Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Biblia Online | BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

1 Samuel 10:1-27

BALAYAN SANG KAUNDAN

  • Si Saul ginhaplas nga hari (1-16)

  • Si Saul ginpakilala sa katawhan (17-27)

10  Dayon nagkuha si Samuel sing isa ka tibod sang lana kag ginbubo ini sa ulo ni Saul.+ Ginhalukan sia ni Samuel kag nagsiling sia: “Si Jehova ang naghaplas sa imo bilang lider+ sang iya katawhan.+  Paghalin mo karon, may makita ka nga duha ka lalaki malapit sa lulubngan ni Raquel+ sa teritoryo sang Benjamin sa Zelza, kag silingan ka nila, ‘Nakita na ang mga asno nga ginapangita mo, apang wala na nagakabalaka sa mga asno ang imo amay+ kundi nagakabalaka sia sa imo. Nagsiling ang imo amay: “Ano na lang ang himuon ko karon nga wala pa makabalik ang akon anak?” ’  Halin didto, magdiretso ka tubtob makalab-ot ka sa daku nga kahoy sa Tabor. May masugata ka didto nga tatlo ka lalaki nga nagapataklad sa Betel agod magsimba sa matuod nga Dios.+ Ang isa may dala nga tatlo ka tinday nga kanding, ang isa pa may dala nga tatlo ka tinapay, kag ang isa pa gid may dala nga isa ka daku nga tibod sang alak.  Kamustahon ka nila kag hatagan ka nila sing duha ka tinapay, kag dapat mo batunon ang mga tinapay.  Pagkatapos sini, makalab-ot ka sa bakulod sang matuod nga Dios, diin may garison sang mga Filistinhon. Kon makalab-ot ka na sa siudad, may masugata ka nga grupo sang mga manalagna nga nagapadulhog halin sa sagrado nga mataas nga duog. May nagauna sa ila nga mga tawo nga nagatokar sing de-kuerdas nga instrumento kag tamburin kag plawta kag arpa, samtang nagapanagna sila.  Ang espiritu ni Jehova magahatag sing gahom sa imo,+ kag magapanagna ka upod sa ila kag mangin tuhay ka nga tawo.+  Kon mahanabo ini nga mga tanda, himua ang bisan ano nga masarangan mo, bangod kaupod mo ang matuod nga Dios.  Dayon mag-una ka sa akon sa pagdulhog sa Gilgal,+ kag magaapas ako sa imo agod maghalad sing mga halad nga sinunog kag sing mga halad sa pag-ambitanay.* Maghulat ka sing pito ka adlaw tubtob mag-abot ako. Dayon ipahibalo ko sa imo kon ano ang himuon mo.”  Pagtalikod ni Saul kay Samuel agod maglakat, ginbag-o sang Dios ang iya kinaiya kag nangin pareho sia sa iban nga tawo, kag natabo ining tanan nga tanda sa sina nga adlaw. 10  Halin didto nagkadto sila sa bakulod, kag may nagsugata sa iya nga grupo sang mga manalagna. Ang espiritu sang Dios naghatag dayon sa iya sing gahom,+ kag nagpanagna sia+ upod sa ila. 11  Sang makita sia sang tanan nga nakakilala sa iya nga nagapanagna sia upod sa mga manalagna, nagsiling sila: “Ano ang natabo sa anak ni Kis? Si Saul bala isa man sa mga manalagna?” 12  Dayon ang isa ka tawo didto nagsiling: “Apang sin-o ang ila amay?” Amo kon ngaa nangin hambalanon* ini: “Si Saul bala isa man sa mga manalagna?”+ 13  Sang makatapos na sia sa pagpanagna, nagkadto sia sa mataas nga duog. 14  Sang ulihi, ang utod sang amay ni Saul nagsiling sa iya kag sa iya alagad: “Diin kamo nagkadto?” Nagsabat sia: “Ginpangita namon ang mga asno,+ apang wala namon ini makita. Gani nagkadto kami kay Samuel.” 15  Nagpamangkot ang tiyo ni Saul: “Palihug sugiri ako, ano ang ginsiling ni Samuel sa inyo?” 16  Nagsabat si Saul sa iya tiyo: “Ginsugiran niya kami nga nakita na ang mga asno.” Apang wala ginsugid ni Saul ang tuhoy sa paghari nga ginsiling ni Samuel sa iya. 17  Dayon gintipon ni Samuel ang katawhan sa atubangan ni Jehova sa Mizpa+ 18  kag nagsiling sia sa mga Israelinhon: “Amo ini ang ginasiling ni Jehova nga Dios sang Israel: ‘Ako ang nagpagua sang Israel sa Egipto kag ang nagluwas sa inyo sa Egipto+ kag sa tanan nga ginharian nga nagpigos sa inyo. 19  Apang ginasikway ninyo karon ang inyo Dios+ nga amo ang inyo Manluluwas sa tanan ninyo nga kabudlayan kag kalisdanan. Nagsiling pa kamo: “Indi! Hatagi kami sing hari.” Mag-atubang kamo karon kay Jehova suno sa inyo mga tribo kag suno sa inyo mga linibo.’ ”* 20  Gani ginpapalapit ni Samuel ang tanan nga tribo sang Israel,+ kag ang napilian amo ang tribo ni Benjamin.+ 21  Dayon ginpapalapit niya ang tribo ni Benjamin suno sa pamilya sini, kag ang napilian amo ang pamilya sang mga Matrinhon. Sang ulihi, ang napilian amo si Saul nga anak ni Kis.+ Apang sang ginpangita nila sia, wala nila sia makita. 22  Gani nagpamangkot sila kay Jehova:+ “Yari bala sia diri?” Nagsabat si Jehova: “Huo, nagapanago sia sa mga kargamento.” 23  Gani nagdalagan sila kag ginkuha nila sia didto. Sang magtindog sia sa tunga sang mga tawo, taga-abaga lang niya sila.+ 24  Nagsiling si Samuel sa tanan nga katawhan: “Nakita bala ninyo ang isa nga ginpili ni Jehova,+ nga wala sing pareho sa iya sa tanan nga katawhan?” Kag nagsinggit ang tanan nga katawhan: “Mabuhi ang hari!” 25  Dayon ginhambal ni Samuel sa katawhan ang kinamatarong sang mga hari+ kag ginsulat ini sa libro kag ginbutang ini sa atubangan ni Jehova. Dayon ginpapauli ni Samuel ang tanan nga katawhan sa ila mga balay. 26  Nagpauli man si Saul sa iya balay sa Gibea. Nag-upod sa iya ang mga soldado nga gintandog ni Jehova ang tagipusuon. 27  Apang ang pila sa wala sing pulos nga mga lalaki nagsiling: “Paano kita maluwas sini nga tawo?”+ Dayon gintamay nila sia, kag wala sila magdala sing regalo sa iya.+ Apang naghipos lang sia.*

Footnote

Ukon “mga dulot para sa paghidait,” mga dulot nga nagapakita nga ang nagadulot may paghidait sa Dios.
Ukon “hulubaton.”
Ukon “pamilya.”
Sa literal, “Kag daw pareho sia sa tawo nga indi makahambal.”