Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Biblia Online | BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

1 Cronica 16:1-43

BALAYAN SANG KAUNDAN

  • Ang Kaban ginbutang sa tolda (1-6)

  • Ambahanon sang pagpasalamat (7-36)

    • “Si Jehova Hari na!” (31)

  • Pag-alagad sa Kaban (37-43)

16  Ginbutang nila ang Kaban sang matuod nga Dios sa sulod sang tolda nga ginpatindog ni David;+ kag naghalad sila sa matuod nga Dios sing mga halad nga sinunog kag mga halad sa pag-ambitanay.*+  Sang matapos na ni David ang paghalad sing mga halad nga sinunog+ kag mga halad sa pag-ambitanay,+ ginpakamaayo niya ang katawhan sa ngalan ni Jehova.  Dayon ginhatagan niya ang tanan nga Israelinhon, lalaki kag babayi, sing tipulon nga tinapay, sing tinapay nga halin sa bunga sang palma, kag sing tinapay nga pasas.  Gintangdo niya ang pila ka Levinhon agod mag-alagad sa atubangan sang Kaban ni Jehova,+ sa pagpadungog,* sa pagpasalamat, kag sa pagdayaw kay Jehova nga Dios sang Israel.  Si Asaf+ ang nagapanguna kag ang ikaduha sa iya amo si Zacarias; dayon si Jeiel, si Semiramot, si Jehiel, si Matitias, si Eliab, si Benaias, si Obed-edom, kag si Jeiel+ ang mga nagatokar sing de-kuerdas nga mga instrumento kag mga arpa.+ Si Asaf ang nagapatunog sing mga simbal.+  Si Benaias kag si Jahaziel nga mga saserdote ang nagapatunog pirme sing mga trumpeta sa atubangan sang kaban sang katipan sang matuod nga Dios.  Sadto nga adlaw sa una nga tion, naghimo si David sing ambahanon sang pagpasalamat kay Jehova kag ginhatag niya ini kay Asaf+ kag sa iya mga utod:  “Magpasalamat kamo kay Jehova,+ magpanawag kamo sa iya ngalan, Ipahayag sa katawhan ang iya mga binuhatan!+  Mag-amba kamo sa iya, mag-amba kamo sing mga pagdayaw* sa iya,+ Pamalandungi* ang tanan niya nga makatilingala nga binuhatan.+ 10  Ipabugal ninyo ang iya balaan nga ngalan.+ Magkasadya ang tagipusuon sang mga nagapangita kay Jehova.+ 11  Pangitaa si Jehova+ kag mangayo kamo sa iya sing kusog. Pangitaa ninyo pirme ang iya nawong.*+ 12  Dumduma ninyo ang iya makatilingala nga mga binuhatan,+ Ang iya mga milagro kag ang iya mga paghukom, 13  Kamo nga mga kaliwat* ni Israel nga iya alagad,+ Kamo nga mga anak ni Jacob, nga iya mga pinili.+ 14  Sia si Jehova nga aton Dios.+ Ginahukman niya ang bug-os nga duta.+ 15  Dumduma ninyo sa wala sing katubtuban ang iya katipan, Ang saad nga iya ginhimo* sa linibo ka kaliwatan,+ 16  Ang katipan nga iya ginhimo kay Abraham,+ Kag ang ginpanumpa niya kay Isaac,+ 17  Nga iya ginhimo nga isa ka mando kay Jacob+ Kag isa ka dayon nga katipan kay Israel, 18  Nga nagasiling: ‘Ihatag ko sa imo ang duta sang Canaan,+ Subong inyo bahin nga palanublion.’+ 19  Ginsiling niya ini sang diutay pa lamang kamo, Tuman ka diutay, kag mga dumuluong kamo sa sini nga duta.+ 20  Nagsaylosaylo sila sa mga pungsod, Halin sa isa ka ginharian pakadto sa iban nga katawhan.+ 21  Wala niya pagtuguti ang bisan sin-o nga piguson sila,+ Apang ginsabdong niya ang mga hari bangod sa ila,+ 22  Nga nagasiling, ‘Indi ninyo pagtanduga ang akon mga hinaplas, Kag indi paghaliti ang akon mga manalagna.’+ 23  Mag-amba kamo kay Jehova, kamo tanan sa duta! Isugid ninyo sa adlaw-adlaw ang tuhoy sa iya pagluwas!+ 24  Ipahayag ninyo ang iya himaya sa mga pungsod, Ang iya makatilingala nga mga binuhatan sa tanan nga katawhan. 25  Kay si Jehova gamhanan kag labi gid nga takus dayawon. Makahalawhaw sia labaw sa tanan nga dios.+ 26  Ang tanan nga dios sang katawhan wala sing pulos nga mga dios,+ Apang si Jehova amo ang naghimo sang kalangitan.+ 27  Yara sa iya presensia ang pagkahalangdon* kag ang himaya;+ Yara sa iya ginapuy-an ang kusog kag ang kalipay.+ 28  Padunggi ninyo si Jehova, kamo nga mga pamilya sang katawhan, Padunggi ninyo si Jehova bangod sang iya himaya kag kusog.+ 29  Ihatag ninyo kay Jehova ang himaya nga nagakadapat sa iya ngalan;+ Magdala kamo sing regalo kag magpalapit sa iya.+ Magyaub* kamo kay Jehova nga nagasul-ob sing balaan nga panapton.*+ 30  Magkurog* kamo sa kahadlok bangod sa iya, kamo tanan nga katawhan sa duta! Napasad sing malig-on ang duta;* indi gid ini matay-ug.*+ 31  Magkasadya ang langit, kag magkalipay ang duta;+ Ibantala sa mga pungsod: ‘Si Jehova Hari na!’+ 32  Magdaguhob ang dagat kag ang tanan nga yara sa sini; Magkasadya ang mga latagon kag ang tanan nga yara sa sini. 33  Magsinggit man sa kalipay ang mga kahoy sa kagulangan sa atubangan ni Jehova, Kay magakari* sia sa paghukom sa duta. 34  Magpasalamat kamo kay Jehova, kay maayo sia;+ Ang iya mainunungon nga gugma wala sing katapusan.+ 35  Magsiling kamo, ‘Luwasa kami, O Dios sang amon kaluwasan,+ Tipuna kami halin sa mga pungsod kag luwasa kami, Agod magpasalamat kami sa imo balaan nga ngalan+ Kag maghugyaw sa pagdayaw sa imo.*+ 36  Kabay pa nga dayawon si Jehova nga Dios sang Israel Tubtob sa wala sing katubtuban.’ ”* Ang tanan nga katawhan nagsiling, “Amen!”* kag gindayaw nila si Jehova. 37  Dayon ginbilin ni David sa atubangan sang kaban sang katipan ni Jehova si Asaf+ kag ang iya mga utod sa pag-alagad pirme sa atubangan sang Kaban,+ suno sa kinahanglan himuon kada adlaw.+ 38  Ginbilin man niya si Obed-edom kag ang 68 niya ka utod. Ginhimo niya si Obed-edom nga anak ni Jedutun kag si Hosa bilang mga manugbantay sang gawang. 39  Gintangdo niya si Zadok+ nga saserdote kag ang iya kaupod nga mga saserdote sa atubangan sang tabernakulo ni Jehova sa sagrado nga mataas nga duog sa Gibeon,+ 40  agod maghalad pirme sing dulot nga sinunog kay Jehova sa halaran sang dulot nga sinunog sa aga kag gab-i, kag agod tumanon nila ang tanan nga nasulat sa Kasuguan ni Jehova nga ginsugo niya sa Israel.+ 41  Kaupod nila si Heman, si Jedutun,+ kag ang iban pa nga ginpili nga mga lalaki agod magpasalamat kay Jehova,+ bangod “ang iya mainunungon nga gugma wala sing katapusan.”+ 42  Kaupod man nila si Heman+ kag si Jedutun sa pagpatunog sing mga trumpeta, sing mga simbal, kag sing iban pa nga mga instrumento nga ginagamit sa pagdayaw sa* matuod nga Dios; kag ang mga anak ni Jedutun+ yara sa gawang. 43  Dayon nagpauli ang tanan nga katawhan, kag nagpauli man si David agod pakamaayuhon ang iya panimalay.

Footnote

Ukon “mga dulot para sa paghidait,” mga dulot nga nagapakita nga ang nagadulot may paghidait sa Dios.
Sa literal, “pagdumdom.”
Ukon “maglanton kamo.”
Ukon mahimo, “Ihambal.”
Ukon “presensia.”
Sa literal, “binhi.”
Sa literal, “Ang pulong nga iya ginsugo.”
Ukon “kadungganan.”
Ukon “Magsimba.”
Ukon mahimo, “bangod sang pagkahalangdon sang iya pagkabalaan.”
Ukon “Magbatyag sing tuman nga kasakit.”
Ukon “mapatubason nga duta.”
Ukon “mag-uyog; mationg.”
Ukon “nagkari.”
Ukon “maghugyaw sa imo kadayawan.”
Ukon “Halin sa wala sing katapusan tubtob sa wala sing katapusan.”
Ukon “Kabay pa.”
Ukon “mga instrumento sang ambahanon sang.”