Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON) Tan-awa ang 2014 nga edisyon

Hebreo 13:1-25

13  Padayon ninyo nga ipakita ang inyo utudnon nga gugma.  Indi ninyo pagkalimti ang pagkamaabiabihon kay paagi sini, wala mahibaluan sang iban nga gin-amuma nila ang mga anghel.  Dumduma ninyo ang mga yara sa mga gapos sang pagkabilanggo subong bala nga nagapos kamo kaupod nila, kag ang mga ginapintasan, sanglit kamo man mismo yara pa sa undanon nga lawas.  Ang pag-asawahay mangin dungganon sa tanan, kag ang hiligdaan sang pag-asawahay mangin wala sing dagta, kay hukman sang Dios ang mga makihilawason kag mga makihilahion.  Ang inyo paagi sang pagkabuhi mangin wala sing gugma sa kuarta, samtang kontento kamo sa mga butang karon. Kay sia nagsiling: “Indi ko gid kamo pagbayaan ukon pagpatumbayaan.”  Agod mangin maisog gid kita kag magsiling: “Si Jehova ang akon manugbulig; indi ako magkahadlok. Ano ang mahimo sang tawo sa akon?”  Dumduma ang mga nagapanguna sa inyo, nga naghambal sang pulong sang Dios sa inyo, kag samtang ginapanilagan ninyo ang resulta sang ila paggawi iluga ang ila pagtuo.  Si Jesucristo amo gihapon kahapon kag karon, kag tubtob san-o.  Indi kamo magpadala sa nagkalainlain kag tuhay nga mga panudlo; kay maayo nga ang tagipusuon palig-unon paagi sa wala tupong nga kaayo, indi paagi sa kalan-on, nga wala mapuslan sang mga maukod sa sini. 10  May yara kita halaran nga sa sini wala sing kinamatarong nga magkaon ang mga nagahimo sang sagrado nga pag-alagad sa tolda. 11  Kay ang mga lawas sini nga mga sapat nga ang dugo ginadala sang mataas nga saserdote sa balaan nga duog subong halad tungod sa sala ginasunog sa gua sang kampo. 12  Gani si Jesus nag-antos man sa gua sang gawang agod mapakabalaan niya ang katawhan paagi sa iya kaugalingon nga dugo. 13  Gani, magkadto kita sa iya sa gua sang kampo, nga nagadala sang kahuluy-an nga iya gindala, 14  kay wala kita diri sing siudad nga nagapabilin, kundi maukod nga ginapangita naton ang isa nga magaabot. 15  Paagi sa iya magdulot kita pirme sa Dios sang halad sang pagdayaw, nga amo ang bunga sang mga bibig nga dayag nga nagapahayag sang iya ngalan. 16  Dugang pa, indi pagkalimti ang paghimo sing maayo kag ang pagpaambit sing mga butang sa iban, kay nahamuot gid ang Dios sa sini nga mga halad. 17  Mangin matinumanon sa mga nagapanguna sa inyo kag mangin mapinasakupon, kay ginabantayan nila ang inyo kalag subong nga sila ang manabat; agod himuon nila ini nga may kalipay kag wala nagapanghayhay, kay makahalit ini sa inyo. 18  Padayon kamo nga magpangamuyo para sa amon, kay nagasalig kami nga may bunayag kami nga konsiensia, bangod luyag namon maggawi sing bunayag sa tanan nga butang. 19  Apang ilabi na nga nagalaygay ako sa inyo nga himuon ini, agod mapabalik ako sa inyo sa labing madali. 20  Karon kabay nga ang Dios sang paghidait, nga nagbanhaw gikan sa mga patay sa aton Ginuong Jesus nga may dugo sang wala katapusan nga katipan kag amo ang daku nga manugbantay sang mga karnero, 21  magsangkap sa inyo sang tagsa ka maayong butang agod himuon ang iya kabubut-on, nga ginahimo sa aton paagi kay Jesucristo ang kalahamut-an gid sa iya itululok; mangin sa iya ang himaya tubtob sa wala katubtuban. Kabay pa.* 22  Karon ginalaygayan ko kamo, mga kauturan, nga magmapailubon kamo samtang ginabasa ninyo ining pulong sang pagpalig-on, kay nagsulat gid ako sa inyo sang pila lang ka tinaga. 23  Talupangda ninyo nga ang aton utod nga si Timoteo ginbuy-an na, kon mag-abot sia gilayon, kaupod ko sia nga makigkita sa inyo. 24  Ipalab-ot ninyo ang akon panamyaw sa tanan nga nagapanguna sa inyo kag sa tanan nga balaan. Ang mga taga-Italya nagapadala sang ila panamyaw sa inyo. 25  Ang wala tupong nga kaayo mangin yara sa inyo tanan.

Footnote

Heb 13:21 * Ukon, “Amen.”