Magdiretso sa kaundan

Magdiretso sa secondary menu

Mga Saksi ni Jehova

Hiligaynon

PAMANGKOT SANG MGA PAMATAN-ON

Ano ang Masiling Parte sa Panumpa nga Magpabilin nga Virgin?

Ano ang Masiling Parte sa Panumpa nga Magpabilin nga Virgin?

 Ano ang panumpa nga magpabilin nga virgin?

Ang panumpa nga magpabilin nga virgin amo ang isa ka nasulat ukon ginhambal nga promisa nga maglikaw sa pag-sex antes sang kasal.

Nangin popular ang panumpa nga magpabilin nga virgin sang katuigan 1990 sang ginsugdan sang Southern Baptist Convention sa Estados Unidos ang programa nga “Ang Matuod nga Gugma Makahulat.” Ginapalig-on sini ang mga pamatan-on, paagi sa mga pagsulundan sa Biblia kag maayo nga impluwensia sang mga katubotubo, nga indi mag-sex antes sang kasal.

Wala madugay pagkatapos sini, may ginhimo man nga kaanggid sini nga programa. Naghiwat sila sing mga pagtilipon diin ang mga tumalambong nga nanumpa ginhatagan sing pilak nga singsing bilang simbulo (kag pahanumdom) nga indi sila mag-sex antes sang kasal.

 Makabulig gid bala ang panumpa nga magpabilin nga virgin?

Ang sabat nagadepende sa kon sin-o ang ginapamangkot mo.

  • Ang mga researcher nga sanday Christine C. Kim kag Robert Rector nagsiling nga “suno sa pila ka pagtuon, nakita nga ang pagpanumpa sang mga pamatan-on nga magpabilin nga virgin nakapugong ukon nakapahaganhagan sa mga tin-edyer nga mag-sex.”

  • Suno sa research nga ginpagua sang Guttmacher Institute, ginapakita sang mga pagtuon nga “pareho lang ang posibilidad nga makig-sex ang mga tin-edyer nga ‘nanumpa nga magpabilin nga virgin’ kag ang mga wala nanumpa.”

Ngaa sarisari ang resulta?

  • Ang pila ka pagtuon nagsurbe sang mga nanumpa kag mga wala nanumpa nga indi pareho ang pagpati parte sa sex.

  • Ang iban nga pagtuon nagsurbe sang mga nanumpa kag mga wala nanumpa nga pareho ang pagpati parte sa sex.

Ano ang ginapakita sining ulihi nga ginsambit nga pagtuon? Si Dr. Janet Rosenbaum, ang espesyalista sa panglawas sang mga pamatan-on, nagsiling nga pagligad sang lima ka tuig, “wala na sing kinalain ang mga nanumpa kag ang mga wala nanumpa kon parte sa ila panimuot sa sex.”

 Mas maayo nga paagi

Maayo gid ang tulumuron sang mga programa parte sa pagpanumpa nga magpabilin nga virgin. Ang problema amo nga wala nila matudlo sing maayo ang mga pagsulundan nga makabulig sa pagtuman sini nga promisa. Madamo sa mga nagpromisa nga magpabilin nga virgin ang “indi serioso sa pagpanumpa,” siling ni Dr. Rosenbaum. “Ang paglikaw dapat nabase sa pagpati sang isa imbes nga sa pag-entra niya sa isa ka programa.”

Ginapabakod sang Biblia ina nga pagpati, indi paagi sa pagpasulat ukon pagpahambal sa ila sang panumpa, kundi paagi sa pagbulig sa ila nga ang “ila mga ikasarang sa paghangop nahanas . . . nga makilala ang maayo kag malain.” (Hebreo 5:14) Dugang pa, ang isa nagapabilin nga virgin indi lang para malikawan ang balatian kag pagbusong; isa ini ka paagi nga mapadunggan ang Manugtukod sang pag-asawahay.Mateo 5:19; 19:4-6.

Ang mga talaksan nga mabasa sa Biblia para sa aton kaayuhan. (Isaias 48:17) Huo, ang tanan nga tawo—ano man ang ila edad—mahimo mangin determinado nga tumanon ang sugo sang Dios nga magpalagyo “sa seksuwal nga imoralidad.” (1 Corinto 6:18) Kon kasal na sila, magakalipay gid sila sa ila seksuwal nga relasyon, nga wala sing mga kabalaka kag paghinulsol nga sa masami resulta sang pag-sex antes sang kasal.