Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON) Tan-awa ang 2014 nga edisyon

Galacia 3:1-29

3  O buangbuang nga mga taga-Galacia, sin-o ang nagdala sa inyo sa malaut nga impluwensia, nga sa atubangan sang inyo mga mata ginlaragway sing maathag si Jesucristo nga ginlansang sa usok?  Ini lamang ang luyag ko mahibaluan gikan sa inyo: Ginbaton bala ninyo ang espiritu bangod sa mga buhat sang kasuguan ukon bangod sa pagpamati nga may pagtuo?  Amo bala kamo sina ka buangbuang? Sa tapos magsugod sa espiritu nagahingapos bala kamo karon sa unod?  Naagihan bala ninyo ang madamo gid nga pag-antos nga wala sing katuyuan? Kon matuod gid nga wala ini sing katuyuan.  Busa, sia nga nagahatag sa inyo sang espiritu kag nagahimo sang gamhanan nga mga buhat sa tunga ninyo, ginahimo bala niya ini tungod sa mga buhat sang kasuguan ukon tungod sa pagpamati nga may pagtuo?  Subong nga si Abraham “nagtuo kay Jehova, kag bangod sini ginkabig sia nga matarong.”  Pat-od gid nga nahibaluan ninyo nga ang mga tawo nga may pagtuo amo ang mga anak ni Abraham.  Karon bangod nakita na nga daan sang Kasulatan nga ipahayag nga matarong sang Dios ang mga tawo sang mga pungsod bangod sa pagtuo, ginpahayag sini nga daan ang maayong balita kay Abraham, nga amo: “Paagi sa imo pakamaayuhon ang tanan nga pungsod.”  Gani ang mga tawo nga may pagtuo ginapakamaayo upod sa matutom nga si Abraham. 10  Kay ang tanan nga nagasandig sa mga buhat sang kasuguan yara sa idalom sang pagpakamalaut; kay nasulat na: “Ginapakamalaut ang tagsatagsa nga wala nagapadayon sa pagtuman sa tanan nga butang nga nasulat sa linukot nga Kasuguan.” 11  Dugang pa, maathag nga paagi sa kasuguan wala sing isa nga ginapahayag nga matarong sa Dios, bangod “ang isa nga matarong magakabuhi bangod sa pagtuo.” 12  Karon ang Kasuguan wala nasandig sa pagtuo, apang “sia nga nagatuman sini magakabuhi paagi sa sini.” 13  Paagi sa pagbakal ginhilway kita ni Cristo gikan sa pagpakamalaut sang Kasuguan paagi sa pagpakamalaut sa iya sa baylo nga kita, bangod nasulat na: “Ginapakamalaut ang tagsa ka tawo nga ginabutang sa usok.” 14  Ang katuyuan amo nga ang pagpakamaayo kay Abraham mag-abot sa mga pungsod paagi kay Jesucristo, agod mabaton naton ang ginsaad nga espiritu paagi sa aton pagtuo. 15  Mga kauturan, nagahambal ako paagi sa ilustrasyon sang tawo: Ang isa ka katipan nga ginpalig-on, bisan pa iya ini sang tawo, wala sing isa nga magpakawala-pulos ukon magdugang sa sini. 16  Karon ang mga saad ginsiling kay Abraham kag sa iya binhi. Wala ini nagasiling: “Kag sa mga binhi,” subong nga sa madamo, kundi subong nga sa isa lang: “Kag sa imo binhi,” nga si Cristo. 17  Dugang pa, ginasiling ko ini: Tuhoy sa katipan nga ginpalig-on sang Dios sang una, wala ini ginapakawala-pulos sang Kasuguan nga nagluntad pagligad sang apat ka gatos kag katluan ka tuig, agod dulaon ang saad. 18  Kay kon ang palanublion bangod sa kasuguan, indi na ini bangod sa saad; apang mainayuhon nga ginhatag ini sang Dios kay Abraham paagi sa isa ka saad. 19  Kon amo, ngaa may Kasuguan? Gindugang ini agod mapadayag ang mga paglapas, tubtob mag-abot ang binhi nga ginhatagan sing saad; kag ginpaalinton ini sang mga anghel paagi sa kamot sang isa ka manugpatunga. 20  Karon wala sing manugpatunga kon isa lamang ka persona ang nadalahig, apang ang Dios isa lamang. 21  Busa, ang Kasuguan bala batok sa mga saad sang Dios? Indi gid ina matabo! Kay kon ginhatag ang isa ka kasuguan nga makahatag sang kabuhi, ang pagkamatarong nangin paagi gid kuntani sa kasuguan. 22  Apang tingob nga gintugyan sang Kasulatan ang tanan nga butang sa pagkabilanggo sa sala, agod ang saad nga resulta sang pagtuo kay Jesucristo mahatag sa mga nagatuo. 23  Apang, antes mag-abot ang pagtuo, ginbantayan kita sa idalom sang kasuguan, nga gintugyan sing tingob sa pagkabilanggo, nga nagapaabot sa pagtuo nga gintalana nga ipahayag. 24  Gani ang Kasuguan nangin manunudlo naton nga nagadul-ong sa aton kay Cristo, agod mapahayag kita nga matarong bangod sa pagtuo. 25  Apang karon nga nag-abot na ang pagtuo, wala na kita sa idalom sang isa ka manunudlo. 26  Sa katunayan, kamo tanan mga anak sang Dios paagi sa inyo pagtuo kay Cristo Jesus. 27  Kay tanan kamo nga ginbawtismuhan kay Cristo nagsuklob kay Cristo. 28  Wala sing Judiyo ukon Griego, wala sing ulipon ukon hilway nga tawo, wala sing lalaki ukon babayi; kay kamo tanan isa ka tawo nga nahiusa kay Cristo Jesus. 29  Dugang pa, kon kamo iya ni Cristo, binhi gid kamo ni Abraham, mga manunubli suno sa saad.

Footnote