Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Biblia Online | BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

1 Samuel 29:1-11

BALAYAN SANG KAUNDAN

  • Mga Filistinhon wala salig kay David (1-11)

29  Gintipon sang mga Filistinhon+ ang tanan nila nga soldado sa Afek, samtang ang mga Israelinhon nagkampo sa may tuburan sa Jezreel.+  Nagamartsa ang mga ginuo sang mga Filistinhon upod sa ila mga soldado nga nagrupo sa ginatos kag linibo, kag nagasunod sa ila si David kag ang iya mga tinawo upod kay Akis.+  Apang nagsiling ang mga prinsipe sang mga Filistinhon: “Ano ang ginahimo sining mga Hebreo diri?” Nagsabat si Akis sa mga prinsipe sang mga Filistinhon: “Si David ina nga alagad ni Hari Saul sang Israel, kag sobra na isa ka tuig nga kaupod ko sia.+ Wala gid ako sing nakita nga sayop sa iya sugod sang nagkadto sia sa akon tubtob subong.”  Apang naakig sa iya ang mga prinsipe sang mga Filistinhon, kag nagsiling sila sa iya: “Pabalika ina nga tawo.+ Pabalika sia sa lugar nga ginhatag mo sa iya. Indi sia pagpaupda sa aton sa pagpakig-away, kay basi kita pa ang iya kontrahon sa tion sang inaway.+ Kay may mas maayo pa bala nga paagi agod mahamut-an sia sang iya ginuo sangsa mapatay niya ang aton mga tinawo?  Indi bala amo ini si David nga ila ginsautan anay kag gin-ambahan: ‘Linibo ang napatay ni Saul, Apang ang kay David tignapulo ka libo’?”+  Gani ginpatawag ni Akis+ si David kag nagsiling sia sa iya: “Ginapanumpa ko sa buhi nga Dios nga si Jehova, nga matarong ka, kag luyag ko nga magpakig-away ka upod sa akon mga soldado,+ kay wala gid ako sing nakita nga sayop sa imo sugod sang nagkadto ka sa akon tubtob subong.+ Apang wala sing salig sa imo ang mga ginuo.+  Gani magbalik ka kag maayo lang nga paglakat, kag indi ka maghimo sing bisan ano nga indi maluyagan sang mga ginuo sang mga Filistinhon.”  Apang nagsiling si David kay Akis: “Ngaa, ano ang akon nahimo? Ano ang nakita mo nga sayop sa imo alagad sugod sang adlaw nga nagkadto ako sa imo tubtob subong? Ngaa indi ako makaupod sa pagpakig-away sa mga kaaway sang akon ginuo nga hari?”  Nagsabat si Akis kay David: “Para sa akon, maayo gid ikaw pareho sa anghel sang Dios.+ Apang nagsiling ang mga prinsipe sang mga Filistinhon, ‘Indi sia pagpaupda sa aton sa pagpakig-away.’ 10  Gani aga ka pa nga magbangon buas pati na ang kaupod mo nga mga tinawo sang imo hari; temprano pa kamo nga magbangon kag maghalin samtang nagapamanagbanag pa lang.” 11  Gani pagkaaga, temprano pa nga nagbangon si David kag ang iya mga tinawo agod magbalik sa duta sang mga Filistinhon, kag ang mga Filistinhon nagkadto sa Jezreel.+

Footnote