Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Biblia Online | BAG-ONG KALIBUTAN NGA BADBAD SANG BALAAN NGA KASULATAN (2014 NGA EDISYON) Tan-awa ang 2014 nga edisyon

1 Corinto 6:1-20

6  Nagapangahas bala ang bisan sin-o sa inyo nga may panumbungon batok sa iban nga magkadto sa hukmanan sa atubangan sang di-matarong nga mga tawo, kag indi sa atubangan sang mga balaan?  Ukon wala bala kamo makahibalo nga ang mga balaan magahukom sa kalibutan? Kag kon kamo ang magahukom sa kalibutan, indi bala kamo takus sa paghukom sa tuman ka gamay nga mga butang?  Wala bala kamo makahibalo nga kita ang magahukom sa mga anghel? Kon amo, ngaa indi sa mga butang man sini nga kabuhi?  Nian, kon may hukman kamo nga mga butang sa sini nga kabuhi, ang mga lalaki bala nga ginapakanubo sang kongregasyon ang ginabutang ninyo nga mga hukom?  Nagahambal ako agod magbatyag kamo sang kahuya. Matuod bala nga wala sing isa ka maalam nga tawo sa tunga ninyo nga makahukom sa iya mga kauturan,  kundi nagakadto ang utod sa hukmanan batok sa utod, kag sa atubangan pa sang mga di-tumuluo?  Kon amo, ang inyo pag-asuntuhanay sa isa kag isa nagakahulugan gid sang kalutusan sa inyo. Ngaa indi na lang ninyo pagpabay-an nga himuan kamo sing sayop? Ngaa indi na lang ninyo pagpabay-an nga dayaan kamo?  Sa baylo, nagahimo kamo sang sayop kag nagapangdaya, kag sa inyo pa mga kauturan.  Ano! Wala bala kamo makahibalo nga ang di-matarong nga mga tawo indi makapanubli sang ginharian sang Dios? Indi pagtuguti nga mapatalang kamo. Wala sing mga makihilawason, ukon mga nagasimba sa mga idolo, ukon mga makihilahion, ukon mga lalaki nga ginahuptan para sa di-kinaugali nga mga katuyuan, ukon mga lalaki nga nagahulid sa mga lalaki, 10  ukon mga kawatan, ukon makagod nga mga tawo, ukon mga palahubog, ukon mga nagatamay sa iban, ukon mga manugkilkil nga makapanubli sang ginharian sang Dios. 11  Apang amo sina anay ang pila sa inyo. Apang ginhugasan na kamo, apang ginpakabalaan na kamo, apang ginpahayag na kamo nga matarong sa ngalan sang aton Ginuong Jesucristo kag sang espiritu sang aton Dios. 12  Ang tanan nga butang ginatugot sang kasuguan sa akon; apang indi tanan nga butang mapuslanon. Ang tanan nga butang ginatugot sang kasuguan sa akon; apang indi ko pag-ipaidalom ang akon kaugalingon sa awtoridad sang bisan ano nga butang. 13  Ang kalan-on para sa tiyan, kag ang tiyan para sa kalan-on; apang lunsay nga dulaon ini sang Dios. Ang lawas indi para sa pagpakighilawas, kundi para sa Ginuo; kag ang Ginuo para sa lawas. 14  Apang ginbanhaw sang Dios ang Ginuo kag banhawon niya kita paagi sa iya gahom. 15  Wala bala kamo makahibalo nga ang inyo lawas mga bahin ni Cristo? Nian, kuhaon ko bala ang mga bahin ni Cristo kag himuon ini nga mga bahin sang isa ka makihilawason nga babayi? Indi gid ina matabo! 16  Ano! Wala bala kamo makahibalo nga sia nga nagabuylog sa isa ka makihilawason nga babayi nangin isa ka lawas sa iya? Kay, “Ang duha,” siling niya, “mangin isa ka unod.” 17  Apang sia nga nagabuylog sa Ginuo nangin isa ka espiritu sa iya. 18  Palagyo kamo gikan sa pagpakighilawas. Ang tagsa ka iban pa nga sala nga mahimo sang tawo wala sing direkta nga kahilabtanan sa iya lawas, apang sia nga padayon nga nagapakighilawas nagapakasala batok sa iya kaugalingon nga lawas. 19  Ano! Wala bala kamo makahibalo nga ang inyo lawas amo ang templo sang balaan nga espiritu sa sulod ninyo, nga nabaton ninyo gikan sa Dios? Subong man, indi na kamo natungod sa inyo kaugalingon, 20  kay ginbakal kamo sa daku nga bili. Gani, himayaa ninyo ang Dios sa inyo lawas.

Footnote