Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON) Tan-awa ang 2014 nga edisyon

Santiago 5:1-20

5  Kari kamo karon, kamo nga manggaranon, maghibi kamo, nga nagatiyabaw bangod sa kalisdanan nga magaabot sa inyo.  Ang inyo manggad nagakadunot kag ang inyo mga panapton ginaut-ot sang sipit.  Ang inyo bulawan kag pilak ginatuktok, kag ang tuktok sini mangin saksi batok sa inyo kag magakaon sang inyo unod. Isa ka butang nga kaangay sang kalayo ang inyo natipon sa katapusan nga mga adlaw.  Yari karon! Ang mga suhol nga nagakadapat sa mga mamumugon nga nag-ani sa inyo mga uma apang gindingot ninyo, padayon nga nagasinggit, kag ang pagpangayo sing bulig sang mga mangangani naglab-ot na sa mga dulunggan ni Jehova sang mga kasuldadusan.  Nagkabuhi kamo sing maluho sa duta kag nagpatuyang sa undanon nga pagpangalipay. Ginpatambok ninyo ang inyo tagipusuon para sa adlaw sang pagpamatay.  Nagpakamalaut kamo, ginpatay ninyo ang matarong. Indi bala nga nagapamatok sia sa inyo?  Gani magpailob kamo, mga kauturan, tubtob sa presensia sang Ginuo. Yari karon! Ang mangunguma padayon nga nagahulat sang hamili nga bunga sang duta, nga nagapailob sa sini tubtob mabaton niya ang una nga ulan kag ulihi nga ulan.  Magpailob man kamo; palig-una ang inyo tagipusuon, bangod ang presensia sang Ginuo malapit na.  Indi kamo magkumod batok sa isa kag isa, mga kauturan, agod indi kamo paghukman. Yari karon! Ang Hukom nagatindog sa atubangan sang mga ganhaan. 10  Mga kauturan, himua nga sulundan sa pag-antos sing kalautan kag sa pagpailob ang mga manalagna, nga naghambal sa ngalan ni Jehova. 11  Yari karon! Ginapahayag naton nga malipayon ang mga nagbatas. Nabatian ninyo ang pagbatas ni Job kag nakita ang resulta nga ginhatag ni Jehova, kag nakita ninyo nga si Jehova mapinalanggaon gid kag maluluy-on. 12  Apang labaw sa tanan, mga kauturan ko, indi na kamo magpanumpa, tungod sa langit ukon tungod sa duta ukon tungod sa iban pa nga panumpa. Apang dapat nga ang inyo Huo magakahulugan sang Huo, kag ang inyo Indi, Indi, agod indi kamo paghukman. 13  May nagaantos bala sang malaut sa inyo? Magpadayon sia sa pagpangamuyo. May isa bala nga malipayon? Mag-amba sia sang mga salmo. 14  May nagamasakit bala sa inyo? Magtawag sia sang mga gulang nga lalaki sang kongregasyon, kag magpangamuyo sila para sa iya, nga nagahaplas sa iya sang lana sa ngalan ni Jehova. 15  Kag ang pangamuyo nga may pagtuo magaayo sa isa nga nagamasakit, kag si Jehova magabangon sa iya. Subong man, kon nakahimo sia sang mga sala, patawaron sia. 16  Busa itu-ad ninyo sing dayag ang inyo mga sala sa isa kag isa kag ipangamuyo ninyo ang isa kag isa, agod mag-ayo kamo. Ang pag-ampo sang matarong nga tawo, kon nagapanghikot ini, may daku nga puersa. 17  Si Elias isa ka tawo nga may balatyagon kaangay sang aton, apang nagpangamuyo sia sing hanuot nga indi mag-ulan; kag wala mag-ulan sa duta sa sulod sang tatlo ka tuig kag anom ka bulan. 18  Kag nangamuyo sia liwat, kag ang langit naghatag sang ulan kag ang duta nagpatubas sang bunga sini. 19  Mga kauturan ko, kon may isa sa inyo nga nagtalang gikan sa kamatuoran kag may isa nga nagapabalik sa iya, 20  hibalua nga ang nagapabalik sa makasasala gikan sa iya sayop nga dalanon magaluwas sang iya kalag gikan sa kamatayon kag magatabon sang madamo nga sala.

Footnote