Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON) Tan-awa ang 2014 nga edisyon

Tito 3:1-15

3  Padayon nga ipahanumdom sa ila nga magpasakop kag mangin matinumanon sa mga panguluhan kag mga awtoridad subong mga manuggahom, nga mangin handa para sa tagsa ka maayong buhat,  nga wala nagapakalain kay bisan sin-o, nga indi mangin palaaway, nga mangin makatarunganon, kag nagapakita sang bug-os nga kalulo sa tanan nga tawo.  Kay kita man sang una mga buangbuang, di-matinumanon, napatalang, mga ulipon sa nanuhaytuhay nga kailigbon kag kinalipay, nagapadayon sa kalainan kag kahisa, makangilil-ad, nagadinumtanay.  Apang, sang napadayag ang kaayo kag ang gugma sa tawo sang aton Manluluwas, ang Dios,  indi bangod sa mga buhat sang pagkamatarong nga aton nahimo, kundi suno sa iya kaluoy ginluwas niya kita paagi sa paghugas nga nagdala sa aton sa kabuhi kag paagi sa pagpabag-o sa aton sang balaan nga espiritu.  Ini nga espiritu ginpasagahay niya sing bugana sa aton paagi kay Jesucristo nga aton Manluluwas,  agod sa tapos mapahayag nga matarong bangod sang wala tupong nga kaayo sinang isa, mangin mga manunubli kita suno sa paglaum nga kabuhi nga walay katapusan.  Masaligan ang pinamulong, kag luyag ko nga iinsister mo gid pirme ini nga mga butang, agod hunahunaon sang mga nagatuo sa Dios ang paghimo sing maayong mga buhat. Ining mga butang maayo kag mapuslanon sa mga tawo.  Apang likawi ang binuang nga mga pagpamangkot kag mga listahan sang mga kaliwatan kag mga pagpinuyas kag mga pag-inaway nahanungod sa Kasuguan, kay wala ini sing mahatag nga kaayuhan kag wala sing pulos. 10  Tuhoy sa tawo nga nagapasanyog sang isa ka sekta, sikwaya sia pagkatapos sang una kag ikaduha nga laygay; 11  kay nahibal-an mo nga ang amo nga tawo nagsipak sa banas kag nagapakasala, kag ginapakamalaut sia sang iya kaugalingon. 12  Kon mapakadto ko sa imo si Artemas ukon si Tiquico, himua ang imo bug-os nga masarangan nga magkari sa akon sa Nicopolis, kay namat-od ako nga didto magpaligad sing tigtulugnaw. 13  Pabaluni gid si Zenas, nga batid sa Kasuguan, kag si Apolos sa ila pagpanglakaton, agod indi sila makulangan sang bisan ano. 14  Apang ang aton katawhan magtuon man nga himuon ang maayong mga buhat agod mahatag ang ila importante nga mga kinahanglanon, agod indi sila mangin di-mabungahon. 15  Ang tanan nga kaupod ko nagapadala sa imo sang ila panamyaw. Ipalab-ot ang akon panamyaw sa mga nagapalangga sa aton sa pagtuo. Kabay nga mangin yara sa inyo tanan ang wala tupong nga kaayo.

Footnote