Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON) Tan-awa ang 2014 nga edisyon

1 Timoteo 5:1-25

5  Indi pagmulaya ang isa ka tigulang nga lalaki. Sa baylo, magpangabay sa iya subong amay, sa lamharon nga mga lalaki subong mga utod,  sa tigulang nga mga babayi subong mga iloy, sa lamharon nga mga babayi subong mga utod upod ang bug-os nga kaputli.  Padunggi ang mga balo nga babayi nga matuod gid nga mga balo.  Apang kon ang balo nga babayi may mga anak ukon mga apo, magtuon anay sila sa pag-atipan sa ila kaugalingon nga panimalay suno sa diosnon nga debosyon kag padayon nga maghatag sang nagakaigo nga balos sa ila mga ginikanan kag mga lolo kag lola, kay kalahamut-an ini sa itululok sang Dios.  Ang babayi nga matuod gid nga balo kag namigado gid nagalaum sa Dios kag padayon nga nagaampo kag nagapangamuyo sa adlaw kag gab-i.  Apang ang isa nga nagakabuhi sa undanon nga pagpatuyang patay na bisan buhi pa sia.  Gani padayon nga isugo ini, agod indi sila mangin salawayon.  Kon sin-o man ang wala nagaaman para sa mga natungod sa iya, kag ilabi na para sa mga katapo sang iya panimalay, ginapanghiwala niya ang pagtuo kag malain pa sa tawo nga wala sing pagtuo.  Ilista ang balo nga indi kubos sa kan-uman ka tuig ang edad, nangin asawa sang isa lang ka bana, 10  nga napamatud-an nga nagahimo sia sang maayong mga buhat, kon nagpadaku sia sang mga anak, kon gin-abiabi niya ang mga estranghero, kon ginhinawan niya ang mga tiil sang mga balaan, kon ginpaumpawan niya ang mga yara sa kapipit-an, kon maukod sia sa tagsa ka maayong buhat. 11  Sa pihak nga bahin, indi pag-ilista ang lamharon nga mga balo, kay kon ang ila seksuwal nga balatyagon magpatunga sa ila kag sa Cristo, luyag nila magpamana, 12  kag magabaton sila sang paghukom bangod ginsikway nila ang nahauna nga kapahayagan sang ila pagtuo. 13  Sa amo man nga tion nakatuon man sila nga wala sing ginahimo, nga nagapanumbalay; huo, indi lamang wala sing ginahimo, kundi mga kutsokutsera man kag mga hilabtera sa mga hilikuton sang iban nga mga tawo, nga nagahambal sang mga butang nga indi nila dapat ihambal. 14  Busa luyag ko nga ang lamharon nga mga balo magpamana, magpanganak, magdumala sang panimalay, kag wala nagapahulag sa manugpamatok nga magtamay. 15  Sa pagkamatuod, ang pila nagliso na agod magsunod kay Satanas. 16  Kon ang tumuluo nga babayi may mga paryente nga balo, paumpawan niya sila, kag indi pagpabug-atan ang kongregasyon. Nian makapaumpaw ini sa matuod gid nga mga balo nga babayi. 17  Ang mga gulang nga lalaki nga nagadumala sa maayo nga paagi kabigon nga takus sa doble nga kadungganan, ilabi na ang mga nagapangabudlay sing lakas sa paghambal kag pagpanudlo tuhoy sa pulong. 18  Kay ang kasulatan nagasiling: “Indi mo pagbusalan ang baka samtang nagalinas ini sang uyas”; subong man: “Ang manugpangabudlay takus sa iya suhol.” 19  Indi pagbatuna ang panumbungon batok sa isa ka gulang nga lalaki, luwas lamang sa pamatuod sang duha ukon tatlo ka saksi. 20  Sabdunga sa atubangan sang tanan nga tumalan-aw ang mga tawo nga padayon nga nagapakasala, agod ang iban magkahadlok man. 21  Hanuot ako nga nagasugo sa imo sa atubangan sang Dios kag ni Cristo Jesus kag sang pinili nga mga anghel nga sundon mo ining mga butang nga wala nagahukom nga daan, nga wala nagahimo sang bisan ano nga may pagpasulabi. 22  Indi magdalidali sa pagtungtong sang imo mga kamot kay bisan sin-o nga tawo; kag indi magpakig-ambit sa mga sala sang iban; hupti nga putli ang imo kaugalingon. 23  Indi ka na mag-inom sang tubig, kundi maggamit sang diutay nga alak para sa imo tiyan kag sa imo masunson nga pagbalatian. 24  Ang mga sala sang pila ka tawo dayag sa tanan, nga nagadul-ong gilayon sa paghukom, apang tuhoy sa iban nga mga tawo ang ila mga sala madayag man sa ulihi. 25  Sa amo man nga paagi ang maayong mga buhat dayag sa tanan kag ang mga indi dayag indi magpabilin nga natago.

Footnote