Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON) Tan-awa ang 2014 nga edisyon

Binuhatan 6:1-15

6  Sa amo nga mga adlaw, sang nagadamo ang mga disipulo, ang mga Judiyo nga nagahambal sing Griego nagkumod batok sa mga Judiyo nga nagahambal sing Hebreo, bangod napabay-an ang ila mga balo nga babayi sa adlaw-adlaw nga pagpanagtag sing pagkaon.  Gani gintawag sang napulog-duha ang kadam-an sang mga disipulo kag nagsiling: “Indi kalahamut-an nga bayaan namon ang pulong sang Dios agod magpanagtag sang pagkaon sa mga lamesa.  Gani, mga kauturan, pangita kamo sang pito ka lalaki nga may pamatuod gikan sa tunga ninyo, nga puno sang espiritu kag kaalam, agod matangdo namon sila sa pag-atipan sa sining kinahanglanon nga buluhaton;  apang ihugod namon ang amon kaugalingon sa pangamuyo kag sa ministeryo may kaangtanan sa pulong.”  Kag ang ginsiling nila nagpahamuot sa bug-os nga kadam-an, kag ginpili nila si Esteban, isa ka lalaki nga puno sang pagtuo kag balaan nga espiritu, kag si Felipe kag si Procoro kag si Nicanor kag si Timon kag si Parmenas kag si Nicolas, nga isa ka proselita nga taga-Antioquia;  kag ginpaatubang nila sila sa mga apostoles, kag nagpangamuyo sila kag nagtungtong sang ila mga kamot sa ila.  Bangod sini ang pulong sang Dios padayon nga nagtubo, kag padayon nga nagdamo sing madasig ang mga disipulo sa Jerusalem; kag isa ka daku nga kadam-an sang mga saserdote ang nangin matinumanon sa pagtuo.  Kag si Esteban, nga mainayuhon gid kag puno sang gahom, naghimo sang daku nga mga kalatingalahan kag mga tanda sa mga tawo.  Apang may mga lalaki gikan sa grupo nga ginatawag Sinagoga sang Ginhilway nga mga Tawo, kag mga taga-Cirene kag mga taga-Alejandria kag mga taga-Cilicia kag mga taga-Asia, nga nakigbais kay Esteban; 10  apang indi nila masarangan sumpungon ang kaalam kag espiritu nga paagi sini nagahambal sia. 11  Nian ginsugyot nila sing tago ang mga lalaki nga magsiling: “Nabatian namon sia nga naghambal sang pasipala batok kay Moises kag sa Dios.” 12  Kag ginsugyot nila ang katawhan kag ang mga tigulang nga lalaki kag ang mga escriba, kag hinali sila nga nagpalapit sa iya kag pakusog nga gindakop nila sia kag gindala sa Sanhedrin.* 13  Kag nagdala sila sang butig nga mga saksi, nga nagsiling: “Ini nga tawo wala mag-untat sa paghambal batok sa sining balaan nga duog kag batok sa Kasuguan. 14  Halimbawa, nabatian namon sia nga nagasiling nga gub-on sining Jesus nga Nazaretnon ini nga duog kag bag-uhon ang mga kinabatasan nga ginhatag ni Moises sa aton.” 15  Kag samtang nagatulok sa iya ang tanan nga nagalingkod sa Sanhedrin, nakita nila nga ang iya nawong subong sang nawong sang anghel.

Footnote

Bin 6:12 * Tan-awa ang nota sa Mat 26:59.