May nakita ka na bala nga maayo pamanahon ukon pangasaw-on? Kon amo, paano mo mabal-an kon bala bagay gid sia sa imo?

 Importante nga makilala mo gid sia sing maayo. Kay man, ang pinaka-cute nga babayi mahimo indi masaligan ukon ang pinakapopular nga lalaki mahimo nga imoral gali. Gusto mo ang isa nga nanamian mo updan​—ang isa nga bagay sa imo personalidad kag pareho mo sing tulumuron.​—Genesis 2:18; Mateo 19:​4-6.

 Kilalaha sing maayo ang imo naluyagan. Pero maghalong! Basi tan-awon mo lang ang gusto mo makita. Gani, indi magdalidali. Panilagi sing maayo kon ano gid ang iya matuod nga batasan.

 Madamo sang nagadeyt ang nagapabulagbulag lang. Ang ginatan-aw lang nila amo ang mga butang nga pareho sila: “Pareho ang gusto namon nga musika.” “Pareho ang nanamian namon nga himuon.” “Nagaugyunay kami sa tanan nga butang!” Pero indi lang ini ang dapat mo tan-awon. Kinahanglan mo kilalahon “ang tinago nga pagkatawo sa tagipusuon.” (1 Pedro 3:4; Efeso 3:16) Imbes nga magkonsentrar sa kon ano nga mga butang ang inyo ginaugyunan, mas maayo nga hibaluon mo kon ano ang matabo kon indi kamo mag-ugyunay.

 Halimbawa, binagbinaga ang masunod:

•   Ano ang iya himuon kon wala kamo nagaintiendihanay​—ginapilit bala niya ang iya gusto, ayhan ‘nagasilabo sa kaakig’ ukon ‘nagahambal sing malain’? (Galacia 5:​19, 20; Colosas 3:8, Ang Pulong sang Dios) Ukon rasonable bala sia​—nga nagapaumod para malikawan ang gamo kon indi gid man daku ang isyu?​—Santiago 3:17.

•   Dominante bala sia, puguso, ukon maimon? Ginabantayan bala niya ang tanan mo nga hulag? “May kilala ako nga mga nagadeyt nga nagaaway kay gusto sang isa nga pirme sia pahibaluon sang ginahimo sang isa,” siling ni Nicole. “Sa banta ko mangin problema gid ini.”​—1 Corinto 13:4.

•   Ano ang masiling sang iban parte sa iya? Mahimo mo istoryahon ang mga tawo nga madugay na nga nakakilala sa iya, pareho sang mga hamtong nga kauturan sa kongregasyon. Paagi sini, mahibaluan mo kon “maayo ang ginasugid tuhoy sa iya.”​—Binuhatan 16:​1, 2.