Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON) Tan-awa ang 2014 nga edisyon

Efeso 5:1-33

5  Busa, mangin manug-ilog kamo sa Dios, subong mga anak nga hinigugma,  kag padayon kamo nga maglakat sa gugma, subong nga si Cristo naghigugma man sa inyo kag nagtugyan sang iya kaugalingon para sa inyo subong isa ka dulot kag isa ka halad sa Dios subong isa ka mahumot nga kaamyon.  Ang pagpakighilawas kag ang tanan nga sahi sang kahigkuan ukon kakagod indi gid paghinambitan sa tunga ninyo, subong nga nagakaigo sa mga tawo nga balaan;  ukon ang makahuluya nga paggawi ukon ang binuang nga hambal ukon ang malaw-ay nga linahog, mga butang nga indi nagakaigo, kundi sa baylo ang pagpasalamat.  Kay nahibaluan ninyo ini, kag nahangpan gid ninyo, nga wala sing makihilawason ukon mahigko nga tawo ukon makagod nga tawo—nga buot silingon nagasimba sa mga idolo—ang may palanublion sa ginharian ni Cristo kag sang Dios.  Wala sing tawo nga magdaya sa inyo paagi sa wala pulos nga mga pulong, kay bangod sini nga mga butang magaabot ang kasingkal sang Dios sa mga anak sang pagkadimatinumanon.  Gani indi kamo mangin umalambit upod sa ila;  kay kadudulman kamo anay, apang kapawa na kamo karon may kaangtanan sa Ginuo. Padayon kamo nga maglakat subong mga anak sang kapawa,  kay ang mga bunga sang kapawa nagalakip sang tanan nga sahi sang pagkamaayo kag pagkamatarong kag kamatuoran. 10  Padayon ninyo nga pat-ura kon ano ang kalahamut-an sa Ginuo; 11  kag untati ninyo ang pagpakigbahin sa ila sa di-mabungahon nga mga buhat sang kadudulman, kundi, sa baylo, sawaya ini, 12  kay ang mga butang nga ginahimo nila sing tago makahuluya ini bisan ihambal. 13  Karon ang tanan nga butang nga ginasaway ginapadayag sang kapawa, kay ang tanan nga butang nga ginapadayag kapawa. 14  Gani nagsiling sia: “Magbugtaw, O ikaw nga nagakatulog, kag magbangon gikan sa mga patay, kag si Cristo magasilak sa imo.” 15  Gani padayon ninyo nga bantayi sing maayo nga ang inyo paglakat indi subong di-maalam kundi subong maalam nga mga tawo, 16  nga ginabakal ang nagakaigo nga tion para sa inyo kaugalingon, bangod ang mga adlaw malaut. 17  Bangod sini indi na kamo mangin di-makatarunganon, kundi padayon ninyo nga hantupon kon ano ang kabubut-on ni Jehova. 18  Subong man, indi kamo magpahubog sa alak, nga may pagpatuyang, kundi padayon kamo nga mapuno sing espiritu, 19  nga nagahambalanay sang mga salmo kag mga pagdayaw sa Dios kag espirituwal nga mga ambahanon, nga nagaamba kag nagadayaw kay Jehova paagi sa ambahanon sa inyo tagipusuon, 20  nga nagapasalamat pirme sa aton Dios kag Amay sa ngalan sang aton Ginuong Jesucristo tungod sa tanan nga butang. 21  Magpasakop kamo sa isa kag isa tungod sa kahadlok kay Cristo. 22  Ang mga asawa magpasakop sa ila bana subong nga sa Ginuo, 23  bangod ang bana amo ang ulo sang iya asawa subong nga si Cristo amo man ang ulo sang kongregasyon, kay sia ang manluluwas sini nga lawas. 24  Sa katunayan, subong nga ang kongregasyon nagapasakop kay Cristo, amo man ang mga asawa sa ila bana sa tanan nga butang. 25  Mga bana, padayon nga higugmaa ang inyo asawa, subong nga si Cristo naghigugma man sang kongregasyon kag nagtugyan sang iya kaugalingon tungod sa sini, 26  agod mapakabalaan niya ini, nga nagatinlo sa sini paagi sa paghugas sa tubig paagi sa pulong, 27  agod mapaatubang niya sa iya kaugalingon ang kongregasyon nga may katahom, nga wala sing higko ukon kurinot ukon bisan anong butang nga kaangay sini, kundi agod mangin balaan ini kag wala sing depekto. 28  Sa sining paagi ang mga bana dapat maghigugma sang ila asawa subong sang ila kaugalingon nga lawas. Sia nga nagahigugma sang iya asawa nagahigugma sang iya kaugalingon, 29  kay wala sing tawo nga nagadumot sang iya kaugalingon nga unod; kundi ginapakaon kag ginapalangga niya ini, subong sang ginahimo ni Cristo sa kongregasyon, 30  bangod mga bahin kita sang iya lawas. 31  “Bangod sini bayaan sang lalaki ang iya amay kag ang iya iloy kag magahiusa sia sa iya asawa, kag ang duha mangin isa ka unod.” 32  Daku ining sagrado nga likom. Karon nagahambal ako nahanungod kay Cristo kag sa kongregasyon. 33  Apang, ang kada isa sa inyo maghigugma man sang iya asawa subong sang paghigugma niya sa iya kaugalingon; kag ang asawa dapat may tudok nga pagtahod sa iya bana.

Footnote