Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

1 Samuel 13:1-23

BALAYAN SANG KAUNDAN

  • Si Saul nagpili sing mga soldado (1-4)

  • Si Saul nangin makahas (5-9)

  • Ginsabdong ni Samuel si Saul (10-14)

  • Ang Israel wala sing hinganiban (15-23)

13  Si Saul nagaedad sing . . .* ka tuig sang maghari sia,+ kag duha ka tuig sia nga naghari sa Israel.  Nagpili si Saul sing 3,000 ka lalaki sa Israel. Ang 2,000 gin-upod ni Saul sa Micmash kag sa kabukiran sa Betel. Ang 1,000 gin-upod ni Jonatan+ sa Gibea+ nga sakop sang Benjamin. Ang iban pa sa katawhan ginpapauli niya sa ila tolda.  Dayon ginsalakay ni Jonatan ang garison sang mga Filistinhon+ sa Geba,+ kag nabalitaan ini sang mga Filistinhon. Ginpatunog ni Saul ang budyong+ sa bug-os nga duta, kag nagsiling sia: “Magpamati ang mga Hebreo!”  Nabatian sang bug-os nga Israel ang balita: “Ginsalakay ni Saul ang garison sang mga Filistinhon, kag naakig gid ang mga Filistinhon sa Israel.” Gani gintipon ang katawhan agod magsunod kay Saul sa Gilgal.+  Nagtipon man ang mga Filistinhon agod magpakig-away sa Israel, nga may 30,000 ka kangga sa inaway kag 6,000 ka manugkabayo kag mga soldado nga daw mga balas sa baybayon kadamo.+ Nagtaklad sila kag nagkampo sa Micmash sa sidlangan sang Bet-aven.+  Nakita sang mga lalaki sang Israel nga yara sila sa peligro, bangod mabudlay ang ila kahimtangan; gani nagpanago ang katawhan sa mga kueba,+ sa mga gikab, sa dalagku nga mga bato, sa mga buho,* kag sa mga pulunduhan sang tubig.  Ang pila ka Hebreo nagtabok pa gani sa Jordan pakadto sa duta sang Gad kag Gilead.+ Apang yara pa gihapon si Saul sa Gilgal, kag nagakurog sa kahadlok ang tanan nga katawhan nga nagasunod sa iya.  Naghulat sia sing pito ka adlaw tubtob sa tion nga gintalana ni Samuel, apang wala mag-abot si Samuel sa Gilgal, kag ang katawhan amat-amat nga nagpalayo sa iya.  Sang ulihi, nagsiling si Saul: “Dalha sa akon ang halad nga sinunog kag ang mga halad sa pag-ambitanay.” Kag ginhalad niya ang halad nga sinunog.+ 10  Apang sang mahalad na niya ang halad nga sinunog, nag-abot si Samuel. Gani ginsugata sia ni Saul kag gin-abiabi. 11  Nagsiling si Samuel: “Ano ang ginhimo mo?” Nagsabat si Saul: “Nakita ko nga amat-amat nga nagpalayo sa akon ang katawhan,+ kag wala ka mag-abot suno sa tion nga gintalana mo, kag nagatipon na ang mga Filistinhon sa Micmash.+ 12  Gani nagsiling ako, ‘Salakayon na ako sang mga Filistinhon sa Gilgal, kag wala ko pa matigayon ang kahamuot* ni Jehova.’ Gani napilitan ako nga ihalad ang halad nga sinunog.” 13  Nagsiling si Samuel kay Saul: “Kabuangan ang imo ginhimo. Wala mo gintuman ang ginsugo sa imo ni Jehova nga imo Dios.+ Kon gintuman mo, himuon kuntani ni Jehova nga magpabilin ang imo ginharian sa Israel tubtob san-o. 14  Apang karon, ang imo ginharian indi na magpadayon.+ Mapili si Jehova sing isa ka tawo nga kalahamut-an sa iya tagipusuon,+ kag himuon sia ni Jehova nga lider sang iya katawhan,+ bangod wala mo gintuman ang ginsugo sa imo ni Jehova.”+ 15  Halin sa Gilgal, nagkadto si Samuel sa Gibea nga sakop sang Benjamin. Gin-isip ni Saul ang katawhan, kag mga 600 ang dampig sa iya.+ 16  Si Saul, ang iya anak nga si Jonatan, kag ang katawhan nga dampig sa ila nagaistar sa Geba+ nga sakop sang Benjamin. Ang mga Filistinhon naman nagkampo sa Micmash.+ 17  Tatlo ka tropa ang mga Filistinhon sang naggua sila sa ila kampo sa pagsalakay. Ang isa ka tropa nagpakadto sa Ofra sa duta sang Sual; 18  ang isa pa nagpakadto sa dalan sang Bet-horon;+ kag ang ikatlo nagpakadto sa dalan nga padulong sa dulunan nga nagatamwa sa nalupyakan sang Zeboim, pakadto sa kamingawan. 19  Wala sing panday sa salsalon sadto sa bug-os nga duta sang Israel, bangod nagsiling ang mga Filistinhon: “Agod indi makahimo ang mga Hebreo sing espada ukon bangkaw.” 20  Gani ang tanan nga Israelinhon nagakadto pa sa mga Filistinhon agod magpabaid sang ila mga arado, sadol, wasay, kag garab. 21  Isa ka pim* ang bayad sa pagpabaid sing arado, sadol, tatlo-unto nga gamit, wasay, kag sa pagpakay-o sing sungkod nga pangtuslok sa baka. 22  Sang adlaw sang inaway, wala sing isa sa katawhan nga kaupod ni Saul kag ni Jonatan ang may espada ukon bangkaw+ kundi si Saul lamang kag si Jonatan nga iya anak. 23  Kag isa ka garison sang mga Filistinhon ang nagkadto sa dalan sa pil-as sang Micmash.+

Footnote

Ang numero indi makita sa orihinal nga Hebreo nga teksto.
Ukon “mga kuarto sa idalom sang duta.”
Ukon “mapahumok ang nawong.”
Dumaan nga takus sang kabug-aton, mga dos-tersia sang isa ka siklo.