Magdiretso sa kaundan

Magdiretso sa secondary menu

Mga Saksi ni Jehova

Hiligaynon

PAMANGKOT SANG MGA PAMATAN-ON

Kinahanglan Gid Bala nga Mangita Pa Ako sing Dugang nga Abyan?

Kinahanglan Gid Bala nga Mangita Pa Ako sing Dugang nga Abyan?

“Komportable na ako sa akon mga barkada, amo nga nabudlayan ako nga mangita pa sing iban.”​—Alan.

“Gusto ko diutay lang ang akon abyan. Indi ko hilig nga mangilala kag makig-istorya sa iban nga indi ko kilala.”​—Sara.

Pareho ka man bala kay Alan kag kay Sara? May barkada ka na bala amo nga nabudlayan ka mangita sing iban pa.

Kon huo, ini nga artikulo para gid sa imo!

Mga problema sa pagbarkadahay

Indi malain kon may barkada ka. Kay sila ang mga tawo nga magaunong ukon magabaton sa imo bisan ano ka pa.

“Kanami batyagon nga may nanamian sa imo kag may grupo ka. Amo gid ’na ang gusto mo kon pamatan-on ka.”​—Karen, 19.

Kabalo ka bala? Lakip sa madamo nga abyan ni Jesus amo ang iya 12 ka apostoles. Pero tatlo sa ila nga sanday Pedro, Santiago, kag Juan amo ang iya pinakalapit nga abyan.​—Marcos 9:2; Lucas 8:​51.

Pero, mahimo may problema kon ang imo upod pirme amo lang ang imo barkada kag wala ka nagapakig-abyan sa iban. Halimbawa:

  • Mahimo indi mo makilala ang iban nga posible maayo man nga mga abyan.

    “Kon ang ginapili mo lang nga mga abyan pareho sa imo, indi mo maeksperiensiahan ang kalipay sa pagpakig-upod sa maayo nga mga tawo.”​—Evan, 21.

  • Mahimo pamensaron sang iban nga bugalon ka.

    “Kon ang ginaupod mo pirme imo lang barkada, mahimo pensaron sang iban nga indi mo gusto makig-istorya kay bisan sin-o.”​—Sara, 17.

  • Mahimo mangdaugdaug ka man.

    “Kon ikaw lang isa mahimo nga indi ka gid mangdaugdaug, pero kon ang imo mga abyan nagapangdaugdaug, basi pensaron mo nga OK lang ini kag sadyasadya lang.”​—James, 17.

  • Mahimo madalahig ka sa gamo​—ilabi na kon suportahan mo gid ang imo mga abyan ano man ang matabo.

    “Bisan isa lang ang indi maayo sa inyo grupo puede niya impluwensiahan ang tanan sa inyo grupo nga maghimo sing malain.”​—Martina, 17.

Ano ang puede mo himuon?

  • Usisaa ang imo mga batasan.

    Pamangkuta ang imo kaugalingon: ‘Ano nga mga batasan ang ginatinguhaan ko nga ipakita? Ang akon bala mga abyan nagapahapos ukon nagapabudlay sa akon nga ipakita ina nga mga batasan? Dapat bala unungan ko ini nga mga abyan bisan ano man ang matabo?’

    Prinsipio sa Biblia: “Ang pagpakig-upod sa malain nga mga tawo nagaguba sang maayo nga moral.”​—1 Corinto 15:33, footnote.

    “Kon ang imo barkada indi pareho sing batasan sa imo, basi sa ulihi makahimo ka sing mga butang nga indi mo gid mahimo kon ikaw lang.”​—Ellen, 14.

  • Usisaa ang imo mga prioridad.

    Pamangkuta ang imo kaugalingon: ‘Close gid bala kami sang akon barkada amo nga handa ko nga ikompromiso ang akon mga prinsipio para indi maguba ang amon pag-abyanay?’ Ano ang himuon ko kon makasala ang akon abyan?’

    Prinsipio sa Biblia: “Ginasabdong ko . . . ang tanan nga ginahigugma ko.”​—Bugna 3:​19.

    “Kon may kontra ang isa sa inyo barkada kag pirme mo sia ginaapinan bisan pa sala sia, basi batyagon niya nga nagatraidor ka sa inyo pagbarkadahay kon sawayon mo sia.”​—Melanie, 22.

  • Makig-abyan sa iban.

    Pamangkuta ang imo kaugalingon: ‘Ano ang benepisyo sa akon kon makig-abyan ako sa iban nga indi ko masyado kilala?’

    Prinsipio sa Biblia: ‘Pangitaa ninyo indi lamang ang inyo personal nga kaayuhan, kundi ang iya man sang iban.’​—Filipos 2:4.

    “Ang mga bata nga daw ginalikawan sang iban mahimo madamo sing problema sa ila balay. Pero kon makilala mo sila, makita mo nga may maayo man sila nga mga batasan.”​—Brian, 19.

Ang punto: Wala sing malain kon may barkada ka. Pero makabenepisyo ka kon mangita ka sing dugang nga mga abyan. Ang Biblia nagasiling: “Ang bisan sin-o nga nagapaumpaw sa iban paumpawan man.”​—Hulubaton 11:25.