Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON) Tan-awa ang 2014 nga edisyon

Tito 2:1-15

2  Apang, padayon ka nga maghambal sang mga butang nga nagakaigo sa makapapagros nga panudlo.  Ang tigulang nga mga lalaki mangin haganhagan sa mga batasan, serioso, maligdong sing hunahuna, mapagros sa pagtuo, sa gugma, sa pagbatas.  Subong man, ang tigulang nga mga babayi maggawi subong mga balaan, indi mabinutangbutangon, wala naulipon sa madamo nga alak, mga manunudlo sang maayo;  agod mapasag-uli nila ang kaligdong sang lamharon nga mga babayi nga higugmaon ang ila bana, nga higugmaon ang ila mga anak,  nga mangin maligdong sing hunahuna, putli, mga manugpangabudlay sa puluy-an, maayo, nagapasakop sa ila bana, agod ang pulong sang Dios indi mapasipalahan.  Subong man padayon nga laygayi ang lamharon nga mga lalaki nga mangin maligdong sing hunahuna,  nga sa tanan nga butang nagapakita sang imo kaugalingon subong halimbawa sa maayong mga buhat; nagapakita sang pagkabunayag sa imo panudlo, sang pagkaserioso,  sang maayo nga panghambal nga indi mapakamalaut; agod ang tawo nga nagapamatok mahuy-an, bangod wala sia sing malain nga mahambal nahanungod sa aton.  Ang mga ulipon magpasakop sa mga nagapanag-iya sa ila sa tanan nga butang, kag pahamut-an gid sila, nga wala nagasabat sing mabinatuon, 10  wala nagapangawat, kundi nagapakita sang bug-os nga katutom, agod sa tanan nga butang mapunihan nila ang panudlo sang aton Manluluwas, ang Dios. 11  Kay ang wala tupong nga kaayo sang Dios nga nagadala sang kaluwasan sa tanan nga sahi sang mga tawo napadayag na, 12  nga nagatudlo sa aton nga sikwayon ang pagkadidiosnon kag kalibutanon nga mga kailigbon kag magkabuhi nga may maligdong nga hunahuna kag pagkamatarong kag diosnon nga debosyon sa tunga sining karon nga sistema sang mga butang, 13  samtang ginahulat naton ang makalilipay nga paglaum kag mahimayaon nga pagpadayag sang daku nga Dios kag sang aton Manluluwas, si Cristo Jesus, 14  nga naghatag sang iya kaugalingon para sa aton agod maluwas niya kita gikan sa tanan nga sahi sang pagkamalinapason kag tinluan para sa iya kaugalingon ang katawhan nga iya lang gid, nga makugi sa maayong mga buhat. 15  Padayon ka nga maghambal sini nga mga butang kag maglaygay kag magsabdong nga may bug-os nga awtoridad sa pagsugo. Wala sing tawo nga magtamay sa imo.

Footnote