Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON) Tan-awa ang 2014 nga edisyon

2 Corinto 1:1-24

1  Halin kay Pablo, nga apostol ni Cristo Jesus paagi sa kabubut-on sang Dios, kag kay Timoteo nga aton utod para sa kongregasyon sang Dios nga yara sa Corinto, upod sa tanan nga balaan nga yara sa bug-os nga Acaya:  Kabay nga may yara kamo wala tupong nga kaayo* kag paghidait gikan sa Dios nga aton Amay kag kay Ginuong Jesucristo.  Dayawon ang Dios kag Amay sang aton Ginuong Jesucristo, ang Amay nga may mapinalanggaon nga kaluoy kag ang Dios nga may bug-os nga paglugpay,  nga nagalugpay sa aton sa tanan naton nga kapipit-an, agod malugpayan naton ang yara sa bisan ano nga sahi sang kapipit-an paagi sa lugpay nga ginlugpay man sang Dios sa aton.  Kay subong nga ang aton mga pag-antos tungod kay Cristo bugana, bugana man nga lugpay ang aton nabaton paagi kay Cristo.  Karon kon yara kami sa kapipit-an, para ini sa paglugpay kag pagluwas sa inyo; ukon kon ginalugpayan kami, nagapanghikot ini sa paglugpay sa inyo agod mabatas ninyo ang mga pag-antos nga ginaantos man namon.  Gani ang amon paglaum nahanungod sa inyo indi mationg, kay nahibaluan namon nga subong nga mga umalambit kamo sa mga pag-antos, sa amo man nga paagi magaambit man kamo sa lugpay.  Kay indi namon luyag nga indi kamo makahibalo, mga kauturan, tuhoy sa kapipit-an nga natabo sa amon sa distrito sang Asia,* nga napaidalom kami sa tuman gid nga pag-ipit labaw sa amon kusog, amo nga wala gid kami sing kapat-uran bisan sa amon kabuhi.  Sa katunayan, nagbatyag kami sa sulod namon nga nabaton na namon ang pamatbat nga kamatayon. Amo sini agod magsalig kami, indi sa amon kaugalingon, kundi sa Dios nga nagabanhaw sang mga patay. 10  Gikan sa sining daku nga butang subong sang kamatayon ginluwas niya kami kag luwason niya kami; kag nagalaum kami sa iya nga luwason man niya kami liwat. 11  Makabulig man kamo paagi sa inyo pag-ampo para sa amon, agod madamo ang magpangamuyo sa pagpasalamat para sa amon tungod sa kaayo nga ginpakita sa amon bangod sa mga pangamuyo sang madamo. 12  Kay amo ini ang butang nga ginapabugal namon, nga ginapamatud-an sang amon konsiensia, nga paagi sa pagkabalaan kag diosnon nga pagkasinsero, indi paagi sa undanon nga kaalam kundi paagi sa wala tupong nga kaayo sang Dios, nagagawi kami sa kalibutan, apang ilabi na gid sa tunga ninyo. 13  Kay wala gid kami nagasulat sang iban nga mga butang sa inyo kundi ang nahibaluan gid lamang ninyo ukon nakilala man; kag nagalaum ako nga padayon ninyo nga kilalahon ini tubtob sa katapusan, 14  subong nga ginkilala man ninyo, sa isa ka kasangkaron, nga kami ang kabangdanan nga magpabugal kamo, subong nga mangin amo man kamo sa amon sa adlaw sang aton Ginuong Jesus. 15  Gani, bangod sini nga pagsalig, nagbuko anay ako nga magkadto sa inyo, agod magkalipay kamo sa ikaduha nga higayon, 16  kag sa tapos makahapit sa inyo makadto ako sa Macedonia, kag magbalik sa inyo gikan sa Macedonia kag madul-ong ninyo pakadto sa Judea. 17  Bueno, sang ginbuko ko ini, wala ko ini ginpasapayanan, indi bala? Ukon ang mga butang nga gintuyo ko, gintuyo ko bala ini suno sa unod, agod magsiling ako “Huo, Huo” kag dayon “Indi, Indi”? 18  Apang ang Dios masaligan amo nga ang amon pinamulong sa inyo indi Huo kag dayon Indi gali. 19  Kay ang Anak sang Dios, si Cristo Jesus, nga ginbantala sa tunga ninyo paagi sa amon, nga amo, paagi sa akon kag kay Silvano* kag kay Timoteo, indi nangin Huo kag dayon Indi gali, kundi sa iya ang Huo nangin Huo. 20  Kay bisan pa daw ano kadamo ang mga saad sang Dios, nangin Huo ini paagi sa iya. Gani paagi man sa iya ang “Amen” ginasiling sa Dios agod maghatag kita sang himaya sa iya. 21  Apang sia nga nagagarantiya nga kamo kag kami iya ni Cristo kag sia nga naghaplas sa aton amo ang Dios. 22  Ginbutang man niya ang iya pat-in sa amon kag ginhatagan kami sing kalig-unan sang kon ano ang magaabot, nga amo, ang espiritu, sa amon tagipusuon. 23  Karon ginatawag ko ang Dios subong saksi batok sa akon kalag nga wala pa ako magkadto sa Corinto agod malikaw kamo sa dugang nga kasubo. 24  Indi nga mga agalon kami sang inyo pagtuo, kundi mga masigkamanugpangabudlay kami para sa inyo kalipay, kay nagatindog kamo bangod sa inyo pagtuo.

Footnote

2Co 1:2 * Tan-awa ang nota sa Ju 1:14.
2Co 1:8 * Tan-awa ang nota sa Bin 2:9.
2Co 1:19 * Ukon, “Silas.”