Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON) Tan-awa ang 2014 nga edisyon

2 Corinto 3:1-18

3  Ginasugdan bala namon liwat nga irekomendar ang amon kaugalingon? Ukon ayhan, kaangay sa iban nga tawo, nagakinahanglan bala kami sang mga sulat nga rekomendasyon sa inyo ukon gikan sa inyo?  Kamo mismo ang amon sulat, nga nasulat sa amon tagipusuon kag nakilala kag ginabasa sang bug-os nga katawhan.  Kay ginapakita kamo subong sulat ni Cristo nga ginsulat namon subong mga ministro, nga ginsulat indi paagi sa tinta kundi paagi sa espiritu sang buhi nga Dios, indi sa mga tapitapi nga bato, kundi sa undanon nga mga tapitapi, sa mga tagipusuon.  Karon paagi kay Cristo may amo kami sini nga sahi sang pagsalig sa Dios.  Indi nga kami sangkol nga kalipikado sa amon kaugalingon nga kabigon ang bisan ano nga butang subong nagagikan sa amon kaugalingon, kundi ang amon pagkakalipikado nagagikan sa Dios,  nga naghimo gid sa amon nga sangkol nga kalipikado nga mangin mga ministro sang bag-o nga katipan, indi sang nasulat nga kasuguan, kundi sang espiritu; kay ang nasulat nga kasuguan nagapakamalaut padulong sa kamatayon, apang ang espiritu nagahatag sang kabuhi.  Dugang pa, kon ang kasuguan nga nagahatag sang kamatayon kag may mga letra nga natigib sa mga bato nag-abot nga may himaya, amo nga ang mga anak ni Israel indi makatulok sing maayo sa nawong ni Moises bangod sa himaya sang iya nawong, isa ka himaya nga pagadulaon,  ngaa abi indi labi pa nga may himaya ang paghatag sing espiritu?  Kay kon ang kasuguan nga nagahatag sang pagpakamalaut mahimayaon, mas labi pa nga may daku nga himaya ang paghatag sing pagkamatarong. 10  Sa katunayan, bisan ang ginhimo nga mahimayaon sadto ginkuhaan sing himaya sa sining paagi, bangod sang himaya nga nagalabaw sa sini. 11  Kay kon ang pagadulaon gindala nga may himaya, mas labi pa nga may himaya ang nagapabilin. 12  Busa, sanglit may amo sini kami nga paglaum, may daku kami nga kahilwayan sa paghambal, 13  kag wala ginahimo ang subong sang pagbutang ni Moises sing tabon sa iya nawong, agod ang mga anak ni Israel indi makatulok sing maayo sa katapusan sinang pagadulaon. 14  Apang ang ila ikasarang sa paghunahuna naghabol. Kay tubtob karon nga adlaw ang amo gihapon nga tabon nagapabilin nga wala makuha samtang ginabasa ang daan nga katipan, bangod ginadula ini paagi kay Cristo. 15  Sa katunayan, tubtob karon nga adlaw kon ginabasa ang sinulatan ni Moises, yara ang tabon sa ila tagipusuon. 16  Apang kon may pagliso kay Jehova, ang tabon makuha. 17  Karon si Jehova amo ang Espiritu; kag kon diin ang espiritu ni Jehova, may kahilwayan. 18  Kag samtang ginapabanaag naton nga wala sing tabon sa nawong kaangay sang mga espiho ang himaya ni Jehova, kita tanan ginabalhin sa amo man nga larawan gikan sa himaya pa himaya, subong gid sa ginahimo ni Jehova, nga Espiritu.

Footnote