Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

1 Samuel 27:1-12

BALAYAN SANG KAUNDAN

  • Ginhatag kay David ang Ziklag (1-12)

27  Apang, nagsiling si David sa iya kaugalingon: “Maabot ang adlaw nga patyon gid ako ni Saul. Maayo pa nga malagyo na lang ako+ sa duta sang mga Filistinhon. Dayon untatan na ni Saul ang pagpangita sa akon sa bug-os nga Israel,+ kag luwas na ako sa iya.”  Gani nagkadto si David kag ang iya 600 ka tinawo+ kay Akis+ nga anak ni Maoc kag hari sang Gat.  Si David kag ang iya mga tinawo upod ang ila mga pamilya nag-istar upod kay Akis sa Gat. Kaupod ni David ang iya duha ka asawa, si Ahinoam+ nga taga-Jezreel kag si Abigail+ nga taga-Carmel nga asawa anay ni Nabal.  Sang ibalita kay Saul nga nagpalagyo si David sa Gat, gin-untatan na niya ang pagpangita kay David.+  Nagsiling si David kay Akis: “Kon nahamuot ka sa akon, paistara ako sa isa sang imo mga siudad. Kay ngaa mag-istar ang imo alagad sa siudad nga ginaistaran sang hari?”  Gani ginhatag ni Akis sa iya ang Ziklag+ sina nga adlaw. Amo nga ang Ziklag ginapanag-iyahan sang mga hari sang Juda tubtob sini nga adlaw.  Ang kalawigon sang tion* nga nag-istar si David sa duta sang mga Filistinhon isa ka tuig kag apat ka bulan.+  Ginsalakay ni David kag sang iya mga tinawo ang mga Gesurnon,+ ang mga Girzinhon, kag ang mga Amaleknon,+ kay nagaistar sila sa kadutaan halin sa Telam tubtob sa Sur+ kag tubtob sa Egipto.  Ginsalakay ni David ang kadutaan kag ginpamatay niya ang tanan nga lalaki kag babayi,+ apang ginpanguha niya ang mga karnero, mga baka, mga asno, mga kamelyo, kag ang mga bayo. Pagkatapos sini, nagbalik sia kay Akis. 10  Dayon ginpamangkot sila ni Akis: “Diin kamo nagsalakay?” Nagsabat si David: “Sa bagatnan* sang Juda”+ ukon “Sa bagatnan sang duta sang mga Jerameelnon”+ ukon “Sa bagatnan sang duta sang mga Kenhanon.”+ 11  Ginpamatay ni David ang tanan nga lalaki kag babayi agod wala sia sing madala nga bihag sa Gat, kay siling niya: “Agod indi sila manugid kag magsiling, ‘Amo sini ang ginhimo ni David.’ ” (Amo sini ang ginhimo niya sa bug-os nga tion nga nag-istar sia sa duta sang mga Filistinhon.) 12  Gani nagpati si Akis kay David kag nagsiling sia sa iya kaugalingon: ‘Akig na gid sa iya ang katawhan sang Israel, gani mangin alagad ko na sia tubtob san-o.’

Footnote

Sa literal, “kadamuon sang mga adlaw.”
Ukon “Negeb.”