Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON) Tan-awa ang 2014 nga edisyon

2 Corinto 10:1-18

10  Karon ako mismo, si Pablo, nagahingyo sa inyo pasad sa kalulo kag kaayo sang Cristo, bisan kubos ako tan-awon sa tunga ninyo, apang maisog ako kon wala sa inyo atubangan.  Nagapakiluoy ako nga kon yara ako dira, indi kuntani ako mangin maisog subong sang ginapaabot ko kag himuon ang matigdas nga tikang batok sa pila nga nagatamod sa amon subong bala nga nagalakat kami suno sa amon undanon nga mga huyog.  Kay bisan pa nagakabuhi kami subong unod, wala kami nagapakig-away suno sa undanon nga paagi.  Kay ang mga hinganiban sang amon pagpakig-away indi undanon, kundi gamhanan paagi sa Dios agod pukanon ang mga butang nga natukod sing malig-on.  Kay ginapukan namon ang mga pangatarungan kag ang tagsa ka mataas nga butang nga supak sa ihibalo sang Dios; kag ginabihag namon ang tagsa ka panghunahuna agod himuon ini nga matinumanon kay Cristo;  kag ginhanda namon ang amon kaugalingon nga magsilot sa tagsa ka pagkadimatinumanon, sa tapos ninyo mapamatud-an nga matinumanon kamo sing bug-os.  Ginatulok ninyo ang mga butang suno sa ila nagua nga dagway. Kon ang bisan sin-o nagasalig sa iya kaugalingon nga sia iya ni Cristo, binagbinagon niya liwat ini nga katunayan para sa iya kaugalingon, nga subong nga sia iya ni Cristo, amo man kami.  Kay bisan pa daw sobra ang akon pagpabugal tuhoy sa awtoridad nga ginhatag sa amon sang Ginuo agod pabakuron kamo kag indi agod gub-on kamo, indi ako mahuy-an,  agod indi kamo maghunahuna nga luyag ko kamo pahugon paagi sa akon mga sulat. 10  Kay, nagasiling sila: “Ang iya mga sulat maunod kag mapuersa, apang ang iya presensia sa personal maluya kag ang iya panghambal talamayon.” 11  Dapat binagbinagon sang amo nga tawo, nga kon ano ang amon ginasiling sa amon mga sulat kon wala kami, amo man ang amon himuon kon yara kami. 12  Kay wala kami nagapangahas nga mangin pareho kami sa iban ukon ipaanggid ang amon kaugalingon sa pila nga nagarekomendar sang ila kaugalingon. Sa pagtakus sang ila kaugalingon paagi sa ila kaugalingon kag sa pagpaanggid sang ila kaugalingon sa ila kaugalingon pat-od gid nga wala sila sing paghangop. 13  Sa amon bahin, magapabugal kami, indi lampas sa gintangdo sa amon nga mga dulunan, kundi suno sa dulunan sang teritoryo nga ginbahin sa amon sang Dios suno sa takus, nga nagalab-ot tubtob sa inyo. 14  Sa pagkamatuod wala kami nagalampas sa amon dulunan nga subong bala wala ini naglab-ot sa inyo, kay kami ang una nga nagkadto tubtob sa inyo sa pagpahayag sing maayong balita tuhoy sa Cristo. 15  Wala, wala kami nagapabugal lampas sa gintangdo sa amon nga mga dulunan nga ginapangabudlayan sang iban, apang nagalaum kami nga samtang nagadugang ang inyo pagtuo, pakadakuon kami sa tunga ninyo may kaangtanan sa amon teritoryo. Nian labi kami nga pakadakuon, 16  sa pagpahayag sing maayong balita sa mga pungsod sa unhan pa ninyo, agod indi magpabugal sa teritoryo sang iban kon diin ang mga butang nahanda na. 17  “Kundi sia nga nagapabugal, magpabugal sia may kaangtanan kay Jehova.” 18  Kay indi ang isa nga nagarekomendar sang iya kaugalingon ang ginakahamut-an, kundi ang tawo nga ginarekomendar ni Jehova.

Footnote