Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON) Tan-awa ang 2014 nga edisyon

Roma 10:1-21

10  Mga kauturan, ang maayong kabubut-on sang akon tagipusuon kag ang akon pag-ampo sa Dios tungod sa ila para gid sa ila kaluwasan.  Kay nagapanaksi ako tuhoy sa ila nga may kakugi sila sa Dios; apang indi suno sa sibu nga ihibalo;  kay wala sila magpasakop sa pagkamatarong sang Dios bangod wala nila mahibaluan ang pagkamatarong sang Dios kundi nagatinguha sa pagtukod sang ila kaugalingon nga pagkamatarong.  Kay si Cristo amo ang katapusan sang Kasuguan, agod ang tagsatagsa nga nagatuo makatigayon sang pagkamatarong.  Kay si Moises nagsulat nga ang tawo nga nagahimo sang pagkamatarong sang Kasuguan magakabuhi paagi sa sini.  Apang ang pagkamatarong nga resulta sang pagtuo nagasiling sa sining paagi: “Indi ka magsiling sa imo tagipusuon, ‘Sin-o ang magakayab sa langit?’ nga kon sayuron, sa pagpapanaug kay Cristo;  ukon, ‘Sin-o ang magapanaug sa kadadalman?’ nga kon sayuron, sa pagpasaka kay Cristo gikan sa mga patay.”  Apang ano ang ginasiling sini? “Ang pulong malapit sa imo, sa imo kaugalingon nga baba kag sa imo kaugalingon nga tagipusuon”; kon sayuron, ang “pulong” sang pagtuo, nga amon ginabantala.  Kay kon ginapahayag mo sing dayag ini nga ‘pulong sa imo kaugalingon nga baba,’ nga si Jesus Ginuo, kag nagatuo sa imo tagipusuon nga ang Dios nagbanhaw sa iya gikan sa mga patay, maluwas ka. 10  Kay paagi sa tagipusuon ang isa nagatuo para sa pagkamatarong, apang paagi sa baba ang isa nagapahayag sing dayag para sa kaluwasan. 11  Kay ang Kasulatan nagasiling: “Wala sing bisan sin-o nga nagapasad sang iya pagtuo sa iya ang malugaw-an.” 12  Kay wala sing kinatuhayan sa ulot sang Judiyo kag sang Griego, kay may isa lamang ka Ginuo sa tanan, nga nagapamanggad sa tanan nga nagapanawag sa iya. 13  Kay “ang tagsatagsa nga nagatawag sa ngalan ni Jehova maluwas.” 14  Apang, paano sila magatawag sa iya nga wala nila ginatuuhan? Paano naman sila magatuo sa iya nga wala nila mabatian? Paano naman sila makabati kon wala sing isa nga magbantala? 15  Paano naman sila magabantala kon wala sila ginpadala? Subong sang nasulat na: “Daw ano katahom sang mga tiil sang mga nagapahayag sang maayong balita tuhoy sa maayo nga mga butang!” 16  Apang, indi ang tanan sa ila nagtuman sa maayong balita. Kay si Isaias nagasiling: “Jehova, sin-o ang nagtuo sa butang nga nabatian gikan sa amon?” 17  Gani ang pagtuo nagasunod sa butang nga nabatian. Ang butang nga nabatian naman paagi sa pulong tuhoy kay Cristo. 18  Apang nagapamangkot ako, Wala sila mapaslawan sa pagpamati, indi bala? Sa katunayan, “sa bug-os nga duta ang ila tunog naggua, kag ang ila mga pinamulong tubtob sa mga ukbong sang napuy-an nga duta.” 19  Apang nagapamangkot ako, Wala mapaslawan ang Israel sa paghibalo, indi bala? Una nagsiling si Moises: “Pukawon ko kamo sa kaimon paagi sa isa nga indi pungsod; pukawon ko kamo sa masingki nga kaakig paagi sa buangbuang nga pungsod.” 20  Apang si Isaias nangin maisog gid kag nagsiling: “Nakita ako sang mga wala nagapangita sa akon; nangin dayag ako sa mga wala nagapamangkot tuhoy sa akon.” 21  Apang nahanungod sa Israel nagsiling sia: “Sa bug-os nga adlaw gin-untay ko ang akon mga kamot sa katawhan nga di-matinumanon kag nagasabat sing mabinatuon.”

Footnote