Magdiretso sa kaundan

PAMANGKOT SANG MGA PAMATAN-ON

Ano ang Himuon Ko Kon Nag-break Kami?

Ano ang Himuon Ko Kon Nag-break Kami?

“Sang nag-break kami sang akon nobya,” siling ni Steven, “naglalain gid ako. Amo ini ang pinakamasakit nga natabo sa akon kabuhi.”

Nakaagi ka man bala sini? Kon huo, ini nga artikulo makabulig sa imo.

 Ano ang pamatyag mo?

Ang pag-break masakit gid para sa duha nga naganobyahanay.

  • Kon ikaw ang nag-break, mahimo nabatyagan mo ang ginbatyag ni Jasmine nga nagsiling, “Nakonsiensia gid ako kay bal-an ko nga nasakit ko ang balatyagon sang isa nga palangga ko, kag tani indi ko na ini maagihan liwat.”

  • Kon indi ikaw ang nag-break, posible maintiendihan mo kon ngaa siling sang iban daw mapatay sila. “Naagihan ko gid ang mga tion nga grabe ang akon kasubo,” siling ni Janet, “kag nagbatyag ako sing denial, kaakig, depresyon, kag sang ulihi, pagligad sang halos isa ka tuig, nabaton ko gid man ini.”

Ang punto: Ang pag-break mahimo magresulta sa sobra nga kasubo kag grabe nga pagluya sing buot. Ang isa ka manunulat sang Biblia nagsiling: “Ang nadugmok nga espiritu nagaubos sang kusog.”​—Hulubaton 17:22.

 Ano ang puede mo himuon?

  • Makig-istorya sa isa nga hamtong kag ginasaligan mo. Ang Biblia nagsiling: “Ang matuod nga abyan nagahigugma sa tanan nga tion, kag isa ka utod nga masaligan sa tion sang kalisdanan.” (Hulubaton 17:17) Kon isugid mo ang imo ginabatyag sa imo ginikanan ukon sa isa ka hamtong nga abyan mabuligan ka nila nga tadlungon ang imo pagtan-aw sa sitwasyon.

    “Sa sulod sang pila ka bulan, gusto ko mag-isahanon kag indi ko gusto isugid sa iban ang akon ginabatyag. Pero nakabulig gid sa akon ang akon mga abyan. Naghaganhagan lang ang akon ginabatyag sang nag-istorya ako sa ila.”​—Janet.

  • Magtuon sa natabo sa imo. Ang isa pa ka hulubaton sa Biblia nagsiling: “Magkuha ka sing kaalam kag paghangop.” (Hulubaton 4:5) Ang indi maayo nga inagihan makabulig sa aton nga makilala pa gid ang aton kaugalingon kag matun-an kon paano naton atubangon ang kapaslawan.

    “Sang nag-break kami sang akon nobya, ginpamangkot ako sang akon abyan, ‘Ano ang natun-an mo sa natabo, kag ano ang mabulig sini sa imo kon magnobya ka liwat sa ulihi?’ ”​—Steven.

  • Mangamuyo. Ang Biblia nagsiling: “Itugyan ang imo lulan kay Jehova, kag sia magaalay-ay sa imo.” (Salmo 55:22) Ang pangamuyo makapahaganhagan sang imo kasubo kag makabulig sa imo nga tan-awon ang pag-break sa positibo nga paagi.

    “Mangamuyo pirme. Nabatyagan ni Jehova ang imo kasakit kag mas nakahibalo sia sang imo sitwasyon.”​—Marcia.

  • Magbulig sa iban. Ang Biblia nagsiling: “[Pangitaa] ninyo indi lamang ang inyo personal nga kaayuhan, kundi ang iya man sang iban.” (Filipos 2:4) Kon masako ka sa pagbulig sa iban, madali ka maumpawan.

    “Kon nag-break kamo, pamatyag mo daw katapusan na sang kalibutan, kag sobra pa ini sangsa ginkastigo ka. Pero nabatyagan ko nga nagahaganhagan ini pagligad sang tion. Kinahanglan lang hatagan sing tion kag paayuhon.”​—Evelyn.