Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Biblia Online | BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

1 Hari 5:1-18

BALAYAN SANG KAUNDAN

  • Si Hari Hiram naghatag sing materyales (1-12)

  • Si Solomon nagpatawag sing mga trabahador (13-18)

5  Sang mabalitaan ni Hiram nga hari sang Tiro+ nga si Solomon ang ginhaplasan sa pagbulos sa iya amay bilang hari, ginpakadto niya ang iya mga alagad kay Solomon; kay madugay na nga abyan* ni Hiram si David.+  Nagpadala man sing mensahe si Solomon kay Hiram:+  “Nahibaluan mo gid nga ang akon amay nga si David wala makapatindog sing balay para sa kadungganan sang ngalan ni Jehova nga iya Dios bangod sang pagpakig-away niya sa madamo nga kaaway, tubtob ginpadaug sia ni Jehova batok sa ila.+  Apang karon ginhatagan ako ni Jehova nga akon Dios sing kalinong batok sa tanan ko nga kaaway sa palibot.+ Wala sing nagakontra sa akon, kag wala sing malain nga nagakatabo.+  Gani nagaplano ako nga magpatindog sing balay para sa kadungganan sang ngalan ni Jehova nga akon Dios, suno sa ginsaad ni Jehova kay David nga akon amay, ‘Ang imo anak nga ibulos ko sa imo sa trono amo ang mapatindog sing balay para sa kadungganan sang akon ngalan.’+  Gani sugua ang imo mga tinawo nga mang-utod sing mga kahoy nga sedro sa Lebanon+ para sa akon. Magaobra ang akon mga alagad upod sa imo mga alagad kag suhulan ko ang imo mga alagad suno sa isiling mo, kay nahibaluan mo nga wala gid diri sa amon sing makahibalo mang-utod sing mga kahoy pareho sang mga Sidonhon.”+  Sang mabatian ni Hiram ang mensahe ni Solomon, nalipay gid sia, kag nagsiling sia: “Kabay pa nga dayawon si Jehova, kay ginhatagan niya si David sing maalam nga anak nga maggahom sa sining madamo nga katawhan!”+  Gani nagpadala si Hiram sing mensahe kay Solomon: “Nabaton ko ang imo mensahe. Ihatag ko ang tanan nga kahoy nga sedro kag mga kahoy nga junipero nga kinahanglan mo.+  Hakuton ini sang akon mga alagad halin sa Lebanon pakadto sa dagat. Pangtabiron ko ang mga troso nga daw mga balsa kag palutawon sa dagat pakadto sa lugar nga isiling mo sa akon. Dayon ipabungkag ko ini didto kag kuhaon mo ini. Bilang bayad, hatagan mo ako sing kalan-on para sa akon panimalay.”+ 10  Gani ginhatag ni Hiram kay Solomon ang tanan nga kahoy nga sedro kag junipero nga kinahanglan niya. 11  Kag ginhatagan ni Solomon si Hiram sing 20,000 ka cor* nga trigo nga kalan-on sang iya panimalay, kag 20 ka cor nga puro nga lana sang olibo. Amo ini ang ginahatag ni Solomon kay Hiram kada tuig.+ 12  Ginhatagan ni Jehova si Solomon sing kaalam suno sa ginsaad Niya sa iya.+ May paghidait sa tunga ni Hiram kag ni Solomon, kag naghimo sila nga duha sing kasugtanan.* 13  Nagpatawag si Hari Solomon halin sa Israel sing 30,000 ka tawo nga magtrabaho para sa iya.+ 14  Kada bulan, 10,000 ang ginapadala niya sa Lebanon. Nagatener sila sing isa ka bulan sa Lebanon kag sing duha ka bulan sa ila balay. Si Adoniram+ ang nagadumala sa ginpatawag nga mga trabahador. 15  Si Solomon may 70,000 ka trabahador* kag 80,000 ka manugbasbas sing bato+ sa bukid,+ 16  wala labot sa 3,300 ka administrador ni Solomon+ nga amo man ang porman nga nagadumala sa mga trabahador. 17  Ginsugo sila sang hari nga magbasbas sing dalagku kag maayo sing klase nga mga bato,+ agod himuon nga pundasyon+ sang balay.+ 18  Gani ang mga manugtukod ni Solomon kag ni Hiram kag ang mga Gebalnon+ amo ang nagbasbas sing mga bato, kag ginhanda nila ang mga kahoy kag mga bato sa pagpatindog sing balay.

Footnote

Ukon “ginahigugma.”
Ang isa ka cor katumbas sang 220 ka litro. Tan-awa ang Apendise B14.
Ukon “katipan.”
Ukon “manugpas-an sing lulan.”