israel: “Ngaa gintugutan ni Jehova nga mapierde kita* subong sang mga Filistinhon?+ Kuhaon naton sa Shilo ang kaban sang katipan ni Jehova,+ agod yara ini sa aton kag maluwas kita sa kamot sang aton mga kaaway.”  Gani ginpakuha sang katawhan sa Shilo ang kaban sang katipan ni Jehova sang mga kasuldadusan, ang Isa nga nagapungko sa trono sa ibabaw* sang mga kerubin.+ Ang duha ka anak ni Eli, nga si Hofni kag si Finehas,+ kaupod man didto sa kaban sang katipan sang matuod nga Dios.  Sang nag-abot sa kampo ang kaban sang katipan ni Jehova, nagsininggit sing mabaskog ang tanan nga Israelinhon, gani nagtay-ug ang duta.  Sang mabatian sang mga Filistinhon ang sininggit, nagsiling sila: “Ngaa nagasininggit ang mga Hebreo sa ila kampo?” Sang ulihi, nahibaluan nila nga yara na sa kampo ang Kaban ni Jehova.  Hinadlukan ang mga Filistinhon, kay siling nila: “Nag-abot ang Dios sa kampo!”+ Gani nagsiling sila: “Makaluluoy gid kita, kay wala pa gid anay sing natabo nga pareho sini!  Makaluluoy gid kita! Sin-o ang magaluwas sa aton sa kamot sining halangdon nga Dios? Amo ini ang Dios nga naglaglag sa Egipto paagi sa tanan nga sahi sang pagpamatay sa kamingawan.+  Kamo nga mga Filistinhon, magpakaisog kamo kag magpakalalaki, agod indi kamo mag-alagad sa mga Hebreo pareho sang pag-alagad nila sa inyo.+ Magpakalalaki kamo kag magpakig-away!” 10  Gani nagpakig-away ang mga Filistinhon kag napierde ang Israel,+ kag nagpalagyo ang kada isa pakadto sa iya tolda. Madamo gid ang napatay; 30,000 ka soldado ang napatay sa Israel. 11  Naagaw man ang Kaban sang Dios, kag napatay ang duha ka anak ni Eli nga si Hofni kag si Finehas.+ 12  Sa sina nga adlaw, may isa ka lalaki sa tribo ni Benjamin nga nagdalagan halin sa patag-awayan kag nakalab-ot sia sa Shilo. Gisi ang iya bayo kag yab-ukon ang iya ulo.+ 13  Sang nag-abot ang lalaki, nagapungko si Eli sa pulungkuan sa higad sang dalan nga nagabantay, bangod nabalaka gid sia sa Kaban sang matuod nga Dios.+ Nagsulod ang lalaki sa siudad agod ibalita ang natabo, kag nagtiyabaw ang bug-os nga siudad. 14  Sang mabatian ni Eli ang tiniyabaw, namangkot sia: “Ngaa may nagaginahod?” Dalidali nga nagpalapit ang lalaki kag nagpanugid kay Eli. 15  (Nagaedad na si Eli sing 98 anyos, kag indi na sia makakita.)+ 16  Dayon nagsiling ang lalaki kay Eli: “Halin ako sa patag-awayan! Bag-o lang ako nakapalagyo halin didto.” Gani namangkot sia: “Ano ang natabo, anak ko?” 17  Nagsabat ang lalaki: “Nagpalagyo ang Israel sa mga Filistinhon, kag napierde gid ang katawhan.+ Napatay man ang imo duha ka anak nga si Hofni kag si Finehas,+ kag naagaw ang Kaban sang matuod nga Dios.”+ 18  Sang ginsambit sang lalaki ang Kaban sang matuod nga Dios, nagtingkaya si Eli sa iya pulungkuan malapit sa gawang. Nalunggo ang iya liog kag napatay sia, kay mabug-at sia kag tigulang na. Naghukom sia sa Israel sa sulod sang 40 ka tuig. 19  Ang iya umagad nga asawa ni Finehas nagabusong sadto kag manugbata na. Sang mabalitaan niya nga ang Kaban sang matuod nga Dios gin-agaw kag napatay ang iya ugangan nga lalaki kag ang iya bana, nagbarikutot sia kag wala ginapaabot nga ginsakitan sia kag nagbata. 20  Sang nagatagumatayon sia, nagsiling ang mga babayi nga nagatindog sa tupad niya: “Indi ka magkahadlok, bangod nagbun-ag ka sing isa ka lalaki.” Wala na sia magsabat kag wala niya ini ginsapak.* 21  Apang ginhingalanan niya ang bata nga Icabod,*+ kag nagsiling sia: “Gintapok ang himaya sang Israel,”+ nga nagapatuhoy sa pag-agaw sa Kaban sang matuod nga Dios kag sa natabo sa iya ugangan nga lalaki kag sa iya bana.+ 22  Nagsiling sia: “Gintapok ang himaya sang Israel, bangod gin-agaw ang Kaban sang matuod nga Dios.”+

Footnote

Sa literal, “Ngaa ginpierde kita ni Jehova?”
Ukon mahimo, “tunga.”
Ukon “kag wala niya ginpahamtang ang iya tagipusuon sa sini.”
Buot silingon, “Diin ang Himaya?”