Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Biblia Online | BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON)

1 Cronica 14:1-17

BALAYAN SANG KAUNDAN

  • Paghari ni David ginpalig-on (1, 2)

  • Ang pamilya ni David (3-7)

  • Napierde ang mga Filistinhon (8-17)

14  Nagpadala sing mga mensahero si Hari Hiram+ sang Tiro kay David. Nagpadala man sia sing mga kahoy nga sedro, sing mga mason,* kag mga panday agod patindugan sia sing balay.*+  Nahibaluan ni David nga ginpalig-on ni Jehova ang iya paghari sa Israel,+ kay ginpauswag ang iya ginharian tungod sa Iya katawhan nga Israel.+  Nagdamo pa ang mga asawa ni David+ sa Jerusalem, kag nagdamo pa gid ang anak nga lalaki kag anak nga babayi ni David.+  Amo ini ang mga ngalan sang iya mga anak nga natawo sa Jerusalem:+ si Samua, si Sobab, si Natan,+ si Solomon,+  si Ibhar, si Elisua, si Elpelet,  si Noga, si Nefeg, si Jafia,  si Elisama, si Beeliada, kag si Elifelet.  Sang mabalitaan sang mga Filistinhon nga ginhaplasan si David bilang hari sang bug-os nga Israel,+ ginpangita sang tanan nga Filistinhon si David.+ Sang mabalitaan ini ni David, naglakat sia sa pagpakig-away sa ila.  Dayon nag-abot ang mga Filistinhon kag nagsalakay sila sa Nalupyakan* sang Refaim.+ 10  Nagpamangkot si David sa Dios: “Salakayon ko bala ang mga Filistinhon? Itugyan mo bala sila sa akon kamot?” Nagsabat si Jehova sa iya: “Salakaya sila, kay itugyan ko gid sila sa imo kamot.”+ 11  Gani nagkadto si David sa Baal-perazim,+ kag ginpamatay niya sila didto. Bangod sini, nagsiling si David: “Ginlaglag sang matuod nga Dios ang akon mga kaaway paagi sa akon kamot, pareho sang pagbulwang sang tubig.” Amo kon ngaa gintawag nila yadto nga lugar nga Baal-perazim.* 12  Ginbilin sang mga Filistinhon ang ila mga dios didto, kag ginsunog nila ini,+ suno sa ginsugo ni David. 13  Sang ulihi, nagsalakay liwat ang mga Filistinhon sa nalupyakan.*+ 14  Gani nagpamangkot liwat si David sa Dios, apang nagsabat ang matuod nga Dios: “Indi sila pagsalakaya sa atubangan, kundi liputa sila, kag salakaya sila sa atubangan sang mga tanom nga baca.+ 15  Kon mabatian mo nga daw may nagamartsa sa ibabaw nayon sang mga tanom nga baca, magsalakay ka dayon, kay magauna ang matuod nga Dios sa imo sa pagpamatay sa Filistinhon nga mga soldado.”+ 16  Gani ginhimo ni David ang ginsugo sang matuod nga Dios sa iya,+ kag ginpamatay nila ang Filistinhon nga mga soldado halin sa Gibeon tubtob sa Gezer.+ 17  Kag nangin bantog si David sa tanan nga kadutaan, kag ginpahanabo ni Jehova nga kahadlukan sia sang tanan nga pungsod.+

Footnote

Ukon “manugpatindog sing pader.”
Ukon “palasyo.”
Ukon “Manubo nga Patag.”
Buot silingon, “Agalon sang Pagbulwang.”
Ukon “manubo nga patag.”