Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Biblia Online | BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

1 Samuel 16:1-23

BALAYAN SANG KAUNDAN

  • Si David ginhaplas nga hari (1-13)

    • “Si Jehova nagatan-aw sa tagipusuon” (7)

  • Espiritu ginkuha kay Saul (14-17)

  • Si David manug-arpa ni Saul (18-23)

16  Sang ulihi, nagsiling si Jehova kay Samuel: “Tubtob san-o ka maglalaw kay Saul,+ samtang ginsikway ko na sia bilang hari sang Israel?+ Sudli sing lana ang imo suludlan nga sungay+ kag magkadto ka kay Jesse+ nga taga-Betlehem, kay ginpili ko nga mangin hari ang isa sa iya mga anak.”+  Apang nagsiling si Samuel: “Paano ako makakadto didto? Sa tion nga mahibaluan ini ni Saul, patyon gid niya ako.”+ Nagsabat si Jehova: “Magdala ka sing torite nga baka kag isiling mo, ‘Nagkadto ako diri agod maghalad kay Jehova.’  Agdahon mo si Jesse sa imo paghalad; dayon ipahibalo ko sa imo kon ano ang imo himuon. Haplasan mo para sa akon ang isa nga itudlo ko sa imo.”+  Ginhimo ni Samuel ang ginsiling ni Jehova. Pag-abot niya sa Betlehem,+ nagakurog sa kahadlok ang mga gulang sang siudad sang ginsugata nila sia. Nagsiling sila: “Maayo bala ang imo tuyo sa pagkadto diri?”  Nagsabat sia: “Maayo ang akon tuyo. Nagkadto ako diri agod maghalad kay Jehova. Pakabalaana ninyo ang inyo kaugalingon kag mag-upod kamo sa akon paghalad.” Dayon ginpakabalaan niya si Jesse kag ang iya mga anak, pagkatapos gin-agda niya sila sa iya paghalad.  Sang mag-abot sila kag nakita niya si Eliab,+ nagsiling sia: “Pat-od nga sia na ang hinaplas ni Jehova.”  Apang nagsiling si Jehova kay Samuel: “Indi ka magtulok sa iya dagway ukon sa iya kataason,+ kay indi sia ang ginpili ko. Kay ang pagtan-aw sang Dios indi pareho sa pagtan-aw sang tawo, bangod ang tawo nagatan-aw sa makita sang mata, apang si Jehova nagatan-aw sa tagipusuon.”+  Dayon gintawag ni Jesse si Abinadab+ kag ginpaatubang sia kay Samuel, apang nagsiling sia: “Indi man sia ang ginpili ni Jehova.”  Dayon si Shamah+ naman ang ginpaatubang ni Jesse, apang nagsiling sia: “Indi man sia ang ginpili ni Jehova.” 10  Gani ginpaatubang ni Jesse kay Samuel ang iya pito ka anak, apang nagsiling si Samuel kay Jesse: “Wala sa ila ang ginpili ni Jehova.” 11  Sang ulihi, nagpamangkot si Samuel kay Jesse: “Amo lang bala ini ang imo mga anak nga lalaki?” Nagsabat sia: “Wala pa diri ang kamanghuran,+ kay nagabantay sia sang mga karnero.”+ Nagsiling si Samuel kay Jesse: “Sugata sia kag pakadtua diri, kay indi kita magkaon tubtob indi sia mag-abot.” 12  Gani ginpasugat niya sia kag ginpaatubang kay Samuel. Isa sia ka pamatan-on nga mapulapula, manami ang mga mata, kag guapo.+ Dayon nagsiling si Jehova: “Amo na ina sia, haplasi sia!”+ 13  Gani ginkuha ni Samuel ang suludlan nga sungay nga may lana+ kag ginhaplasan sia sa atubangan sang iya mga utod. Sugod sadto, nagpanghikot ang espiritu ni Jehova kay David.+ Pagkatapos sini, nagkadto si Samuel sa Rama.+ 14  Nagbiya ang espiritu ni Jehova kay Saul,+ kag gintugutan ni Jehova nga pahadlukon sia sang iya natublag nga panghunahuna.*+ 15  Nagsiling ang mga alagad ni Saul sa iya: “Ginatugutan sang Dios nga pahadlukon ka sang imo natublag nga panghunahuna. 16  Palihug ginuo namon, tuguti ang imo mga alagad nga magpangita sing sampaton magtokar sing arpa.+ Kon magtugot ang Dios nga pahadlukon ka sang imo natublag nga panghunahuna, matokar sia sing arpa, kag magaayo ang imo pamatyag.” 17  Gani nagsiling si Saul sa iya mga alagad: “Palihug, pangitai ninyo ako sing tawo nga maayo magtokar sing arpa, kag dalha ninyo sia sa akon.” 18  Ang isa sa mga alagad nagsabat: “Nabatian ko nga ang isa ka anak ni Jesse nga taga-Betlehem sampaton magtokar. Maisog sia kag isganan nga hangaway.+ Maayo sia maghambal kag guapo,+ kag si Jehova kaupod niya.”+ 19  Nagpadala dayon si Saul sing mensahe kay Jesse paagi sa iya mga mensahero: “Pakadtua sa akon ang imo anak nga si David, nga nagabantay sa panong.”+ 20  Gani nagkuha si Jesse sing asno kag ginkargahan ini sing tinapay, sing alak sa panit nga suludlan, kag sing tinday nga kanding. Ginpadala niya ini kay David nga iya anak para kay Saul. 21  Nagkadto si David kay Saul kag nag-alagad sa iya.+ Ginhigugma gid sia ni Saul, kag ginhimo sia nga manugdala sang iya hinganiban. 22  Nagpadala si Saul sing mensahe kay Jesse: “Palihug tuguti si David nga magpadayon sa pag-alagad sa akon, kay nagustuhan ko sia.” 23  Sa kada tion nga ginatugutan sang Dios nga pahadlukon si Saul sang iya natublag nga panghunahuna, ginakuha ni David ang arpa kag nagatokar sia. Dayon maumpawan si Saul kag nagaayo ang iya pamatyag, kag wala na sia ginapahadlok sang iya natublag nga panghunahuna.+

Footnote

Sa literal, “kag ang malain nga espiritu halin kay Jehova nagpahadlok sa iya.”