Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

1 Cronica 19:1-19

BALAYAN SANG KAUNDAN

  • Mga mensahero ni David gin-insulto sang mga Ammonhon (1-5)

  • Kadalag-an sa Ammon kag Siria (6-19)

19  Sang ulihi, napatay si Nahas nga hari sang mga Ammonhon, kag ang iya anak amo ang nagbulos sa iya bilang hari.+  Nagsiling si David: “Pakitaan ko sing mainunungon nga gugma+ si Hanun nga anak ni Nahas, kay ang iya amay nagpakita man sing mainunungon nga gugma sa akon.” Gani nagpadala si David sing mga mensahero agod lugpayan sia sa pagkapatay sang iya amay. Apang pag-abot sang mga alagad ni David sa duta sang mga Ammonhon+ agod lugpayan si Hanun,  nagsiling ang mga pangulo sang mga Ammonhon kay Hanun: “Sa banta mo nagpadala si David sing mga alagad sa paglugpay sa imo bilang pagpadungog sa imo amay? Indi ayhan nga nagpadala sia sang iya mga alagad agod manilag kag mangespiya sa aton duta kag pukanon ka?”  Gani ginpadakop ni Hanun ang mga alagad ni David kag ginbarbasan sila+ kag gingutrab ang ila bayo halin sa balikawang paidalom kag dayon ginpalakat sila.  Sang ginsugid nila kay David ang tuhoy sa mga alagad, nagpadala sia dayon sing mga tinawo sa pagsugata sa ila, kay nahuy-an gid sila. Ginsilingan sila sang hari: “Magpabilin kamo anay sa Jerico+ tubtob maglaba ang inyo burangos, dayon magbalik na kamo diri.”  Sang ulihi, narealisar sang mga Ammonhon nga naakig gid sa ila si David, gani nagpadala si Hanun kag ang mga Ammonhon sing 1,000 ka talanton* nga pilak agod ibayad para sa mga kangga kag mga manugkabayo halin sa Mesopotamia,* sa Aram-maaca, kag sa Zoba.+  Nagbayad sila para sa 32,000 ka kangga, kag sa hari sang Maaca kag sa iya katawhan. Dayon nagkadto sila sa atubangan sang Medeba+ kag nagkampo didto. Nagtipon man ang mga Ammonhon halin sa ila mga siudad agod magpakig-away.  Sang mabalitaan ini ni David, ginpadala niya si Joab+ kag ang tanan nga soldado, pati ang iya isganan gid nga mga hangaway.+  Nagpuesto sa pagpakig-away ang mga Ammonhon sa alagyan pasulod sa siudad, samtang ang mga hari nagpuesto sa latagon. 10  Sang makita ni Joab nga may mga kaaway sa iya atubang kag likod, nagpili sia sing pila sang pinakamaayo nga mga soldado sa Israel kag ginpapuesto niya sila agod magpakig-away sa mga Sirianhon.+ 11  Gintangdo niya si Abisai+ nga iya utod nga pangunahan* ang nabilin nga mga soldado kag ginpapuesto sila agod magpakig-away sa mga Ammonhon. 12  Dayon nagsiling sia: “Kon makita mo nga daw mapierde na kami sang mga Sirianhon,+ buligan ninyo kami; apang kon daw mapierde na kamo sang mga Ammonhon, buligan namon kamo. 13  Magpakabakod kita kag magpakaisog+ para sa aton katawhan kag para sa mga siudad sang aton Dios, kag himuon ni Jehova kon ano ang maayo sa iya panulok.” 14  Dayon ginsalakay ni Joab kag sang iya mga soldado ang mga Sirianhon, kag nagpinalagyo sila sa iya.+ 15  Sang makita sang mga Ammonhon nga nagpinalagyo ang mga Sirianhon, nagpinalagyo man sila kay Abisai nga iya utod kag nagsulod sa ila siudad. Pagkatapos sini, nagkadto si Joab sa Jerusalem. 16  Sang makita sang mga Sirianhon nga napierde sila sang Israel, nagpadala sila sing mga mensahero agod tawgon ang mga Sirianhon nga yara sa rehiyon sang Suba,*+ kag ginapangunahan sila ni Sofac* nga pangulo sang mga soldado ni Hadadezer.+ 17  Sang ginbalita ini kay David, gintipon niya dayon ang bug-os nga Israel kag nagtabok sila sa Jordan kag nagpuesto sa pagpakig-away sa ila. Nagpuesto si David agod sugataon ang mga Sirianhon, kag nagpakig-away sila sa iya.+ 18  Apang nagpinalagyo ang mga Sirianhon sa mga Israelinhon; kag 7,000 ka soldado nga nagasakay sa kangga kag 40,000 ka iban pa nga soldado ang napatay ni David sa mga Sirianhon kag napatay man niya si Sofac nga pangulo sang mga soldado. 19  Sang makita sang mga alagad ni Hadadezer nga napierde na sila sang Israel,+ nagpakighidait sila dayon kay David kag nagpasakop sa iya;+ kag indi na luyag sang Siria nga magbulig sa mga Ammonhon.

Footnote

Ang isa ka talanton katumbas sang 34.2 ka kilo. Tan-awa ang Apendise B14.
Sa literal, “Aram-naharaim.”
Sa literal, “Gintugyan niya sa kamot ni Abisai nga iya utod.”
Eufrates.
“Sobac” sa 2Sa 10:16.