Para masabat mo ini, dapat kilalahon mo anay sing maayo ang imo kaugalingon. Halimbawa, binagbinaga ang masunod:

Kaangtanan sa iban

 Paano mo ginatratar ang imo mga ginikanan kag mga utod? Pirme ka bala nagakadulaan sing pasensia, ayhan nagahambal sing matigdas ukon nagapang-insulto para pamatian nila ang imo opinyon? Ano ayhan ang ila masiling parte sa imo? Makita sa imo pagtratar sa imo mga kapamilya kon paano mo trataron ang imo mangin tiayon sa ulihi.​—Efeso 4:31.

Pagtamod

 Positibo ka bala ukon negatibo? Rasonable ka bala, ukon pirme mo ginapilit ang imo gusto? Kalmado ka bala bisan pa sa mabudlay nga mga sitwasyon? Mapinasensiahon ka bala? Ang pagpakita sang mga aspekto sang bunga sang espiritu sang Dios sa karon magabulig sa imo nga mangin handa subong bana ukon asawa sa ulihi.​—Galacia 5:22, 23.

Pag-uyat sang kuarta

 Kabalo ka bala mag-uyat sang kuarta? Pirme ka bala nagapangutang? Nagadugay ka bala sa imo obra? Kon wala, ngaa? Ang obra bala ang problema? Ang imo amo? Ukon may batasan ka nga kinahanglan mo pa bag-uhon? Kon nabudlayan ka magbadyet sang imo kuarta, paano mo ini mahimo kon may pamilya ka na?​—1 Timoteo 5:8.

Kaangtanan sa Dios

 Kon isa ka sa mga Saksi ni Jehova, ano ang imo ginahimo para mapadayon ang maayo nga kaangtanan sa Dios? Nagabasa ka bala sang Pulong sang Dios, nagapakigbahin sa ministeryo, kag nagatambong sa Cristiano nga mga pagtilipon? Dapat mangin maayo ka nga impluwensia sa espirituwalidad sang imo mapangasawa ukon mapamana.​—Manugwali 4:9, 10.

 Kon makilala mo sing maayo ang imo kaugalingon, daku man ang imo kahigayunan nga makakita sang isa nga makabulig sa imo nga mapauswag ang imo maayo nga mga kinaiya sangsa imo mga kaluyahon.