Magdiretso sa kaundan

Magdiretso sa secondary menu

Mga Saksi ni Jehova

Hiligaynon

Ano ang Himuon Ko Kon Wala Ako Nanamian Mag-eskwela?

Ano ang Himuon Ko Kon Wala Ako Nanamian Mag-eskwela?

Ang kinahanglan mo himuon

Dumduma ang kaayuhan sang pagtuon. Mahimo ginapensar mo nga indi mo man magamit ang tanan mo nga ineskwelahan. Pero samtang nagadugang ang imo natun-an mas maintiendihan mo ang nagakatabo sa imo palibot. Makabulig ini sa imo nga ‘mangin tanan nga butang sa tanan nga sahi sang mga tawo,’ para makapakig-angot ka sa mga tawo nga lainlain ang ginhalinan. (1 Corinto 9:22) Mapauswag man sini ang imo ikasarang sa pagdesisyon, nga sigurado nga makabulig sa imo sa ulihi.

Ang pag-eskwela pareho sa pagpanghawan sa kagulangan. Mahapos ini kon husto ang imo mga gamit

Tamda sing positibo ang imo manunudlo. Kon daw makatalaka magtudlo ang imo manunudlo, magpokus ka sa subject, indi sa iya. Dumduma nga mahimo sulitsulit na niya ini nga gintudlo sa lainlain nga klase. Basi pati sia natak-an naman sini amo nga daw indi na mapagsik ang iya pagtudlo.

Tip: Isulat ang inyo leksion, mamangkot sing matinahuron, kag mangin interesado sa inyo ginatun-an. Kon himuon mo ini, mahimo ilugon ka man sang imo mga klasmeyt.

Magsalig sa imo ikasarang. Mahimo sa eskwelahan mo matukiban ang imo mga ikasarang. Si apostol Pablo nagsulat kay Timoteo: ‘Padabdaba kaangay sang kalayo ang dulot sang Dios nga yara sa imo.’ (2 Timoteo 1:6) Maathag nga si Timoteo ginhatagan sing dulot sang balaan nga espiritu. Pero ini nga “dulot” kinahanglan pauswagon, kay basi indi ini maglambo kag indi mapuslan. Ang matuod, indi direkta nga naghalin sa Dios ang imo kaalam sa eskwelahan. Pero, ang imo ikasarang pinasahi sangsa iban. Kon mag-eskwela ka, matukiban mo kag mapauswag ini nga mga ikasarang.