Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

1 Samuel 11:1-15

BALAYAN SANG KAUNDAN

  • Ginpierde ni Saul ang Ammonhon (1-11)

  • Ginproklamar liwat si Saul  (12-15)

11  Dayon nagtaklad si Nahas nga Ammonhon+ kag nagkampo batok sa Jabes+ sa Gilead. Nagsiling ang tanan nga lalaki sang Jabes kay Nahas: “Magpakigkatipan ka* sa amon, kag magaalagad kami sa imo.”  Nagsiling si Nahas nga Ammonhon sa ila: “Magapakigkatipan ako sa inyo sa isa ka kondisyon, nga lukaton ko ang inyo tuo nga mata. Himuon ko ini agod mahuy-an ang bug-os nga Israel.”  Nagsiling sa iya ang mga gulang sang Jabes: “Hatagi kami sing pito ka adlaw agod makapadala kami sing mga mensahero sa tanan nga teritoryo sang Israel. Kon wala sing magluwas sa amon, magaampo kami sa imo.”  Sang ulihi, nagkadto ang mga mensahero sa Gibea+ nga siudad ni Saul* kag ginsugid nila sa katawhan ang mensahe, kag naghibi sing mabaskog ang tanan nga katawhan.  Apang nag-abot si Saul nga nagasunod sa iya panong halin sa latagon, kag nagsiling si Saul: “Ano ang natabo? Ngaa nagahinibi ang katawhan?” Gani ginsugid nila sa iya ang ginsiling sang mga lalaki sang Jabes.  Sang mabatian ini ni Saul, ginhatagan sia sing gahom sang espiritu sang Dios,+ kag naakig gid sia.  Gani nagkuha sia sing duha ka toro nga baka kag ginhiwahiwa ini. Dayon ginhatag niya ini sa mga mensahero agod dalhon sa tanan nga teritoryo sang Israel, nga nagasiling: “Amo sini ang himuon sa mga baka sang indi magsunod kay Saul kag kay Samuel!” Ginpahadlok ni Jehova ang katawhan amo nga naggua sila nga nahiusa.*  Dayon gin-isip niya sila sa Bezek, 300,000 ang mga Israelinhon kag 30,000 ang mga lalaki sang Juda.  Nagsiling sila sa nag-abot nga mga mensahero: “Amo ini ang isiling ninyo sa mga lalaki sang Jabes sa Gilead, ‘Sa mga udto buas, pagaluwason kamo.’ ” Gani naglakat ang mga mensahero kag ginsiling ini sa mga lalaki sang Jabes, kag nalipay gid sila. 10  Nagsiling ang mga lalaki sang Jabes sa mga Ammonhon: “Buas magaampo kami sa inyo, kag himua ninyo sa amon kon ano ang sa banta ninyo nga maayo.”+ 11  Pagkadason nga adlaw, ginbahinbahin ni Saul ang katawhan sa tatlo ka tropa, kag sang kaagahon* nagsulod sila sa kampo kag ginpamatay nila ang mga Ammonhon+ tubtob sa udto. Ang mga nakaluwas nag-alaplaag, kag ang kada isa nagpalagyo nga nagaisahanon. 12  Dayon nagsiling ang katawhan kay Samuel: “Sin-o ang nagsiling, ‘Si Saul bala ang magahari sa aton?’+ Itugyan sa amon ina nga mga tawo, kag patyon namon sila.” 13  Apang nagsiling si Saul: “Wala sing tawo nga patyon sa sini nga adlaw,+ kay ginluwas ni Jehova ang Israel subong nga adlaw.” 14  Sang ulihi, nagsiling si Samuel sa katawhan: “Dali, makadto kita sa Gilgal+ agod iproklamar liwat si Saul bilang hari.”+ 15  Gani nagkadto sa Gilgal ang tanan nga katawhan kag ginhimo nila nga hari si Saul sa atubangan ni Jehova sa Gilgal. Dayon naghalad sila didto sing mga halad sa pag-ambitanay sa atubangan ni Jehova,+ kag nagkasadya gid didto si Saul kag ang tanan nga katawhan sang Israel.+

Footnote

Ukon “Maghimo ka sing kasugtanan.”
Sa literal, “Gibea ni Saul.”
Sa literal, “bilang isa ka tawo.”
Mga alas dos sang kaagahon tubtob alas seis sang aga.