Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

1 Samuel 23:1-29

BALAYAN SANG KAUNDAN

  • Ginluwas ni David ang Keila (1-12)

  • Ginlagas ni Saul si David (13-15)

  • Ginpabakod ni Jonatan si David (16-18)

  • Si David nakapalagyo kay Saul (19-29)

23  Sang ulihi, ginsugiran si David: “Ginsalakay sang mga Filistinhon ang Keila,+ kag ginapanguha nila ang mga uyas sa mga linasan.”  Gani nagpamangkot si David kay Jehova:+ “Salakayon ko bala ang mga Filistinhon?” Ginsabat ni Jehova si David: “Salakaya ang mga Filistinhon kag luwasa ang Keila.”  Apang nagsiling ang mga tinawo ni David: “Nahadlok na gani kami diri sa Juda;+ ano pa gid ayhan kon magkadto kita sa Keila kag magpakig-away sa mga Filistinhon!”+  Gani nagpamangkot liwat si David kay Jehova.+ Ginsabat sia ni Jehova: “Magkadto ka sa Keila; bangod itugyan ko sa imo kamot ang mga Filistinhon.”+  Gani nagkadto si David kag ang iya mga tinawo sa Keila kag nagpakig-away sa mga Filistinhon. Ginpanguha niya ang ila kasapatan, kag madamo gid ang napatay nga mga Filistinhon, kag ginluwas ni David ang mga pumuluyo sang Keila.+  Sang malagyo si Abiatar+ nga anak ni Ahimelec kag nagkadto kay David sa Keila, may dala sia nga efod.  May nagsugid kay Saul: “Nagkadto si David sa Keila.” Dayon nagsiling si Saul: “Gintugyan* sia sa akon sang Dios,+ kay makibon lang sia sa pagsulod niya sa siudad nga may mga gawang kag trangka.”  Gani gintipon ni Saul ang tanan nga katawhan agod magpakig-away sa Keila kag kibunon si David kag ang iya mga tinawo.  Sang mabalitaan ni David nga may ginaplano si Saul batok sa iya, nagsiling sia kay Abiatar nga saserdote: “Dalha diri ang efod.”+ 10  Dayon nagsiling si David: “O Jehova nga Dios sang Israel, nabalitaan sang imo alagad nga nagaplano si Saul sa pagkadto sa Keila agod laglagon ang siudad bangod sa akon.+ 11  Itugyan bala ako sang mga lider* sang Keila sa iya? Makadto bala diri si Saul subong sang nabatian sang imo alagad? O Jehova nga Dios sang Israel, sugiri palihug ang imo alagad.” Nagsabat si Jehova: “Makadto sia diri.” 12  Nagpamangkot si David: “Itugyan bala ako kag ang akon mga tinawo sang mga lider sang Keila kay Saul?” Nagsabat si Jehova: “Itugyan nila kamo.” 13  Naghalin dayon si David kag ang iya mga 600 ka tinawo+ sa Keila kag nagsaylosaylo sila sing lugar. Sang ginsugiran si Saul nga wala na si David sa Keila, wala na sia magkadto didto. 14  Nagtener si David sa kamingawan sa mga lugar nga mabudlay kadtuan, sa kabukiran sang kamingawan sang Zif.+ Wala mag-untat si Saul sa pagpangita sa iya,+ apang wala sia gintugyan ni Jehova kay Saul. 15  Sang si David yara sa kamingawan sang Zif sa Hores, nahibaluan ni David nga* ginpangita sia didto ni Saul agod patyon.* 16  Nagkadto si Jonatan nga anak ni Saul kay David sa Hores, kag ginbuligan niya sia nga magbakod ang iya pagsalig* kay Jehova.+ 17  Nagsiling sia sa iya: “Indi ka magkahadlok, kay indi ka makit-an ni Saul nga akon amay. Ikaw ang mangin hari sa Israel,+ kag mangin ikaduha ako sa imo; kag nahibaluan man ini ni Saul nga akon amay.”+ 18  Dayon naghimo sila nga duha sing katipan+ sa atubangan ni Jehova. Nagpabilin si David sa Hores, apang nagpauli si Jonatan. 19  Sang ulihi, ang mga lalaki sang Zif nagkadto kay Saul sa Gibea,+ kag nagsiling sila: “Indi bala nga si David nagapanago malapit sa amon+ sa mga lugar nga mabudlay kadtuan sa Hores,+ sa bakulod sang Haquila,+ sa bagatnan* sang Jesimon?*+ 20  Gani kon luyag mo,* O hari, magkadto ka didto, kag itugyan namon sia sa kamot sang hari.”+ 21  Nagsiling si Saul: “Kabay pa nga pakamaayuhon kamo ni Jehova, kay naluoy kamo sa akon. 22  Palihug, maglakat na kamo kag pat-ura ninyo kon diin gid sia kag kon sin-o ang nakakita sa iya didto kay may nakasugid sa akon nga maayo sia magpadihot. 23  Pat-ura ninyo kon diin sia nga mga lugar nagapanago, kag magbalik kamo sa akon nga may ebidensia. Maupod ako dayon sa inyo, kag kon yara sia sa sini nga lugar, pangitaon ko sia bisan yara pa sia sa tunga sang linibo ka katawhan* sang Juda.” 24  Gani naglakat sila kag nag-una kay Saul sa Zif,+ samtang si David kag ang iya mga tinawo yara sa kamingawan sang Maon,+ sa Araba+ sa bagatnan sang Jesimon. 25  Dayon nag-abot si Saul upod ang iya mga tinawo sa pagpangita sa iya.+ Sang ginsugid ini kay David, dalidali sia nga nagdulhog pakadto sa daku nga bato,+ kag nagtener sia sa kamingawan sang Maon. Sang mabalitaan ini ni Saul, ginlagas niya si David sa kamingawan sang Maon. 26  Sang nakalab-ot si Saul sa isa ka bahin sang bukid, si David kag ang iya mga tinawo yara sa pihak nga bahin sang bukid. Dalidali nga nagpalagyo si David+ kay Saul, apang malapit na madakpan ni Saul kag sang iya mga tinawo si David kag ang iya mga tinawo.+ 27  Apang may mensahero nga nag-abot kag nagsiling sia kay Saul: “Dali, magbalik ka anay, kay ginsalakay sang mga Filistinhon ang aton duta!” 28  Bangod sini, gin-untatan ni Saul ang paglagas kay David+ kag nagbalik sia agod magpakig-away sa mga Filistinhon. Amo kon ngaa gintawag yadto nga lugar nga Bato nga Ginsipakan. 29  Halin didto, nagkadto dayon si David sa mga lugar nga mabudlay kadtuan sa En-gedi.+

Footnote

Sa literal, “Ginbaligya.”
Ukon mahimo, “tag-iya sang duta.”
Ukon mahimo, “nahadlok si David bangod.”
Ukon “sa pagtinguha sa iya kalag.”
Sa literal, “kag ginpabakod niya ang iya kamot.”
Sa literal, “tuo nga bahin.”
Ukon mahimo, “desyerto; kamingawan.”
Ukon “sang imo kalag.”
Ukon “sang mga tribo.”