Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

Biblia Online

BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON) Tan-awa ang 2014 nga edisyon

1 Timoteo 3:1-16

3  Masaligan ining pinamulong. Kon ang bisan sin-o nga lalaki nagatinguha sa palangakuan sang manugtatap, nagahandum sia sang maayo nga buhat.  Busa ang manugtatap dapat indi salawayon, bana sang isa ka asawa, haganhagan sa mga batasan, maligdong sing hunahuna, mahim-ong, maabiabihon, kalipikado sa pagpanudlo,  indi palahubog kag maoy, wala nagapanakit, kundi makatarunganon, indi palaaway, indi mahigugmaon sa kuarta,  isa ka lalaki nga nagadumala sang iya panimalay sa maayo nga paagi, may mga anak nga nagapasakop upod ang bug-os nga pagkaserioso;  (sa pagkamatuod, kon ang bisan sin-o nga lalaki indi makahibalo magdumala sang iya kaugalingon nga panimalay, paano niya maatipan ang kongregasyon sang Dios?)  indi bag-o lang nakumbertir nga lalaki, kay basi magpahambog sia kag mahulog sa paghukom nga ginpadapat sa Yawa.  Dugang pa, ang mga tawo sa gua dapat may maayo man nga testimonya tuhoy sa iya, agod indi sia mahulog sa kahuluy-an kag sa siod sang Yawa.  Ang mga ministeryal nga alagad dapat man mangin serioso, indi duha sing hinambalan, indi palainom sing alak, indi makagod sa di-bunayag nga pagganar,  nagahupot sang sagrado nga likom sang pagtuo nga may matinlo nga konsiensia. 10  Subong man, tilawan sila anay kon bala takus sila, dayon mag-alagad sila subong mga ministro, kon hilway sila sa panumbungon. 11  Ang mga babayi dapat man mangin serioso, indi mabinutangbutangon, haganhagan ang mga batasan, masaligan sa tanan nga butang. 12  Ang ministeryal nga alagad dapat bana sang isa ka asawa, nga nagadumala sa iya mga anak kag panimalay sa maayo nga paagi. 13  Kay ang mga lalaki nga nagaalagad sa maayo nga paagi makatigayon sang maayo nga tindog kag daku nga kahilwayan sa paghambal may kaangtanan sa pagtuo kay Cristo Jesus. 14  Ginasulat ko sa imo ini nga mga butang, bisan pa nagalaum ako nga makakadto sa imo sa indi madugay, 15  agod kon maatrasar ako, mahibaluan mo kon paano ikaw dapat maggawi sa panimalay sang Dios, nga amo ang kongregasyon sang buhi nga Dios, isa ka haligi kag pamakod sang kamatuoran. 16  Sa pagkamatuod, daku gid ang sagrado nga likom sining diosnon nga debosyon: ‘Ginpadayag sia subong unod, ginpahayag nga matarong subong espiritu, nagpakita sa mga anghel, ginbantala sa mga pungsod, gintuuhan sa kalibutan, ginbaton sing mahimayaon sa langit.’

Footnote