Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

1 Samuel 3:1-21

BALAYAN SANG KAUNDAN

  • Si Samuel mangin manalagna (1-21)

3  Nag-alagad ang bata nga si Samuel+ kay Jehova sa idalom sang pagdumala ni Eli, apang talagsa lang ang mensahe halin kay Jehova sadto nga tion; kag wala sing ginasugid nga palanan-awon.+  Madulom na ang panan-awan ni Eli amo nga indi na sia makakita sing maayo.+ Isa ka adlaw, nagahigda sia sa iya kuarto.  Nagasiga pa ang suga sang Dios.+ Nagahigda man si Samuel sa templo*+ ni Jehova diin nahamtang ang Kaban sang Dios.  Dayon gintawag ni Jehova si Samuel. Nagsabat sia: “Ano ina ginuo ko?”  Nagdalagan sia kay Eli kag nagsiling: “Ngaa gintawag mo ako ginuo ko?” Apang nagsiling sia: “Wala ko ikaw gintawag. Maghigda ka liwat.” Gani naglakat sia kag naghigda.  Nagpanawag liwat si Jehova: “Samuel!” Gani nagbangon si Samuel kag nagkadto kay Eli kag nagsiling: “Ngaa gintawag mo ako ginuo ko?” Apang nagsiling sia: “Wala ko ikaw gintawag, anak ko. Maghigda ka liwat.”  (Wala pa sadto makilala sing bug-os ni Samuel si Jehova, kag wala pa mapahayag sa iya ang mensahe ni Jehova.)+  Gani gintawag sia ni Jehova sa ikatlo nga higayon: “Samuel!” Nagbangon sia kag nagkadto kay Eli kag nagsiling: “Ngaa gintawag mo ako ginuo ko?” Narealisar na ni Eli nga si Jehova ang nagatawag sa bata.  Gani nagsiling si Eli kay Samuel: “Maghigda ka, kag kon tawgon ka niya liwat, magsiling ka, ‘Maghambal ka Jehova, kay nagapamati ang imo alagad.’ ” Kag naglakat si Samuel kag naghigda sa iya kuarto. 10  Nag-abot si Jehova kag nagtindog didto, kag nagpanawag sia pareho sang una: “Samuel, Samuel!” Nagsabat si Samuel: “Maghambal ka, Ginuo ko, kay nagapamati ang imo alagad.” 11  Nagsiling si Jehova kay Samuel: “May himuon ako sa Israel kag ang bisan sin-o nga makabati sini mahadlukan gid.*+ 12  Sa sina nga adlaw himuon ko kay Eli ang tanan nga ginhambal ko tuhoy sa iya panimalay, halin sa ginsuguran tubtob sa katapusan.+ 13  Isugid mo sa iya nga silutan ko ang iya panimalay tubtob san-o bangod sini nga sala. Nahibaluan niya+ nga ginatamay sang iya mga anak ang Dios,+ apang wala niya sila ginsaway.+ 14  Amo nga nagpanumpa ako sa panimalay ni Eli nga indi gid matumbasan sing mga halad ukon mga dulot ang sala sang panimalay ni Eli.”+ 15  Naghigda si Samuel tubtob mag-aga. Dayon ginbuksan niya ang mga puertahan sang balay ni Jehova. Nahadlok si Samuel nga isugid kay Eli ang tuhoy sa palanan-awon. 16  Apang gintawag ni Eli si Samuel: “Samuel, anak ko!” Nagsabat sia: “Ano ina ginuo ko?” 17  Nagpamangkot sia: “Ano ang ginsiling niya sa imo? Palihug, indi ini pag-ilikom sa akon. Kabay pa nga silutan ka sang Dios sing mabug-at kon ilikom mo sa akon ang bisan isa lang ka tinaga sa tanan nga ginsiling niya sa imo.” 18  Gani ginsugiran sia ni Samuel sang tanan nga ginsiling sa iya, kag wala sia sing ginlikom. Nagsiling si Eli: “Si Jehova ang nagsiling sini. Himuon niya kon ano ang maayo sa iya panulok.” 19  Samtang nagadaku si Samuel, si Jehova padayon nga nagaupod sa iya.+ Wala gid sing bisan isa sa tanan nga ginsiling niya ang wala matuman.* 20  Nahibaluan sang bug-os nga Israel halin sa Dan tubtob sa Beer-seba nga si Samuel amo ang gintangdo ni Jehova bilang iya manalagna. 21  Padayon nga nagpakita si Jehova sa Shilo, kay nagpahayag si Jehova kay Samuel sa Shilo paagi sa pulong ni Jehova.+

Footnote

Ang tabernakulo.
Sa literal, “ang iya mga dulunggan matingilan.”
Sa literal, “ang nahulog sa duta.”