Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Biblia Online | BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON) Tan-awa ang 2014 nga edisyon

2 Pedro 3:1-18

3  Mga hinigugma, amo na ini karon ang ikaduha nga sulat nga ginasulat ko sa inyo, kag subong sang akon nahauna nga sulat, ginapukaw ko paagi sini ang inyo ikasarang sa maathag nga paghunahuna paagi sa isa ka pahanumdom,  agod madumduman ninyo ang mga pulong nga ginsiling anay sang balaan nga mga manalagna kag ang sugo sang Ginuo kag Manluluwas paagi sa inyo mga apostoles.  Kay una sa tanan nahibaluan ninyo ini, nga sa katapusan nga mga adlaw ang mga mayubiton magaabot nga may pagyubit, nga ginapasundan ang ila mga kailigbon  kag nagasiling: “Diin na ining ginsaad nga presensia niya? Sugod sang nagtulog sa kamatayon ang aton mga katigulangan, ang tanan nga butang nagapadayon nga amo gid gihapon kutob sa ginsuguran sang pagpanuga.”  Kay suno sa ila luyag, wala nila matalupangdan ining katunayan, nga sang una may langit kag isa ka duta nga nagatindog sing malig-on gikan sa tubig kag sa tunga sang tubig paagi sa pulong sang Dios;  kag paagi sini ang kalibutan sadto nalaglag sang gin-anaw ini sang tubig.  Apang paagi sa amo man nga pulong ang langit kag ang duta karon ginatigana sa kalayo kag ginatipigan tubtob sa adlaw sang paghukom kag sang paglaglag sa di-diosnon nga mga tawo.  Apang, talupangda ninyo ining isa ka katunayan, mga hinigugma, nga ang isa ka adlaw kay Jehova subong sang isa ka libo ka tuig kag ang isa ka libo ka tuig subong sang isa ka adlaw.  Si Jehova indi mahinay may kaangtanan sa iya saad, subong sang paghangop sang iban nga mga tawo sa kahinayon, kundi mapailubon sia sa inyo bangod indi niya luyag nga ang bisan sin-o malaglag kundi luyag niya nga ang tanan makadangat sa paghinulsol. 10  Apang ang adlaw ni Jehova magaabot subong sang kawatan, nga sa sini ang mga langit magataliwan nga may nagasagitsit nga kagahod, apang ang mga elemento matunaw bangod sa sobra nga kainit, kag ang duta kag ang mga binuhatan nga yara sa sini madayag. 11  Kon amo, sanglit ini tanan nga butang matunaw, dapat talupangdon ninyo kon ano kamo nga sahi sang mga tawo may kaangtanan sa balaan nga paggawi kag sa mga buhat sang diosnon nga debosyon, 12  nga ginahulat kag pirme ginadumdom ang presensia sang adlaw ni Jehova, nga paagi sini ang langit nga nagakasunog matunaw kag ang mga elemento matunaw bangod sa sobra nga kainit! 13  Apang may bag-ong langit kag bag-ong duta nga ginahulat naton suno sa iya saad, kag sa sini magapuyo ang pagkamatarong. 14  Gani, mga hinigugma, sanglit ginahulat ninyo ining mga butang, himua ninyo ang inyo bug-os nga masarangan agod sa katapusan masapwan niya kamo nga wala sing higko kag wala sing depekto kag sa paghidait. 15  Dugang pa, kabiga ninyo ang pagpailob sang aton Ginuo subong kaluwasan, subong sang ginsulat man sa inyo sang aton hinigugma nga utod nga si Pablo suno sa kaalam nga ginhatag sa iya, 16  nga nagahambal tuhoy sini nga mga butang subong sang iya man ginahimo sa tanan niya nga sulat. Apang, sa sini may pila ka butang nga mabudlay hangpon, nga ginapatiko sang mga wala matudluan kag mga di-malig-on, subong sang ginahimo man nila sa iban pa nga bahin sang Kasulatan, nga nagadul-ong sa ila mismo kalaglagan. 17  Busa kamo, mga hinigugma, bangod nakahibalo na kamo nga daan sini, magbantay kamo agod indi kamo mapahilayo kaupod nila paagi sa sayop sang mga tawo nga di-matinumanon sa kasuguan kag madula ang inyo kaugalingon nga kapag-on. 18  Indi, kundi padayon kamo sa pagbaton sing kapin nga wala tupong nga kaayo kag ihibalo sa aton Ginuo kag Manluluwas nga si Jesucristo. Mangin sa iya ang himaya karon kag tubtob sa adlaw nga wala katubtuban.

Footnote